અયોધ્યા, તા. ૧૫: શ્રી રામ જન્મભૂમિ આંદોલનના મુખ્ય નેતા અને ભારતીય જનતા પાર્ટી (BJP) ના ભૂતપૂર્વ સાંસદ ડૉ. રામ વિલાસ વેદાંતીજી મહારાજનું સોમવારે બપોરે અવસાન થયું છે. છેલ્લા કેટલાક સમયથી નાદુરસ્ત તબિયત બાદ તેઓ મધ્યપ્રદેશના રેવા ખાતેની સંજય ગાંધી મેમોરિયલ હોસ્પિટલમાં સારવાર લઈ રહ્યા હતા. તેમના નિધનથી ધર્મ અને રાજકારણના જગતમાં ઊંડા શોકની લાગણી પ્રસરી છે. ૬૭ વર્ષીય વેદાંતીજીના પાર્થિવ દેહને અયોધ્યા લાવવામાં આવી રહ્યો છે અને મંગળવારે સરયૂ નદીમાં જળ સમાધિ આપવામાં આવશે.
વેદાંતીજી બે દિવસથી રામ કથા માટે રેવા ગયા હતા, જ્યાં રવિવારે તેમને પેશાબની તકલીફ થતાં હોસ્પિટલમાં દાખલ કરવામાં આવ્યા હતા. તેમની ગંભીર સ્થિતિને જોતા મધ્યપ્રદેશના મુખ્યમંત્રી મોહન યાદવે તેમને તાત્કાલિક ભોપાલ એરલિફ્ટ કરવાની વ્યવસ્થા કરી હતી, પરંતુ ખરાબ વિઝિબિલિટીને કારણે વિમાન ઉતરાણ કરી શક્યું નહોતું અને તેમને પાછા રેવા લાવવા પડ્યા હતા.
તબિયત લથડતાં હૃદયરોગના બે હુમલા:
વેદાંતીજીને મધ્યરાત્રિએ પ્રથમ હૃદયરોગનો હુમલો આવ્યો હતો. સોમવારે સવારે ફરી બીજા હુમલાની જાણ થતાં ઉત્તર પ્રદેશના મુખ્યમંત્રી યોગી આદિત્યનાથે તાત્કાલિક હોસ્પિટલ મેનેજમેન્ટનો સંપર્ક કર્યો અને તેમને દિલ્હીની મેદાંતા હોસ્પિટલમાં એરલિફ્ટ કરવાની તૈયારી શરૂ કરવામાં આવી. જોકે, ખરાબ હવામાન અને તેમની વધઘટ થતી તબિયતને કારણે ડોક્ટરોએ એરલિફ્ટની પરવાનગી આપવાનો ઇનકાર કર્યો હતો. મેદાંતાના ડોક્ટરો સાથે ચર્ચા કરીને તેમની તબિયત સ્થિર થયા બાદ મોકલવાનું નક્કી થયું, પરંતુ બપોરે ૧૨:૩૦ વાગ્યે તેમણે અંતિમ શ્વાસ લીધા હતા.
સીએમ યોગીએ ગણાવ્યું 'યુગનો અંત':
મુખ્યમંત્રી યોગી આદિત્યનાથે તેમના નિધન પર ઊંડો શોક વ્યક્ત કરતા કહ્યું કે, "શ્રી રામ જન્મભૂમિ ચળવળના અગ્રણી સ્તંભ, પૂર્વ સાંસદ અને શ્રી અયોધ્યા ધામમાં વશિષ્ઠ આશ્રમના આદરણીય સંત ડૉ. રામવિલાસ વેદાંતીજી મહારાજનું નિધન આધ્યાત્મિક જગત અને સનાતન સંસ્કૃતિ માટે એક અપૂર્ણ નુકસાન છે. તેમનું નિધન એક યુગનો અંત દર્શાવે છે." તેમણે વેદાંતીજીના ધર્મ, સમાજ અને રાષ્ટ્રની સેવા માટેના સમર્પિત જીવનને પ્રેરણાદાયી ગણાવ્યું હતું.