છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
‘‘વસ્તુઓને સુધારવા માટે દવા આપવી પડે'' વિરોધ છતાં ટ્રમ્પે પીછેહઠ કરવાનો ઇનકાર કર્યો
ટ્રમ્પે કહ્યું , મેં યુરોપ, એશિયા અને વિશ્વભરના ઘણા નેતાઓ સાથે વાત કરી છે. તેઓ અમારી સાથે સોદો કરવા માંગે છે પરંતુ અમે હવે વેપાર ખાધ સહન કરીશું નહીં અને અમે તેમને આ સ્પષ્ટપણે કહી દીધું છે
વોશિંગ્ટન તા.૭: રાષ્ટ્રપતિ ટ્રમ્પે ટેરિફ લાદવાના પોતાના નિર્ણયને પાછો ખેંચવાનો સ્પષ્ટ ઇનકાર કરી દીધો છે. ઉલ્લેખનીય છે કે ટ્રમ્પ દ્વારા ટેરિફ લાદવામાં આવ્યા બાદ વિશ્વભરના બજારોમાં અસ્થિરતાનું વાતાવરણ છે અને દેશમાં પણ તેમના વિરોધ પ્રદર્શન શરૂ થઈ ગયા છે. જોકે, ટ્રમ્પે પોતાના નિર્ણયથી પાછળ હટવાનો ઇનકાર કર્યો છે અને કહ્યું છે કે કેટલીકવાર વસ્તુઓને ઠીક કરવા માટે દવાની જરૂર પડે છે.
ઘણા દેશો અમારી સાથે કરાર કરવા માંગે છે
પોતાના સત્તાવાર વિમાન એરફોર્સ વનમાં મીડિયા સાથે વાત કરતા ટ્રમ્પે કહ્યું કે તેઓ નથી ઇચ્છતા કે વિશ્વભરના બજારો ઘટે, પરંતુ મને તેની ચિંતા નથી. કયારેક તમારે પરિસ્થિતિ સુધારવા માટે દવા લેવી પડે છે. દરમિયાન, ટ્રમ્પ વહીવટીતંત્રના અધિકારીઓ કહે છે કે ટેરિફની અસરો દેખાવા લાગી છે અને ૫૦ થી વધુ દેશોના પ્રતિનિધિઓએ વાટાઘાટો કરવાની ઇચ્છા વ્યક્ત કરી છે. ટ્રમ્પે કહ્યું, મેં યુરોપ, એશિયા અને વિશ્વભરના ઘણા નેતાઓ સાથે વાત કરી છે. તેઓ અમારી સાથે સોદો કરવા માંગે છે પરંતુ અમે હવે વેપાર ખાધ સહન કરીશું નહીં અને અમે તેમને આ સ્પષ્ટપણે કહી દીધું છે.
ટ્રમ્પ દ્વારા વિવિધ દેશો પર લાદવામાં આવેલ ટેરિફ ૯ એપ્રિલથી અમલમાં આવશે. અર્થશાષાીઓનું કહેવું છે કે ટેરિફ લાદવાથી એક નવા આર્થિક યુગની શરૂઆત થઈ શકે છે. અમેરિકાના નાણામંત્રી સ્કોટ બેસન્ટે કહ્યું કે અન્યાયી રીતે વ્યવસાય કરવો યોગ્ય નથી અને અમે જોઈશું કે વિવિધ દેશો અમને શું ઓફર કરે છે અને પછી અમે આગળનો નિર્ણય લઈશું. તેમણે કહ્યું કે કોઈ મંદી નહીં આવે. બજાર એક કે બે દિવસ માટે ટેરિફ પર પ્રતિક્રિયા આપશે, પરંતુ અમારો પ્રયાસ લાંબા ગાળાના આર્થિક સંબંધો બનાવવાનો છે. ટ્રમ્પ ટેરિફના મુદ્દા પર વિરોધથી પણ વાકેફ છે. રવિવારે સોશિયલ મીડિયા પર શેર કરેલી પોસ્ટમાં તેમણે લખ્યું, આપણે જીતીશું, પણ ત્યાં સુધી હિંમત રાખો આ બિલકુલ સરળ નહીં હોય. ટ્રમ્પે તેમના કેબિનેટ અધિકારીઓને ટેરિફ લાદવાના સરકારના નિર્ણયનો બચાવ કરવા અને વૈશ્વિક અર્થતંત્ર પર તેની ગંભીર અસર પડશે તેવા દાવાઓને નકારી કાઢવાનો નિર્દેશ પણ આપ્યો છે.
ટ્રમ્પે અમેરિકાના સાથી દેશો પર પણ ટેરિફ લાદ્યા છે, જેમાં ઇઝરાયલ પર ૧૭ ટકા ટેરિફનો પણ સમાવેશ થાય છે. સોમવારે, ઇઝરાયલી પીએમ બેન્જામિન નેતન્યાહૂ વ્હાઇટ હાઉસ ખાતે રાષ્ટ્રપતિ ટ્રમ્પને મળશે. એવું માનવામાં આવે છે કે ગાઝા યુદ્ધ ઉપરાંત, બંને દેશો વચ્ચે ટેરિફ અંગે પણ વાતચીત થઈ શકે છે. ટ્રમ્પે વિયેતનામ પર પણ ભારે ટેરિફ લાદી છે. મીડિયા રિપોર્ટ્સ અનુસાર, હવે વિયેતનામ સરકારે પણ અમેરિકા સાથે તેના ટેરિફ ઘટાડવા અંગે વાટાઘાટો કરવાની ઓફર કરી છે. ઇટાલીના પીએમ ગિઓર્ડાનો મેલોનીએ યુએસ ટેરિફ પર નારાજગી વ્યક્ત કરી હતી, પરંતુ કહ્યું હતું કે તેઓ આ મુદ્દા પર યુએસ સરકાર સાથે વાટાઘાટો કરવા તૈયાર છે.(૩૮.૯)
(10:32 AM IST)
