વાપી: (જીતેન્દ્ર રુપારેલીયા દ્વારા) રાજ્યમાં શ્રાવણ માસમાં મેઘરાજાની હળવીથી મધ્યમ પધરામણી ચાલુ છે. પ્રાપ્ત આંકડા મુજબ રાજ્યના ૩૦ જિલ્લાના ૧૩૧ જેટલા તાલુકાઓમાં ૧ થી ૪૦ મીમી સુધીનો હળવો વરસાદ વરસ્યો છે. આ સાથે રાજ્યમાં ચાલુ ચોમાસાની સિઝનનો કુલ સરેરાશ વરસાદ ૭૪.૪૯ ટકા નોંધાઈ ચૂક્યો છે.

ખાસ કરીને દક્ષિણ ગુજરાતના વિસ્તારોમાં સારો વરસાદ નોંધાયો છે. જેમાં ડોલવણમાં સૌથી વધુ ૧.૫૭ ઈંચ વરસાદ ખાબક્યો છે. આ ઉપરાંત ખેરગામમાં ૧.૪૬ ઈંચ, ગણદેવીમાં ૧.૨૬ ઈંચ, ચીખલીમાં ૧.૦૨ ઈંચ, પારડીમાં ૦.૯૪ ઈંચ અને સુબીરમાં પણ ૦.૯૪ ઈંચ વરસાદ નોંધાયો છે.

ઉપરવાસમાં પડેલા વરસાદના પગલે જળાશયોમાં પાણીની આવક જોવા મળી રહી છે. ઉકાઈ ડેમની જળ સપાટી હાલ ૩૩૫.૦૨ ફૂટે યથાવત રહી છે. જ્યારે બીજી તરફ મધુબન ડેમમાં પાણીની આવક જળવાઈ રહેતા તકેદારીના ભાગરૂપે ડેમના ૨ દરવાજા હજુ પણ ખુલ્લા રાખવામાં આવ્યા છે.