મુંબઈ : ટેલિવિઝન જગતનો સૌથી લોકપ્રિય ક્વિઝ રિયાલિટી શો 'કૌન બનેગા કરોડપતિ' (KBC) હવે તેની ૧૭મી સીઝનના અંતિમ પડાવ પર પહોંચી ગયો છે. વર્ષ ૨૦૨૫ના છેલ્લા દિવસે આ શોના ફિનાલે એપિસોડનું શૂટિંગ પૂર્ણ થયું હતું, જેમાં શોના હોસ્ટ અને બોલિવૂડના શહેનશાહ અમિતાભ બચ્ચન અત્યંત ભાવુક જોવા મળ્યા હતા. ચાહકો માટે આ એપિસોડ ખાસ બની રહેશે કારણ કે તેમાં બિગ બીનો એક અલગ જ અંદાજ જોવા મળશે.
ફિનાલે એપિસોડને યાદગાર બનાવવા માટે અમિતાભ બચ્ચને સ્ટેજ પર સતત ૩૨ મિનિટ સુધી ગીતો ગાઈને સૌને મંત્રમુગ્ધ કરી દીધા હતા. તેમણે પોતાની ફિલ્મોના એવરગ્રીન ગીતો જેવા કે ‘હોરી ખેલે રઘુવીરા’, ‘રંગ બરસે ભીગે ચુનરવાલી’, ‘ચલત મુસાફિર’ અને ‘મેરે અંગને મેં’ ગાઈને સેટ પર ઉત્સાહનું વાતાવરણ ભરી દીધું હતું. આ ગીતો ગાતી વખતે તેમની આંખોમાં શો પ્રત્યેનો લગાવ અને વિદાયની પળો સ્પષ્ટ દેખાતી હતી.
  KBCની આ સીઝનમાં અત્યાર સુધીમાં કુલ ૧૦૫ એપિસોડ પ્રસારિત કરવામાં આવ્યા છે. દર વર્ષની જેમ આ વખતે પણ શોએ જ્ઞાનની સાથે મનોરંજન પીરસવામાં કોઈ કમી રાખી નથી. સીઝનના છેલ્લા એપિસોડમાં અમિતાભ બચ્ચને કેટલાક પરંપરાગત લોકગીતો પણ ગાયા હતા, જે ચાહકો માટે એક સરપ્રાઈઝ સમાન છે.
: વર્ષોથી 'દેવીઓ ઔર સજ્જનો' કહીને કરોડો ભારતીયોના દિલ જીતનાર અમિતાભ બચ્ચન માટે આ શો માત્ર એક કામ નથી, પણ એક પરિવાર સમાન છે. શોના અંતે તેમણે દર્શકોનો આભાર માનતા કહ્યું હતું કે, ચાહકોનો પ્રેમ જ તેમને દર વર્ષે આ હોટ સીટ પર પાછા આવવાની શક્તિ આપે છે. સોશિયલ મીડિયા પર શૂટિંગના ફોટા વાયરલ થયા છે, જેમાં બિગ બીની આંખો ભીની જોવા મળી રહી છે. હવે ચાહકો આતુરતાથી ૨૦૨૬માં આ શોની નવી સીઝનની રાહ જોઈ રહ્યા છે.