તા. ૧ નવેમ્બરે ર૦ર૫ વિક્રમ સંવત ર૦૮૨ કારતક સુદ – ૧૦ શનિવાર
૧૬ કિલોની સોનાની બુટ્ટી ! ૨ વર્લ્ડ રેકોર્ડઃ દુબઈમાં પ્રદર્શન
૫૫ કુશળ કારીગરોની ટીમે આ બુટ્ટીઓ તૈયાર કરવા માટે કુલ ૫,૮૪૦ કલાકનો સમય લીધો : ડિઝાઈન મોર પરથી પ્રેરિત છે જે ભારતીય સંસ્કૃતિમાં સુંદરતા અને આકર્ષણનું પ્રતીક માનવામાં આવે છે મયૂર સહષા નામ પણ મોરથી પ્રેરિત આ ડિઝાઈનને જ દર્શાવે છે
દુબઇ તા.૨૬: દુબઈમાં ૧૬ કિલોથી વધુ વજનની સોનાની બુટ્ટીઓ બનાવી બે ગિનીસ વર્લ્ડ રેકોર્ડ સ્થાપિત કર્યા છે. ‘જોયલુક્કાસ જ્વેલરી‘ દ્વારા બનાવવામાં આવેલી આ બુટ્ટીઓનું નામ ‘મયૂર સહસ્ર‘ રાખવામાં આવ્યું છે. ૨૨ કેરેટ સોનામાંથી બનેલી આ બુટ્ટીઓનું અનાવરણ ૨૪ ઑક્ટોબરના રોજ દુબઈ ગોલ્ડ ડિસ્ટ્રિક્ટમાં આવેલા ‘જ્વેલ ઓફ જોય‘ શોરૂમમાં કરવામાં આવ્યું હતું. આ કાર્યક્રમમાં સંયુક્ત આરબ અમીરાતના અર્થતંત્ર અને પર્યટન મંત્રી અબ્દુલ્લા બિન તૌક અલ મરી પણ ઉપસ્થિત રહ્યા હતા.
મયૂર સહષાને વિશ્વની સૌથી ભારે સોનાની બુટ્ટીઓ અને વિશ્વની સૌથી મોટી સોનાની બુટ્ટીઓ - એમ બન્ને કેટેગરીમાં માન્યતા મળી છે. ગિનીસ વર્લ્ડ રેકોર્ડ્સ અનુસાર, જોયલુક્કાસે ૧૨ ઑક્ટોબરના રોજ સૌથી ભારે સોનાની બુટ્ટીઓનો રેકોર્ડ હાંસલ કર્યો હતો, અને ત્યારબાદ ૨૪ ઑક્ટોબરના રોજ તેને લોકો સમક્ષ રજૂ કરવામાં આવી હતી. આ બુટ્ટીઓની લંબાઈ ૧.૨૧૫ મીટર અને વ્યાસ ૦.૬૮૨ મીટર છે જે સામાન્ય રીતે પહેરવામાં આવતી પરંપરાગત બુટ્ટીઓ કરતાં ઘણી મોટી છે. ‘મયૂર સહસ્ર‘માં અત્યંત ઝીણવટભરી ડિઝાઈન છે, જેમાં દક્ષિણ એશિયાની પરંપરાગત બુટ્ટીઓમાં જોવા મળતો ઘંટ આકાર જાળવી રાખવામાં આવ્યો છે.
૫૫ કુશળ કારીગરોની ટીમે આ બુટ્ટીઓ તૈયાર કરવા માટે કુલ ૫,૮૪૦ કલાકનો સમય ફાળવ્યો હતો. તેની ડિઝાઈન મોર પરથી પ્રેરિત છે જે ભારતીય સંસ્કૃતિમાં સુંદરતા અને આકર્ષણનું પ્રતીક માનવામાં આવે છે. ‘મયૂર સહસ્ર‘ નામ પણ મોરથી પ્રેરિત આ ડિઝાઈનને જ દર્શાવે છે. તેમાં પરંપરાગત ભારતીય આભૂષણોની સટાઈલ જોવા મળે છે, જે તેના વિશાળ કદ અને ઝીણવટભરી કારીગરી માટે જાણીતી છે.
જોયલુક્કાસ જ્વેલરીના સીઈઓ જ્હોન પોલ અલુક્કાસે કહ્યું કે, આ બુટ્ટીઓને દુબઈમાં રજૂ કરવાનો નિર્ણય કંપનીના આ શહેર સાથેના લાંબા સમયના સંબંધો અને તેના વિકાસમાં કંપનીના યોગદાનને કારણે લેવામાં આવ્યો છે. તેમણે ટિપ્પણી કરી, ‘‘દુબઈ હંમેશાં ‘સોનાના શહેર' તરીકે જાણીતું રહ્યું છે. આ બાબત તેની આ ઓળખને વધુ મજબૂત બનાવશે.'' દુબઈ સોનાના છૂટક વેપાર માટે વિશ્વના અગ્રણી કેન્દ્રોમાંનું એક છે, જે સ્થાનિક રહેવાસીઓ અને પ્રવાસીઓ બન્નેને મોટી સંખ્યામાં આકર્ષે છે. ‘મયૂર સહષા' નું આગમન, સોનાના વેપારના કેન્દ્ર તરીકે દુબઈની પ્રતિષ્ઠામાં એક નવું પાસું ઉમેરે છે.
(10:06 AM IST)
છેલ્લા 8 દિવસમાં સૌથી લોકપ્રિય 
