​સુરત:સુરત શહેરમાં નશાના કારોબારીઓ સામે પોલીસે લાલ આંખ કરી છે. સુરત ક્રાઈમ બ્રાન્ચે એક મોટી અને સફળ કામગીરી પાર પાડીને MD ડ્રગ્સનો જથ્થો સપ્લાય કરવા નીકળેલા ૨ ઈસમોને રંગેહાથ ઝડપી પાડ્યા છે. સૌથી ચોંકાવનારી વાત એ છે કે આરોપીઓ સ્પેશિયલ ઓપરેશન ગ્રુપ (SOG)ની કચેરીથી માત્ર ૧૦૦ મીટરના અંતરે જ ડ્રગ્સનો વેપલો કરવા આવ્યા હતા.
​પોલીસને મળેલી ચોક્કસ બાતમીના આધારે ક્રાઈમ બ્રાન્ચે વોચ ગોઠવીને આ દરોડો પાડ્યો હતો. એસઓજી ઓફિસની બિલકુલ નજીક જ કાયદાનો કોઈ ભય રાખ્યા વગર ફરેતા આ ડ્રગ પેડલર્સ પાસેથી મોંઘીદાટ MD ડ્રગ્સની પુષ્કળ માત્રા મળી આવી છે. ક્રાઈમ બ્રાન્ચે ડ્રગ્સનો જથ્થો, રોકડ રકમ તેમજ અન્ય મુદ્દામાલ કબજે કરીને બંને આરોપીઓની અટકાયત કરી છે.
​ડ્રગ્સ ક્યાંથી લાવ્યા અને કોને આપવાનું હતું? તે દિશામાં સઘન પૂછપરછ
પોલીસની નાક નીચે જ નશાની હોટસ્પોટ પ્રવૃત્તિ ચલાવવાની હિમાકત કરનાર આ ગુનેગારોનું નેટવર્ક કેટલું ઊંડું છે તે અંગે તપાસ તેજ કરવામાં આવી છે. આરોપીઓ આ MD ડ્રગ્સનો જથ્થો ક્યાંથી લાવ્યા હતા અને સુરતમાં કોને સપ્લાય કરવાનો હતો તે અંગે પોલીસ દ્વારા કડક પૂછપરછ કરવામાં આવી રહી છે. આ ઘટનાને પગલે નશાના નેટવર્ક સાથે જોડાયેલા અન્ય તત્વોમાં ભારે ફફડાટ વ્યાપી ગયો છે.