સ્વિસ બેંકોમાં અદાણીના રૂ.૨૬૦૦ કરોડ જપ્ત
હિંડનબર્ગે અદાણી ગ્રુપ સામે ફોડયો વધુ એક કોર્પોરેટ બોંબ : મની લોન્ડ્રીંગ - છેતરપીંડીની તપાસ હેઠળ કાર્યવાહી થયાનો દાવો : અદાણી ગ્રુપે દાવાઓ ફગાવ્યા
નવી દિલ્હી, તા.૧૩: હિંડનબર્ગ રિસર્ચ અદાણી ગ્રુપ પાછળ આદુ ખાઈને પડી ગઈ હોય તેવું લાગે છે. આ અમેરિકન કંપનીએ અદાણી પર વધુ એક બોમ્બ ફેંકયો છે. હિન્ડેનબર્ગે દાવો કર્યો છે કે સ્વિસ સત્તાવાળાઓએ અદાણીના મની લોન્ડરિંગ અને છેતરપિંડીની તપાસના ભાગરૂપે અનેક બેંક ખાતાઓમાં જમા કરાયેલા $310 મિલિયન (આશરે રૂ.૨૬૦૦ કરોડ) થી વધુને ફ્રીઝ કરી દીધા છે. આ તપાસ ૨૦૨૧થી ચાલી રહી છે.
અમેરિકન શોર્ટ સેલર ફર્મ હિંડનબર્ગ રિસર્ચે ફરી એકવાર અદાણી ગ્રુપ પર હુમલો કર્યો છે. હવે સ્વિસ મીડિયા આઉટલેટ ગોથમ સિટીના એક સમાચારને ટાંકીને કહ્યું છે કે અદાણી ગ્રુપની તપાસના ભાગરૂપે સ્વિસ સત્તાવાળાઓએ કેટલાંક સ્વિસ બેંક ખાતાઓમાં $૩૧૦ મિલિયન એટલે કે લગભગ રૂ. ૨૬૦૦ કરોડથી વધુના ફંડને ફ્રીઝ કરી દીધું છે. હિન્ડેનબર્ગે ૧૨ સપ્ટેમ્બર, ૨૦૨૪ના રોજ X પરની એક પોસ્ટમાં આ આરોપ લગાવ્યો હતો. સ્વિસ સત્તાવાળાઓ ૨૦૨૧ થી મની લોન્ડરિંગ અને સિકયોરિટીઝ છેતરપિંડી માટે અદાણી જૂથની તપાસ કરી રહ્યા છે.
આરોપોને બકવાસ, અતાર્કિક અને વાહિયાતૅ ગણાવતા અદાણી ગ્રૂપના પ્રવક્તાએ જણાવ્યું હતું કે, અદાણી ગ્રૂપની કોઈપણ સ્વિસ કોર્ટની કાર્યવાહીમાં કોઈ સંડોવણી નથી, કે અમારી કંપનીના કોઈપણ ખાતાઓ કોઈ સત્તા દ્વારા જપ્ત કરવામાં આવ્યા નથી.
નિવેદનમાં કહેવામાં આવ્યું છે કે, અમને એ કહેવામાં કોઈ ખચકાટ નથી કે અમારા ગ્રુપની પ્રતિષ્ઠા અને બજાર મૂલ્યને ન ઉલટાવી શકાય તેવું નુકસાન પહોંચાડવા માટે એકસાથે કામ કરી રહેલા સમાન જૂથ દ્વારા આ બીજો વ્યવસ્થિત અને ગંભીર પ્રયાસ છે.
તેમણે કહ્યું, ઉક્ત આદેશમાં પણ, સ્વિસ કોર્ટે ન તો અમારી જૂથ કંપનીઓનો ઉલ્લેખ કર્યો છે અને ન તો અમને આવી કોઈ સત્તા અથવા નિયમનકારી સંસ્થા પાસેથી સ્પષ્ટતા અથવા માહિતી માટે કોઈ વિનંતી મળી છે. અમે પુનરોચ્ચાર કરીએ છીએ કે અમારું વિદેશી હોલ્ડિંગ માળખું પારદર્શક, સંપૂર્ણ રીતે જાહેર અને તમામ સંબંધિત કાયદાઓનું પાલન કરેલું છે.
હિન્ડેનબર્ગે સમાચારને ટાંકીને જણાવ્યું હતું કે અદાણીનું પ્રતિનિધિત્વ કરતા ફ્રન્ટમેને બ્રિટિશ વર્જિન ટાપુઓ/મોરિશિયસ અને બર્મુડા સ્થિત અપારદર્શક ફંડ્સમાં રોકાણ કર્યું હતું, જે તમામ અદાણીના શેરો લગભગ વિશિષ્ટ રીતે ધરાવે છે. અહેવાલમાં વધુમાં જણાવાયું છે કે ફ્રન્ટમેન પાસે છ સ્વિસ બેંકોમાં $૩૧૦ મિલિયનથી વધુ રોકાયેલા હતા, જે તમામ હવે ફ્રીઝ કરવામાં આવ્યા છે.
અદાણી-હિંડનબર્ગ વિવાદ સમાપ્ત થવા જઈ રહ્યો હતો, તેવામાં ઓગસ્ટમાં નવા આરોપોએ એપિસોડને ફરીથી જાગળત કર્યો. ૨૦૨૩ની શરૂઆતમાં શોર્ટ સેલર્સે અદાણી ગ્રુપ પર ટેક્સ હેવન દ્વારા બજારના નિયમોનો ભંગ કરવાનો આરોપ લગાવ્યો હતો. હિન્ડેનબર્ગ રિસર્ચે બજાર નિયમનકાર સેબીના ચેરપર્સન માધાબી પુરી બૂચ અને તેમના પતિ ધવલ બુચ પર અદાણી જૂથ સાથેના સંબંધો ધરાવતા ઑફશોર ફંડમાં રોકાણ કરવાનો આરોપ મૂકયો છે.
હિન્ડેનબર્ગ રિસર્ચ શોર્ટ શેર્સનું વેચાણ કરે છે. આનો અર્થ એ છે કે તે તે શેર લે છે અને તેમની કિંમતમાં ઘટાડો થવાની અપેક્ષા રાખે છે. જ્યારે શેરની કિંમત ઘટે છે, ત્યારે હિન્ડેનબર્ગ રિસર્ચ તેમને નીચા ભાવે પાછા ખરીદે છે અને નફો કરે છે. અદાણી સાથેના વિવાદને કારણે તે ઘણી હેડલાઈન્સ બની છે.
(10:03 AM IST)
છેલ્લા 8 દિવસમાં સૌથી લોકપ્રિય 
