વડોદરા : વડોદરાની એક 14 વર્ષની સગીર બાળકીના ગુમ થયા બાદ પરિવાર પર આભ તૂટી પડ્યું હતું, પરંતુ ગુજરાત પોલીસની સતર્કતા અને 'ઓપરેશન મિલાપ' હેઠળની સઘન તપાસને કારણે આ પરિવાર માટે આશાનું કિરણ જાગ્યું. પાંચ મહિનાથી ગુમ થયેલી આ સગીરાને પોલીસે કર્ણાટકના શિવમોગા જિલ્લામાંથી સુરક્ષિત રીતે શોધી કાઢીને તેના પરિવાર સાથે પુનઃમિલન કરાવ્યું છે. આ ઘટનામાં આરોપીએ પૂજારીનો વેશ ધારણ કરીને કરેલી ઠગાઈ અને અપહરણની વિગતો જાણી સૌ કોઈ સ્તબ્ધ થઈ ગયા છે.
પૂજારીના વેશમાં છુપાયેલો આરોપી
ઘટનાની વિગત એવી છે કે, 18 ડિસેમ્બર, 2025ના રોજ વડોદરાના છાણી વિસ્તારમાંથી આ સગીરા ગુમ થઈ હતી. વડોદરા એન્ટી-હ્યુમન ટ્રાફિકિંગ યુનિટ (AHTU) એ આ કેસને ગંભીરતાથી લઈને ટેકનિકલ સર્વેલન્સ અને ઈન્ટેલિજન્સના આધારે આરોપી સુનિલકુમાર કેસરીસિંહ બારીયાને ટ્રેસ કર્યો હતો. આરોપીએ જયપુરમાં પૂજારીનો કોર્સ કર્યો હતો અને નવું નામ ધારણ કરી શિવમોગાના એક જૈન મંદિરમાં પૂજારી તરીકે નોકરી શરૂ કરી હતી. તેણે ભોળી સગીરાને પોતાની પત્ની તરીકે ઓળખાવીને મંદિરમાં ગોંધી રાખી હતી, જે એક ગંભીર ગુનાહિત માનસિકતા દર્શાવે છે.
પોલીસની ફિલ્મી સ્ટાઈલ દબિશ
આરોપીને પકડવા માટે વડોદરા AHTU ની પાંચ સભ્યોની ટીમ કર્ણાટક પહોંચી હતી. ભારે વરસાદ વચ્ચે પોલીસ ટીમે બે દિવસ સુધી સતત મંદિર પર ચાંપતી નજર રાખી હતી. ત્રીજા દિવસે વહેલી સવારે ચાર વાગ્યે જ્યારે આરોપી મંદિરે આવ્યો ત્યારે પોલીસે તેને રંગેહાથ ઝડપી લીધો હતો. આરોપીની પૂછપરછ બાદ બાળકીને સુરક્ષિત રીતે બચાવી લેવામાં આવી હતી. ગુજરાત પોલીસની આ કામગીરીને લઈને લોકોમાં ભારે સરાહના થઈ રહી છે.
ઓપરેશન મિલાપનો મોટો વિજય
ગુજરાત પોલીસ દ્વારા શરૂ કરવામાં આવેલું 'ઓપરેશન મિલાપ' ગુમ થયેલા લોકોને શોધવા માટે ખૂબ જ અસરકારક સાબિત થયું છે. આ ઝુંબેશને 10 દિવસ લંબાવવામાં આવતા માત્ર દસ દિવસમાં જ 500 જેટલા ગુમ થયેલા બાળકો અને પુખ્ત વયના લોકોને શોધી કાઢવામાં આવ્યા છે. એડિશનલ ડીજીપી (વુમન સેલ) અજય ચૌધરીના જણાવ્યા મુજબ, આ સફળ ઝુંબેશમાં 288 મહિલાઓ, 88 બાળકીઓ, 21 છોકરાઓ અને 103 પુરુષોને તેમના પરિવારો સાથે ફરીથી મળવવામાં આવ્યા છે. આ ઝુંબેશ પોલીસ તંત્રની માનવીય સંવેદના અને કાર્યદક્ષતાનું ઉત્તમ ઉદાહરણ પૂરું પાડે છે.