તિરુવનંતપુરમ : પ્રધાનમંત્રી નરેન્દ્ર મોદીએ શુક્રવારે કેરળની મુલાકાત દરમિયાન સબરીમાલા મંદિરના સોનાની ચોરીના મુદ્દે વિપક્ષો પર આકરા પ્રહાર કર્યા છે. તિરુવનંતપુરમમાં જનસભાને સંબોધતા પીએમએ સ્પષ્ટ શબ્દોમાં વચન આપ્યું હતું કે, જો રાજ્યમાં ભાજપ સત્તા પર આવશે તો સબરીમાલા સોનાના કેસની કડક તપાસ થશે અને એક પણ ગુનેગાર બચશે નહીં.
 
"આસ્થા સાથે ચેડાં સાંખી લેવામાં નહીં આવે"
પીએમ મોદીએ કહ્યું કે, "ભગવાન અયપ્પામાં આખા દેશને અતૂટ શ્રદ્ધા છે, પરંતુ અહીંની LDF સરકારે મંદિરની પરંપરાઓને તોડવામાં કોઈ કસર છોડી નથી. હવે મંદિરમાંથી જ સોનાની ચોરીના અહેવાલો સામે આવી રહ્યા છે, જે આઘાતજનક છે." પીએમએ આશ્વાસન આપ્યું કે આ મામલે સંપૂર્ણ તપાસ કરીને ભ્રષ્ટાચારીઓને જેલના સળિયા પાછળ ધકેલવા એ 'મોદીની ગેરંટી' છે. ઉલ્લેખનીય છે કે, ગર્ભગૃહના દરવાજા પરની સોનાની પ્લેટોમાં ઉચાપતનો આ મામલો અત્યારે હાઈકોર્ટના આદેશથી SIT તપાસ હેઠળ છે.
તિરુવનંતપુરમનો વિકાસ અને રાજકીય પ્રહાર
પીએમએ કોંગ્રેસ (UDF) અને ડાબેરીઓ (LDF) બંને પર નિશાન સાધતા કહ્યું કે, આ બંને પક્ષોએ દાયકાઓથી તિરુવનંતપુરમની અવગણના કરી છે. શહેરને પાયાની સુવિધાઓથી વંચિત રાખનારાઓને જનતા હવે પાઠ ભણાવશે. પીએમએ આ મુલાકાત દરમિયાન વિવિધ વિકાસ પ્રોજેક્ટ્સનું લોકાર્પણ પણ કર્યું હતું.
 
ડિફેન્સમાં ભારતનો માસ્ટર સ્ટ્રોક: અવકાશમાં 50 નવા જાસૂસી 'ચક્ષુ'
બીજી તરફ, ભારત તેની રાષ્ટ્રીય સુરક્ષાને નવી ઊંચાઈ પર લઈ જવા માટે સજ્જ છે. ISRO ટૂંક સમયમાં ૫૦ થી વધુ જાસૂસી ઉપગ્રહો લોન્ચ કરવાની યોજના બનાવી રહ્યું છે. આ ઉપગ્રહોની ખાસિયત એ હશે કે તે ઘનઘોર વાદળો અને રાત્રિના અંધકારમાં પણ દુશ્મનની હિલચાલની સ્પષ્ટ તસવીરો ઝડપી શકશે.
વિદેશમાં ગ્રાઉન્ડ સ્ટેશન: પાકિસ્તાન અને ચીનની વધશે મુશ્કેલી
ભારત માત્ર ઉપગ્રહો જ નહીં, પણ મધ્ય પૂર્વ, દક્ષિણપૂર્વ એશિયા અને સ્કેન્ડિનેવિયન દેશોમાં ગ્રાઉન્ડ સ્ટેશન સ્થાપવાની યોજના પર પણ કામ કરી રહ્યું છે. હાલમાં ભારત પાસે ૧૦૦ થી વધુ ઉપગ્રહો છે, જ્યારે પાકિસ્તાન પાસે માત્ર ૮ છે. આ નવા જાસૂસી નેટવર્કથી સરહદ પર દુશ્મન અંધારામાં પણ છુપાઈ શકશે નહીં.
વ્યૂહાત્મક જીત: પીએમ મોદીની આ મુલાકાતથી એક તરફ કેરળના સાંસ્કૃતિક મુદ્દાઓ ગરમાયા છે, તો બીજી તરફ અવકાશ સુરક્ષાની જાહેરાતે પાડોશી દેશોની ઊંઘ હરામ કરી દીધી છે.