​નડિયાદ/ખેડા: ખેડા જિલ્લા પોલીસ વડાની સીધી સૂચના અને માર્ગદર્શન હેઠળ ગુતાલ ગામમાં દેશી દારૂના ગેરકાયદેસર અડ્ડાઓ પર પોલીસે મોટો સર્જિકલ સ્ટ્રાઈક જેવો દરોડો પાડ્યો છે. મોડી રાત્રે તેમજ વહેલી સવારે ગુતાલ ગામને ચારેય તરફથી ઘેરીને ૧૦૦થી વધુ પોલીસ અધિકારીઓ અને જવાનોના કાફલાએ મેગા રેડ હાથ ધરી હતી. અચાનક ત્રાટકેલી પોલીસ ટીમને જોઈને બુટલેગરો અને ગેરકાયદે પ્રવૃત્તિ સાથે સંકળાયેલા તત્વોમાં ભારે નાસભાગ અને ખળભળાટ મચી ગયો હતો.
​પ્રાપ્ત વિગતો અનુસાર, ગુતાલ ગામ અને તેની આસપાસના વિસ્તારોમાં મોટા પાયે દેશી દારૂની ભઠ્ઠીઓ અને અડ્ડાઓ ચાલી રહ્યા હોવાની ચોક્કસ બાતમી પોલીસને મળી હતી. જેને આધારે ખેડા પોલીસની અલગ-અલગ ટીમ, એલસીબી (LCB) અને એસઓજી (SOG) સહિત ૧૦૦ જેટલા સશસ્ત્ર પોલીસકર્મીઓના કાફલા સાથે ગુતાલમાં સામૂહિક ધાડ પાડવામાં આવી હતી. સઘન સર્ચ ઓપરેશન દરમિયાન પોલીસે દેશી દારૂ બનાવવા માટે ઉપયોગમાં લેવાતો હજારો લીટર લિટર ગાળો, ભઠ્ઠીના સાધનો અને તૈયાર દેશી દારૂનો જથ્થો સ્થળ પર જ નષ્ટ કરી દીધો હતો.
​આ મેગા રેડ દરમિયાન પોલીસે દેશી દારૂના કારોબાર સાથે સંકળાયેલા અનેક જાણીતા બુટલેગરો અને પ્રોહિબિશનના ગુનામાં સંડોવાયેલા ઈસમોને કોર્ડન કરીને ઝડપી લીધા હતા. દારૂના અડ્ડાઓ પરથી વાહનો અને અન્ય મુદ્દામાલ પણ કબ્જે કરવામાં આવ્યો છે.
​પોલીસની આ કડક અને અણધારી કાર્યવાહીથી અસામાજિક તત્વોમાં ભારે ફફડાટ વ્યાપી ગયો છે. ખેડા પોલીસ વિભાગ દ્વારા સ્પષ્ટ ચેતવણી આપવામાં આવી છે કે જિલ્લામાં ગેરકાયદેસર દારૂ અને જુગારની પ્રવૃત્તિઓ ચલાવનારાઓ સામે આવી જ રીતે આકરા પગલાં ચાલુ રહેશે અને કોઈ પણ ગુનેગારને બક્ષવામાં આવશે નહીં.