૧૨ સપ્ટેમ્બર, ૨૦૨૫: ભારત અને અમેરિકા વચ્ચેના સંબંધોમાં તાજેતરમાં જોવા મળેલી તણાવપૂર્ણ સ્થિતિ પરથી પડદો ઊંચકાયો છે. એક તરફ વડાપ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ વચ્ચે ગાઢ મિત્રતા છે, ત્યારે બીજી તરફ બંને દેશો વેપાર યુદ્ધમાં ફસાયેલા જોવા મળ્યા. હવે ભૂતપૂર્વ યુએસ રાષ્ટ્રીય સુરક્ષા સલાહકાર જોન બોલ્ટને એક ચોંકાવનારો દાવો કર્યો છે કે આ કડવાશ માટે ટ્રમ્પના જ એક સલાહકાર જવાબદાર છે.

બોલ્ટનના કહેવા પ્રમાણે, ટ્રમ્પના વેપાર સલાહકાર પીટર નવારો એ મોદી અને ટ્રમ્પની મિત્રતામાં ઝેર ફેલાવવાનો પ્રયાસ કર્યો હતો. બોલ્ટને એક ઇન્ટરવ્યુમાં જણાવ્યું કે નવારોના કારણે વેપારના મુદ્દાઓ પર અર્થહીન વિવાદ ઊભો થયો. બોલ્ટને નવારોને આડકતરી રીતે એક બાજુનો શો ગણાવતા કટાક્ષ કર્યો કે, "જો તમે પીટરને એક રૂમમાં એકલો છોડી દો અને એક કલાક પછી પાછા ફરો, તો તે પોતાની જાત સાથે દલીલ કરશે."

આ તણાવનું મુખ્ય કારણ ટ્રમ્પ પ્રશાસન દ્વારા ભારત પર રશિયન તેલની ખરીદીના મુદ્દે લાદવામાં આવેલી ૫૦% ટેરિફ છે. નવારોએ આ ટેરિફના સમર્થનમાં ભારતને "ટેરિફ મહારાજા" અને રશિયા પાસેથી ખરીદાયેલા તેલને "બ્લડ મની" ગણાવ્યું હતું. બોલ્ટને ભારપૂર્વક કહ્યું કે, આ નાની વેપારી ફરિયાદો કરતાં પણ આ સદીમાં ભારત અને અમેરિકા માટે ચીન જેવા મોટા પડકારોનો સામનો કરવો વધુ મહત્ત્વપૂર્ણ છે.

બોલ્ટને સ્વીકાર્યું કે ટ્રમ્પ આંતરરાષ્ટ્રીય સંબંધોને વ્યક્તિગત સંબંધોના માધ્યમથી જુએ છે, પરંતુ તેમણે ચેતવણી આપી કે ફક્ત વ્યક્તિગત સંબંધો કંઈપણ ખોટું થતું અટકાવી શકતા નથી. તેમણે ભારતને સલાહ આપી કે ચીન જેવી વાસ્તવિકતા પર ધ્યાન કેન્દ્રિત કરે અને આવા મુદ્દાઓનો ગુપ્ત રીતે ઉકેલ લાવે. વિશ્લેષકો પણ માને છે કે ટ્રમ્પની આ આક્રમક નીતિઓ ભારતને રશિયા અને ચીનની વધુ નજીક ધકેલી રહી છે.