નવી દિલ્હી: ઈરાનમાં ફાટી નીકળેલા વિરોધ પ્રદર્શનોને કારણે ત્યાં વસવાટ કરતા અને કામ અર્થે ગયેલા ભારતીયોમાં ચિંતાનો માહોલ સર્જાયો છે. ગઈકાલે અનેક ભારતીયો દિલ્હી પરત ફર્યા હતા, જેમણે ત્યાંની વર્તમાન સ્થિતિ અંગે અલગ-અલગ અનુભવો વર્ણવ્યા હતા.

ઈરાનમાં હાલમાં સરકાર વિરોધી દેખાવો ચાલી રહ્યા છે, જેના કારણે જનજીવન પર માઠી અસર પડી છે. ભારત પરત ફરેલા એક નાગરિકે જણાવ્યું હતું કે ત્યાં પરિસ્થિતિ ખૂબ જ ખરાબ છે અને સામાન્ય જીવન મુશ્કેલ બની ગયું છે. જોકે, અન્ય એક મુસાફરે થોડો અલગ મત વ્યક્ત કરતા કહ્યું હતું કે પરિસ્થિતિ સામાન્ય જણાતી હતી અને તેઓ સુરક્ષિત રીતે ઘરે પરત ફર્યા છે, પરંતુ ત્યાં નેટવર્ક અને ઈન્ટરનેટની ગંભીર સમસ્યાઓ હતી.

કામ અર્થે ગયેલા અન્ય એક ભારતીયે પોતાનો અનુભવ વર્ણવતા કહ્યું હતું કે તેઓ એક મહિના માટે ત્યાં ગયા હતા, પરંતુ છેલ્લા એક-બે અઠવાડિયાથી જ સમસ્યાઓનો અનુભવ થવા લાગ્યો હતો. જ્યારે પણ તેઓ બહાર નીકળતા ત્યારે વિરોધ પ્રદર્શનકારીઓ તેમની કારની સામે આવી જતા હતા અને રસ્તો રોકતા હતા. હાલમાં ભારતીયો સલામતીના કારણોસર વતન પરત ફરી રહ્યા છે.