નવી દિલ્હી :વડાપ્રધાન મોદી 12 ફેબ્રુઆરીથી બે દિવસીય અમેરિકાના પ્રવાસે જશે. પીએમ મોદીના ત્રીજા કાર્યકાળનો આ બીજો યુએસ પ્રવાસ છે. જો કે વડાપ્રધાન તરીકે તેઓ 10મી વખત અમેરિકા જશે.

અમેરિકા પહેલા પીએમ મોદી બે દિવસ માટે ફ્રાન્સ પણ જશે. તે 10 ફેબ્રુઆરીની સાંજે પેરિસ પહોંચશે અને એલિસી પેલેસમાં આયોજિત ડિનરમાં હાજરી આપશે. બીજા દિવસે 11 ફેબ્રુઆરીએ તેઓ AI એક્શન સમિટની ત્રીજી આવૃત્તિની સહ-અધ્યક્ષતા કરશે.

પીએમ મોદીની ફ્રાન્સ કરતાં અમેરિકા મુલાકાતની વધુ ચર્ચા છે. તેનાથી ભારતને કેટલો ફાયદો થશે, ચાલો જાણીએ વિગતવાર…
ડોનાલ્ડ ટ્રમ્પે 20 જાન્યુઆરીએ બીજી વખત અમેરિકાના રાષ્ટ્રપતિ તરીકે શપથ લીધા હતા. ટ્રમ્પના બીજા કાર્યકાળ દરમિયાન અમેરિકા પહોંચનારા મોદી બીજા રાજ્યના વડા હશે. સૌથી પહેલા ઈઝરાયેલના વડાપ્રધાન બેન્જામિન નેતન્યાહુ અમેરિકા પહોંચ્યા. આ અઠવાડિયે જાપાનના વડાપ્રધાન શિગેરુ ઈશિબાની મુલાકાત પણ પ્રસ્તાવિત છે.પીએમ મોદીએ ટ્રમ્પના શપથ ગ્રહણમાં હાજરી આપી ન હતી. આ અંગે વિપક્ષે પીએમ પર પ્રહારો કર્યા હતા. જોકે, બાદમાં ડોનાલ્ડ ટ્રમ્પે ખુદ પીએમ મોદી સાથે ફોન પર વાત કરી અને તેમને અમેરિકા આવવાનું આમંત્રણ આપ્યું. આ દર્શાવે છે કે કૂટનીતિની દુનિયામાં ભારતનો કેટલો પ્રભાવ છે.

પીએમ  મોદી એવા ભારતીય વડાપ્રધાન છે જેઓ સૌથી વધુ વખત અમેરિકાની મુલાકાતે ગયા છે. છેલ્લા 11 વર્ષમાં પીએમ મોદીની આ 10મી અમેરિકા મુલાકાત હશે. તેમના પહેલા ડૉ. મનમોહન સિંહ સૌથી વધુ 8 વખત અમેરિકા ગયા હતા. આ સિવાય જવાહરલાલ નેહરુ અને અટલ બિહારી વાજપેયી 4-4 વખત, ઈન્દિરા ગાંધી અને રાજીવ ગાંધીએ 3-3 વખત, પીવી નરસિમ્હા રાવ 2 વાર, મોરારજી દેસાઈ અને ઈન્દર કુમાર ગુજરાલ 1-1 વખત અમેરિકા ગયા છે.

જવાહરલાલ નેહરુ અને ઈન્દિરા ગાંધી પછી મોદી ત્રીજા ભારતીય PM હશે જેમનું સ્વાગત ત્રણ અલગ-અલગ અમેરિકી રાષ્ટ્રપતિ દ્વારા મુલાકાતો પર કરવામાં આવશે.

અમેરિકા માટે ભારત કેટલું મહત્વનું છે?

ભારતે તાજેતરના ભૂતકાળમાં તેની રાજદ્વારી છબી બદલી છે. આ જ કારણ છે કે માત્ર અમેરિકા માટે જ નહીં પરંતુ વિશ્વના દરેક દેશ માટે ભારતનું મહત્વ વધી ગયું છે. ભારત તેના 11 ટકા હથિયારો અમેરિકાથી આયાત કરે છે. અમેરિકાએ ભારતને અપાચે અને ચિનૂક જેવા હેલિકોપ્ટર આપ્યા.

પીએમ મોદીએ અમેરિકી સંસદને બે વખત સંબોધન કર્યું છે. જૂન 2023માં તત્કાલિન યુએસ રાષ્ટ્રપતિ જો બાઇડેને તેમને સ્ટેટ વિઝિટ અંતર્ગત આમંત્રણ આપ્યું હતું. આ પહેલા પૂર્વ વડાપ્રધાન ડૉ.મનમોહન સિંહ અને પૂર્વ રાષ્ટ્રપતિ ડૉ. સર્વપલ્લી રાધાકૃષ્ણનને પણ અમેરિકાએ સ્ટેટ વિઝિટ અંતર્ગત આમંત્રણ આપ્યું હતું.

મેડિસન સ્ક્વેર ખાતે આયોજિત હાઉડી મોદી કાર્યક્રમ અમેરિકામાં પીએમ મોદીની લોકપ્રિયતા પણ દર્શાવે છે. અમેરિકાની સાથે ભારત પણ ક્વાડનું સભ્ય છે. સપ્ટેમ્બર 2014માં પીએમ મોદી પણ બરાક ઓબામાના કાર્યકાળ દરમિયાન ઉદ્યોગપતિઓને ભારતમાં રોકાણ કરવા આમંત્રણ આપવા ગયા હતા.

ડોનાલ્ડ ટ્રમ્પ સાથે પીએમ મોદીની આ આઠમી મુલાકાત હશે. આર્જેન્ટિના અને જાપાનમાં આયોજિત G20 સમિટ અને ફ્રાન્સમાં યોજાયેલી G7 દેશોની સમિટ સહિત બંને નેતાઓ 7 વખત મળ્યા છે. ટ્રમ્પના ભારત પ્રવાસ દરમિયાન અમદાવાદના મોટેરા સ્ટેડિયમમાં 'નમસ્તે ટ્રમ્પ' કાર્યક્રમનું પણ આયોજન કરવામાં આવ્યું હતું.

તાજેતરમાં યુએસએ ગેરકાયદેસર રીતે યુએસમાં પ્રવેશવાનો પ્રયાસ કરતા પકડાયેલા 104 ભારતીય ઇમિગ્રન્ટ્સને દેશનિકાલ કર્યા હતા. તેઓને હાથકડી અને બેડીઓમાં ભારત લાવવામાં આવ્યા હતા. પરંતુ અમેરિકાના આ સ્ટેન્ડનો ભારતે વિરોધ કર્યો ન હતો.

માનવામાં આવે છે કે પીએમ મોદીના અમેરિકા પ્રવાસ પહેલા ભારત કોઈપણ પ્રકારની ટિપ્પણી કરીને તણાવ પેદા કરવા માગતું ન હતું. પીએમ મોદી ટ્રમ્પ સાથેની મુલાકાતમાં આ ઇમિગ્રન્ટ્સનો મુદ્દો ઉઠાવી શકે છે. આ સિવાય બંને નેતાઓ વચ્ચે અમેરિકા સાથે વેપાર અને ભારતમાં રોકાણને લઈને પણ ચર્ચા થઈ શકે છે.