નવી દિલ્હી : દિલ્હીમાંથી બાળકોની સુરક્ષાને લઈને એક અત્યંત શરમજનક અને હચમચાવી દેતી ઘટના સામે આવી છે. દિલ્હીના જાફરાબાદ વિસ્તારમાં આવેલી એક ખાનગી પ્લે-સ્કૂલ અને ડેકેર સેન્ટરમાં ૩ વર્ષના માસૂમ બાળક સાથે કથિત દુર્વ્યવહાર અને મારપીટનો મામલો સામે આવતા રાજકીય અને સામાજિક સ્તરે ભારે રોષ ફેલાયો છે. આ ઘટનાની ગંભીરતાને ધ્યાનમાં લેતા દિલ્હીના મુખ્યમંત્રી રેખા ગુપ્તાએ તાત્કાલિક ધોરણે કડક કાર્યવાહીના આદેશ આપ્યા છે અને દોષિતોને છોડવામાં નહીં આવે તેવી સ્પષ્ટ ચેતવણી આપી છે.

મુખ્યમંત્રી રેખા ગુપ્તાએ સંબંધિત અધિકારીઓને તાત્કાલિક અસરથી સંડોવાયેલી પ્લે-સ્કૂલ અને ડેકેરને સીલ કરી દેવાનો નિર્દેશ આપ્યો છે. આ સાથે જ બેદરકારી દાખવનાર શાળાના મેનેજમેન્ટ અને જવાબદાર અધિકારીઓ સામે પણ ફોજદારી પગલાં લેવામાં આવશે તેમ જણાવ્યું હતું. સરકારે પીડિત બાળકના પરિવારને તમામ પ્રકારે કાનૂની સહાય પૂરી પાડવાની પણ ખાતરી આપી છે. દિલ્હી પોલીસે આ મામલે સીસીટીવી (CCTV) ફૂટેજના આધારે સ્કૂલમાં કામ કરતી એક મહિલા એટેન્ડન્ટની ધરપકડ કરી લીધી છે, જ્યારે અન્ય એક મહિલાને પણ તપાસમાં જોડાવા માટે કાનૂની નોટિસ ફટકારવામાં આવી છે. સીસીટીવીમાં એક મહિલા પ્લે-સ્કૂલની અંદર માસૂમ બાળક પર હુમલો કરતી સ્પષ્ટ નજરે ચડી હતી.

શાળાઓ અને પરિવહનમાં બાળકોની સુરક્ષા પર ગંભીર સવાલો

આ ઘટના ઉપરાંત મુખ્યમંત્રીએ બવાના વિસ્તારમાં ૩ વર્ષની નર્સરીની વિદ્યાર્થિની સાથે સ્કૂલ બસના ડ્રાઇવર દ્વારા થયેલા જાતીય શોષણની ઘટના અંગે પણ ઊંડી ચિંતા વ્યક્ત કરી છે. શાળાઓ અને બસોમાં બાળકોની સુરક્ષા સુનિશ્ચિત કરવા માટે શાળાઓએ હવે બસ સ્ટાફની પૃષ્ઠભૂમિની કડક ચકાસણી (Background Check) કરવી પડશે અને કોઈપણ બેદરકારી માટે સીધી શાળાનું મેનેજમેન્ટ જવાબદાર રહેશે તેમ સ્પષ્ટ કરવામાં આવ્યું છે.

તાજેતરમાં દિલ્હી-એનસીઆરમાં ચાલતી એક સ્લીપર બસમાં ૧૬ વર્ષની સગીરા પર થયેલા ગેંગરેપના ચકચારી કેસ અંગે પણ ચર્ચા થઈ છે. પોલીસ તપાસમાં બહાર આવ્યું છે કે બસ ડ્રાઇવર અને કંડક્ટરે સગીરા સાથે ચાલતી બસે દુષ્કર્મ આચર્યું હતું અને જીવથી મારી નાખવાની ધમકી આપી આરોપીઓ મોડી રાત્રે કાશ્મીરી ગેટ ટર્મિનલ પાસે પીડિતાને છોડીને ફરાર થઈ ગયા હતા. પોલીસે ફોરેન્સિક તપાસ માટે બસ જપ્ત કરી બંને આરોપીઓને ઝડપી લીધા છે. આ ગંભીર ઘટનાઓને પગલે દિલ્હી સરકાર હવે પડોશી રાજ્યો સાથે મળીને રાજધાનીમાં પ્રવેશતી તમામ બસોનું જીપીએસ (GPS)-આધારિત રિયલ-ટાઇમ મોનિટરિંગ કરવા અને મહિલાઓની સુરક્ષા વ્યવસ્થા વધુ મજબૂત બનાવવાની દિશામાં નક્કર પગલાં ભરી રહી છે.