નવી દિલ્હી: વડાપ્રધાન નરેન્દ્ર મોદીએ આજે 'મન કી બાત' કાર્યક્રમના 121મા એપિસોડમાં પહેલગામમાં થયેલા આતંકવાદી હુમલાનો ઉલ્લેખ કર્યો હતો, જેમાં 26 નિર્દોષ પ્રવાસીઓએ જીવ ગુમાવ્યા હતા. તેમણે આ હુમલાને જઘન્ય ગણાવ્યો હતો અને પીડિત પરિવારો પ્રત્યે સંવેદના વ્યક્ત કરી હતી. વડાપ્રધાને ખાતરી આપી હતી કે આ હુમલાના પીડિતોને ચોક્કસ ન્યાય મળશે.
વડાપ્રધાન મોદીએ 'મન કી બાત' કાર્યક્રમમાં કહ્યું હતું કે, "પહેલગામ હુમલામાં 26 નિર્દોષ લોકોના મોતથી મને ખૂબ જ પીડા થઈ છે. આ હુમલાથી દેશભરમાં આક્રોશ ફેલાયો છે અને સમગ્ર વિશ્વએ આ જઘન્ય કૃત્યની સખત નિંદા કરી છે. આતંકવાદ સામેની લડાઈમાં સમગ્ર વિશ્વ 140 કરોડ ભારતીયો સાથે ઉભું છે." તેમણે વધુમાં કહ્યું હતું કે, "અમારી સરકાર આતંકવાદ સામેની લડાઈમાં પ્રતિબદ્ધ છે અને અમે પીડિત પરિવારોને ન્યાય અપાવવા માટે તમામ શક્ય પ્રયાસો કરીશું."
વડાપ્રધાન મોદીએ આ હુમલામાં જીવ ગુમાવનારા પ્રવાસીઓના પરિવારો પ્રત્યે સંવેદના વ્યક્ત કરી હતી અને કહ્યું હતું કે આ દુઃખની ઘડીમાં સમગ્ર દેશ તેમની સાથે છે. તેમણે સુરક્ષા દળોના પ્રયાસોની પણ પ્રશંસા કરી હતી અને કહ્યું હતું કે તેઓ આતંકવાદ સામેની લડાઈમાં સતત કાર્યરત છે.