મિનિયાપોલિસ : અમેરિકાના મિનિયાપોલિસમાં ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) એજન્ટ દ્વારા 37 વર્ષીય માતા રેની ગુડના જીવલેણ એન્કાઉન્ટરનો એક નવો અને ચોંકાવનારો વીડિયો સામે આવ્યો છે. આ વીડિયો ગોળીબાર કરનાર એજન્ટ જોનાથન રોસના પોતાના સેલફોનમાંથી જ લેવામાં આવ્યો હતો, જેણે હવે આ આખી ઘટના પર સવાલો ઉભા કરી દીધા છે. વીડિયોમાં ગોળી વાગ્યા પહેલા રેની ગુડના અંતિમ શબ્દો પણ કેદ થયા છે, જેમાં તે કહે છે, "હું તમારા પર ગુસ્સે નથી."
શું છે વીડિયોની હકીકત?
બુધવારે સવારે રહેણાંક વિસ્તારમાં જ્યારે ICE અધિકારીઓ કાર્યવાહી કરી રહ્યા હતા, ત્યારે રેની ગુડ પોતાની મરૂન SUV માં સવાર હતી. વીડિયોમાં દેખાય છે કે એજન્ટ રોસ કારની વિન્ડશિલ્ડની બિલકુલ સામે ઉભો રહે છે. જેવી રેની પોતાની કાર રિવર્સમાં લઈ આગળ વધારવાનો પ્રયાસ કરે છે, રોસ એક પછી એક ત્રણ રાઉન્ડ ફાયર કરે છે. પહેલી ગોળી વિન્ડશિલ્ડને વીંધીને અંદર જાય છે અને બીજી બે ગોળીઓ ડ્રાઇવર સાઇડની બારીમાંથી મારવામાં આવે છે.
રાજકીય આક્ષેપ-પ્રતિઆક્ષેપ
આ ઘટના બાદ અમેરિકાના રાજકારણમાં ભારે ઉથલપાથલ મચી છે. રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર પોસ્ટ કરીને એજન્ટનો બચાવ કર્યો અને કહ્યું કે, "રેનીએ એજન્ટ પર ગાડી ચઢાવવાનો પ્રયાસ કર્યો હતો, તેથી એજન્ટે સ્વ-બચાવમાં ગોળી ચલાવી." બીજી તરફ, મિનિયાપોલિસના મેયર જેકબ ફ્રેએ આ દાવાને સદંતર 'બકવાસ' ગણાવતા કહ્યું કે વીડિયો જોયા પછી સ્પષ્ટ થાય છે કે એજન્ટને જીવનું કોઈ જોખમ નહોતું.
તપાસના ઘેરામાં ICE એજન્ટો
વીડિયોના અંતમાં એક અત્યંત શરમજનક બાબત પણ બહાર આવી છે. રેનીની કાર ક્રેશ થાય તે પહેલા ઘટનાસ્થળે હાજર એક એજન્ટ તેને "કચરો કૂતરી" (Trashy bitch) કહીને ગાળ આપતો સંભળાય છે. હોમલેન્ડ સિક્યુરિટી વિભાગે બચાવ કરતા કહ્યું છે કે એજન્ટોએ પરિસ્થિતિને કાબૂમાં લેવા બળનો ઉપયોગ કર્યો હતો, કારણ કે રેની કાયદાના અમલીકરણમાં અવરોધ ઊભો કરી રહી હતી.
નિષ્ણાતોના સવાલો
ક્રિમિનોલોજીના પ્રોફેસર જ્યોફ્રી અલ્પર્ટે પ્રશ્ન ઉઠાવ્યો છે કે, એજન્ટ જાણીજોઈને ચાલતી કારની સામે કેમ ઉભો રહ્યો? શું તેણે જાણીજોઈને એવી સ્થિતિ ઉભી કરી જેથી તેને ગોળી ચલાવવાનું બહાનું મળે? બીજી તરફ, પોલીસ ફોર્સ નિષ્ણાતોનું કહેવું છે કે ગોળી ચલાવ્યા પછી એ સમજવામાં થોડી સેકન્ડ લાગે છે કે જોખમ ટળી ગયું છે, તેથી બીજી અને ત્રીજી ગોળી પણ ચાલી શકે છે.
હાલમાં આ ઘટનાના સ્થળે એરબેગ પર લોહીના ડાઘા અને ગોળીના નિશાનો સાથેની કારની તસવીરો સોશિયલ મીડિયા પર વાયરલ થઈ રહી છે, જે અમેરિકામાં પોલીસ અને ઇમિગ્રેશન એજન્ટોની સત્તાના દુરુપયોગ અંગેની ચર્ચાને ફરીથી જીવંત કરી રહી છે.