મહારાષ્ટ્રના છત્રપતિ સંભાજીનગર એરપોર્ટ પર ઈન્ડિગો એરલાઈન્સના વિમાનમાં એક મહિલાનું મોત થતાં તેનું ઈમરજન્સી લેન્ડિંગ કરવું પડ્યું. વિમાનમાં સવાર 89 વર્ષીય મહિલાનું મોત નીપજ્યું હતું, જેના પછી ઇમરજન્સી લેન્ડિંગ કરવું પડ્યું હતું.  એરપોર્ટના એક અધિકારીએ આ માહિતી આપી. તેમણે જણાવ્યું હતું કે રવિવારે રાત્રે મુંબઈ-વારાણસી ફ્લાઇટનું ચિકલથાણા એરપોર્ટ પર ઇમરજન્સી લેન્ડિંગ કરવામાં આવ્યું હતું.

અધિકારીએ જણાવ્યું હતું કે ઉત્તર પ્રદેશના મિર્ઝાપુરની વતની સુશીલા દેવી મુંબઈથી ફ્લાઇટમાં ચઢી હતી અને ફ્લાઇટ દરમિયાન જ તેને અસ્વસ્થતા અનુભવવા લાગી હતી. તેમણે જણાવ્યું હતું કે તબીબી કટોકટીને કારણે વિમાન રાત્રે લગભગ 10 વાગ્યે ચિકલથાણા એરપોર્ટ પર ઉતર્યું હતું. લેન્ડિંગ સમયે મેડિકલ ટીમે મહિલાની તપાસ કરી હતી, પરંતુ ત્યાં સુધીમાં તેનું મૃત્યુ થઈ ગયું હતું.

અધિકારીએ જણાવ્યું કે, MIDC સિડકો પોલીસ સ્ટેશનમાં જરૂરી ઔપચારિકતાઓ પૂર્ણ કરવામાં આવી હતી અને વિમાન વારાણસી જવા માટે રવાના થયું હતું. એરલાઇનના જણાવ્યા અનુસાર, મહિલાના મૃતદેહને છત્રપતિ સંભાજીનગર સ્થિત સરકારી મેડિકલ કોલેજ અને હોસ્પિટલમાં મોકલવામાં આવ્યો હતો.