નવી દિલ્હી, તા. 20: ભારતીય જનતા પાર્ટીએ તેના નવા સુકાની તરીકે બિહારના દિગ્ગજ અને યુવા નેતા નીતિન નવીન પર પસંદગીનો કળશ ઢોળ્યો છે. નવી દિલ્હી સ્થિત ભાજપ મુખ્યાલય ખાતે યોજાયેલા ભવ્ય 'સંગઠન પર્વ' કાર્યક્રમમાં વડાપ્રધાન નરેન્દ્ર મોદીએ નીતિન નવીનને વિશ્વના સૌથી મોટા રાજકીય પક્ષના રાષ્ટ્રીય અધ્યક્ષ તરીકે અભિનંદન પાઠવ્યા હતા. PM મોદીએ વિશ્વાસ વ્યક્ત કર્યો હતો કે નીતિન નવીન પક્ષના સમૃદ્ધ વારસાને વધુ મજબૂતી સાથે આગળ ધપાવશે.
યુવા નેતૃત્વ અને અનુભવનો સમન્વય
વડાપ્રધાન મોદીએ પોતાના સંબોધનમાં જણાવ્યું હતું કે, નીતિન નવીન એ પેઢીના પ્રતિનિધિ છે જેમણે દેશમાં મોટા આર્થિક, સામાજિક અને તકનીકી પરિવર્તનો નજીકથી જોયા છે. તેમની પાસે યુવા ઊર્જાની સાથે સંગઠનાત્મક કાર્યનો બહોળો અનુભવ છે, જે પક્ષના પ્રત્યેક કાર્યકર માટે પ્રેરણારૂપ બનશે. વડાપ્રધાને ઉમેર્યું કે, "ભાજપમાં રાષ્ટ્રીય અધ્યક્ષ બદલાય છે, પરંતુ પક્ષના આદર્શો અને રાષ્ટ્રસેવાની ભાવના ક્યારેય બદલાતી નથી."
ઘૂસણખોરીના મુદ્દે આક્રમક તેવર
આ પ્રસંગે વડાપ્રધાને દેશની સુરક્ષા અંગે પણ વાત કરી હતી. તેમણે સ્પષ્ટ શબ્દોમાં કહ્યું કે ભારત ક્યારેય ઘૂસણખોરોને દેશની સંપત્તિ અને ગરીબોના હક લૂંટવા દેશે નહીં. ઘૂસણખોરોને દેશ માટે મોટો ખતરો ગણાવી તેમને પાછા મોકલવાની હિમાયત કરી હતી. સાથે જ, જે રાજકીય પક્ષો વોટબેંકની રાજનીતિ માટે ઘૂસણખોરોને બચાવે છે, તેમનો પર્દાફાશ કરવા કાર્યકરોને આહવાન કર્યું હતું.
ઐતિહાસિક પળ: બિહારના પ્રથમ નેતા જે બન્યા અધ્યક્ષ
કેન્દ્રીય મંત્રી અને પૂર્વ અધ્યક્ષ જેપી નડ્ડાએ પણ આ નિમણૂકને ઐતિહાસિક ગણાવી હતી. નીતિન નવીન માત્ર 31 વર્ષની વયે પાંચ વખત ધારાસભ્ય તરીકે સેવા આપી ચૂક્યા છે અને તેમની વૈચારિક પૃષ્ઠભૂમિ અત્યંત પરિપક્વ છે. તેઓ ભાજપના ઈતિહાસના સૌથી યુવા રાષ્ટ્રીય અધ્યક્ષ હોવાની સાથે બિહારના પ્રથમ એવા નેતા છે જેમને આ સર્વોચ્ચ પદની જવાબદારી સોંપવામાં આવી છે.
લોકશાહી પ્રક્રિયાનું ઉદાહરણ
PM મોદીએ ભાર મૂક્યો હતો કે છેલ્લા કેટલાક મહિનાઓથી સંગઠનના પાયાના સ્તરથી લઈને રાષ્ટ્રીય અધ્યક્ષ સુધીની ચૂંટણી પ્રક્રિયા સંપૂર્ણપણે લોકશાહી ઢબે હાથ ધરવામાં આવી છે. આ શિસ્તબદ્ધ પ્રક્રિયા ભાજપના 'કાર્યકર-કેન્દ્રિત' અભિગમનું જીવંત પ્રતીક છે.