નવી દિલ્હી તા.૧૭ : ભારતના મુખ્ય ન્યાયાધીશ સંજીવ ખન્નાએ કોલકાતા હાઇકોર્ટના ન્યાયાધીશ જોયમાલા બાગચીને સુપ્રીમ કોર્ટના ન્યાયાધીશ તરીકે શપથ લેવડાવ્યા. સુપ્રીમ કોર્ટના પરિસરમાં આયોજિત એક સમારોહમાં જસ્ટિસ બાગચીને શપથ ગ્રહણ કરાવ્યા. આ કાર્યક્રમમાં સુપ્રીમ કોર્ટના અન્ય ન્યાયાધીશો પણ હાજર રહ્યા હતા. જસ્ટિસ બાગચી સુપ્રીમ કોર્ટના જજ બન્યા બાદ, હવે સુપ્રીમ કોર્ટમાં 33 ન્યાયાધીશો છે. સુપ્રીમ કોર્ટમાં ન્યાયાધીશોની મંજૂર સંખ્યા 34 છે. હાલમાં એક પદ ખાલી છે. તમને જણાવી દઈએ કે, જસ્ટિસ બાગચીનો કાર્યકાળ 6 વર્ષથી વધુનો રહેશે. આ સમયગાળા દરમિયાન તેઓ CJIનો કાર્યભાર પણ સંભાળશે.

પાંચ મહિના સુધી CJI પદ સંભાળશે.

જસ્ટિસ કે.વી. વિશ્વનાથન પછી જસ્ટિસ જોયમાલા બાગચી CJI તરીકેનો કાર્યભાર સંભાળશે. જસ્ટિસ કે.વી. વિશ્વનાથન 25 મે, 2031 ના રોજ નિવૃત્તિ સુધી ભારતના મુખ્ય ન્યાયાધીશનું પદ સંભાળશે.

કેન્દ્રએ 10 માર્ચે મંજૂરી આપી હતી

10 માર્ચે, કેન્દ્ર સરકારે સુપ્રીમ કોર્ટના ન્યાયાધીશ તરીકે જસ્ટિસ બાગચીની નિમણૂકને મંજૂરી આપી હતી. અગાઉ, મુખ્ય ન્યાયાધીશ સંજીવ ખન્નાના નેતૃત્વ હેઠળના પાંચ સભ્યોના કોલેજિયમે 6 માર્ચે તેમના નામની ભલામણ કરી હતી. આ કોલેજિયમમાં જસ્ટિસ બીઆર ગવઈ, જસ્ટિસ સૂર્યકાંત, જસ્ટિસ અભય એસ ઓકા અને જસ્ટિસ વિક્રમ નાથનો સમાવેશ થતો હતો.

કોલેજિયમે શું કહ્યું?

કોલેજિયમે કહ્યું હતું કે 18 જુલાઈ, 2013ના રોજ જસ્ટિસ અલ્તમસ કબીરની નિવૃત્તિ પછી, કલકત્તા હાઈકોર્ટના કોઈપણ ન્યાયાધીશ ભારતના મુખ્ય ન્યાયાધીશ બન્યા નથી. જસ્ટિસ બાગચીને 27 જૂન 2011 ના રોજ કલકત્તા હાઈકોર્ટના ન્યાયાધીશ તરીકે નિયુક્ત કરવામાં આવ્યા હતા. 4 જાન્યુઆરી 2021ના રોજ, તેમની બદલી આંધ્ર પ્રદેશ હાઈકોર્ટમાં થઈ.

13 વર્ષથી વધુ સમય માટે કલકત્તામાં કામ કર્યું

જસ્ટિસ બાગચીને 8 નવેમ્બર, 2021ના રોજ કલકત્તા હાઈકોર્ટમાં પાછા મોકલવામાં આવ્યા હતા અને ત્યારથી તેઓ ત્યાં કાર્યરત હતા. તેમણે 13 વર્ષથી વધુ સમયથી હાઈકોર્ટના ન્યાયાધીશ તરીકે સેવા આપી છે.