ઢાકા,તા.૨૩: બાંગ્‍લાદેશે ૨૦૨૬ ના ટી૨૦ વર્લ્‍ડ કપમાં ભાગ ન લેવાનો નિર્ણય લીધો છે. સુરક્ષા ચિતાઓને કારણે BCB (બાંગ્‍લાદેશ ક્રિકેટ બોર્ડ) એ ટીમને ભારત મોકલવાનો ઇનકાર કર્યો છે. યુવા અને રમતગમત સલાહકાર આસિફ નજરુલે એક પ્રેસ કોન્‍ફરન્‍સમાં જણાવ્‍યું હતું કે ભારતમાં સુરક્ષા પરિસ્‍થિતિ બદલાઈ નથી અને નિર્ણય સરકારનો છે. તેમણે ICC પર અન્‍યાયનો આરોપ પણ લગાવ્‍યો હતો, અને કહ્યું હતું કે વૈશ્વિક ક્રિકેટ બોર્ડે તેમની માંગણીઓને અવગણી છે.

BCB એ ICC ને બાંગ્‍લાદેશની ગ્રુપ મેચો શ્રીલંકામાં ખસેડવાની વિનંતી કરી હતી, કારણ કે આ ટુર્નામેન્‍ટ ભારત અને શ્રીલંકા દ્વારા સંયુક્‍ત રીતે યોજાઈ રહી છે. જોકે, ICC બોર્ડની બેઠકમાં આ પ્રસ્‍તાવને નકારી કાઢવામાં આવ્‍યો હતો, જેમાં કહેવામાં આવ્‍યું હતું કે ભારતમાં કોઈ સુરક્ષા ખતરો નથી. ICC એ BCB ને અલ્‍ટીમેટમ આપ્‍યું હતું કે જો તેઓ ભારત નહીં આવે, તો તેમની જગ્‍યાએ બીજી ટીમનો સમાવેશ કરવામાં આવશે. આ છતાં, બાંગ્‍લાદેશે પોતાનું વલણ બદલ્‍યું ન હતું અને કહ્યું હતું કે તેઓ વર્લ્‍ડ કપ રમવા માંગે છે, પરંતુ ભારતમાં નહીં. આનો અર્થ એ થયો કે તેઓએ ટુર્નામેન્‍ટમાંથી ખસી જવાનો નિર્ણય લીધો છે.

આ નિર્ણય માટે બાંગ્‍લાદેશ ક્રિકેટ બોર્ડને ભારે કિમત ચૂકવવી પડી શકે છે. અહેવાલો અનુસાર, તે ICC તરફથી તેના વાર્ષિક આવક હિસ્‍સામાંથી આશરે ૩.૨૫ અબજ બાંગ્‍લાદેશી ટાકા (આશરે US$27 મિલિયન અથવા ૨.૪ અબજ ભારતીય રૂપિયા) ગુમાવી શકે છે. વધુમાં, પ્રસારણ અધિકારો, સ્‍પોન્‍સરશિપ અને અન્‍ય કમાણીમાંથી કુલ નાણાકીય નુકસાન ચાલુ નાણાકીય વર્ષમાં ૬૦ ટકા કે તેથી વધુ થઈ શકે છે. ખેલાડીઓ મેચ ફી, બોનસ અને ઇનામી રકમથી પણ વંચિત રહેશે.

આ વિવાદ દ્વિપક્ષીય ક્રિકેટને પણ અસર કરી શકે છે. ભારત ઓગસ્‍ટ-સપ્‍ટેમ્‍બરમાં બાંગ્‍લાદેશનો પોતાનો પ્રવાસ રદ કરી શકે છે, કારણ કે ટીવી પ્રસારણ અધિકારોની દ્રષ્ટિએ આ શ્રેણી બાકીની ૧૦ દ્વિપક્ષીય મેચો જેટલી જ મહત્‍વપૂર્ણ માનવામાં આવે છે. આનાથી બાંગ્‍લાદેશ ક્રિકેટ બોર્ડને વધુ નુકસાન થઈ શકે છે. ટીમ ઇન્‍ડિયાનો પ્રવાસ ૨૦૨૫ માટે નક્કી કરવામાં આવ્‍યો હતો, પરંતુ BCCI એ તેને મુલતવી રાખ્‍યો હતો. પરંતુ આ મહિનાની શરૂઆતમાં, બાંગ્‍લાદેશ ક્રિકેટ બોર્ડે પ્રવાસનું સમયપત્રક જાહેર કર્યું, જે હવે મુશ્‍કેલીમાં મુકાયેલું દેખાય છે.