રાજપીપલા:એકતાનગર ખાતે નારી શક્તિના આત્મનિર્ભરતા તરફના સંકલ્પ અને સાહસને પ્રોત્સાહન આપતા ભારત સરકારના ગ્રાહક બાબતો, ખાદ્ય અને જાહેર વિતરણ મંત્રાલયના રાજ્યમંત્રી શ્રીમતી નિમુબેન બાંભણીયાએ પિંક ઈ-રિક્ષા ચલાવી આત્મનિર્ભર બની રહેલી મહિલા ચાલક બહેનો સાથે પ્રેરણાદાયી સંવાદ કર્યો હતો. આ પ્રસંગે મંત્રીએ બહેનોના અનુભવો, તેમની રોજગારી તથા પરિવારના જીવનમાં આવેલા પરિવર્તન અંગે રસપૂર્વક જાણકારી મેળવી હતી.
 આ પ્રસંગે મંત્રીએ મહિલાઓના આત્મનિર્ભરતા તરફના પ્રયાસોની પ્રશંસા કરતાં જણાવ્યું હતું કે, “નારી સશક્ત તો સમાજ સશક્ત અને સમાજ સશક્ત તો દેશ સશક્ત.” તેમણે જણાવ્યું કે, મહિલાઓ જ્યારે પોતે પગભર બનીને પરિવારની જવાબદારી નિભાવે છે ત્યારે તે માત્ર પોતાના પરિવારને જ નહીં, પરંતુ સમગ્ર સમાજને નવી દિશા આપે છે.
મંત્રીએ પિંક ઈ-રિક્ષા ચલાવી રહેલી બહેનોને પ્રોત્સાહિત કરતાં જણાવ્યું હતું કે, કોઈપણ કામ નાનું નથી હોતું. જીવનમાં કરવામાં આવતું દરેક કામ મહેનત, હિંમત અને આત્મવિશ્વાસથી કરવામાં આવે તો તે ગૌરવપૂર્ણ બની જાય છે. દરેક વ્યક્તિએ પોતાના કામને શ્રેષ્ઠ રીતે કરવાનો પ્રયત્ન કરવો જોઈએ.
તેમણે વધુમાં જણાવ્યું હતું કે, જ્યારે કોઈ વ્યક્તિ હિંમત અને આત્મવિશ્વાસ સાથે આગળ વધે છે ત્યારે સમાજ પણ તેની નોંધ લે છે. આજે દેશના વિવિધ વિસ્તારોમાંથી લોકો એકતાનગર ખાતે પિંક ઈ-રિક્ષાના આ મોડલનો અભ્યાસ કરવા આવી રહ્યા છે, જે આ પહેલની સફળતા અને તેની પ્રેરણાદાયી અસર દર્શાવે છે.
પિંક ઈ-રિક્ષા ચલાવીને રોજગારી મેળવી રહેલી બહેનોને સંબોધતા મંત્રીએ જણાવ્યું હતું કે, તમે રિક્ષા ચલાવો છો તે માત્ર રોજગાર નથી, પરંતુ તમારા બાળકો માટે પણ એક મોટી પ્રેરણા છે. માતાને મહેનત કરીને પરિવારનું ગુજરાન ચલાવતા જોઈને બાળકોમાં પણ જીવનમાં આગળ વધવાની અને કંઈક બનવાની પ્રેરણા જન્મે છે.
તેમણે જણાવ્યું હતું કે, મહેનતથી મેળવેલી કમાણીનું પોતાનું વિશેષ ગૌરવ હોય છે. પરિશ્રમથી જ્યારે ઘરમાં આવક આવે છે ત્યારે તે પરિવારને આર્થિક રીતે મજબૂત બનાવવાની સાથે આત્મવિશ્વાસ અને સ્વાભિમાન પણ વધારે છે.
પિંક ઈ-રિક્ષા ચલાવી રહેલી બહેનોની હિંમત અને સંઘર્ષમાંથી પોતે પણ પ્રેરણા મેળવી હોવાનું જણાવતાં મંત્રીએ કહ્યું કે, તેઓ અનેક લોકોને આ બહેનોની વાત કરે છે કે, કેવી રીતે આપણી બહેનો હિંમતપૂર્વક પોતાનું ગુજરાન ચલાવી રહી છે અને પોતાના દીકરા-દીકરીઓને એક ધ્યેય સાથે શિક્ષણ અપાવી રહી છે.
મંત્રીએ વધુમાં જણાવ્યું હતું કે, આવી રોજગારીની તકો સાથે વધુમાં વધુ બહેનોને જોડવી જોઈએ. પિંક ઈ-રિક્ષા જેવી પહેલ મહિલાઓને સ્વાવલંબી અને આત્મનિર્ભર બનવાની દિશામાં મહત્વપૂર્ણ તક પૂરી પાડે છે. તેમણે બહેનોને આ પહેલ સાથે અન્ય મહિલાઓને પણ જોડવા અને તેમને પ્રોત્સાહિત કરવા અપીલ કરી હતી. તેમણે જણાવ્યું હતું કે, આવા નાના-નાના પગલાંથી જ દેશની પ્રગતિને વેગ મળે છે અને આત્મનિર્ભર ભારતના નિર્માણમાં દરેક નાગરિકનું યોગદાન મહત્વપૂર્ણ બની રહે છે.
અત્રે ઉલ્લેખનીય છે કે, એકતાનગરમાં પિંક ઈ-રિક્ષા પ્રોજેક્ટ મહિલાઓ માટે રોજગાર અને આત્મનિર્ભરતાનું પ્રેરણાદાયી મોડલ બની રહ્યો છે. હાલમાં ૯૦ જેટલી બહેનો પિંક ઈ-રિક્ષા પ્રોજેક્ટ સાથે જોડાઈને રોજગાર મેળવી આત્મનિર્ભર બની રહી છે. જ્યારે અગાઉ આ પ્રોજેક્ટ સાથે જોડાયેલી ૩૫ જેટલી બહેનોએ પોતાની પિંક ઈ-રિક્ષા ખરીદી સ્વરોજગાર મેળવી રહી છે. પિંક ઈ-રિક્ષા પ્રોજેક્ટ દ્વારા મહિલાઓને રોજગારીની તક મળવાની સાથે તેમના પરિવારની આવકમાં વધારો થયો છે અને મહિલાઓમાં આત્મવિશ્વાસ, સ્વાવલંબન તથા સામાજિક સશક્તિકરણની ભાવના વધુ મજબૂત બની છે.
એકતા નર્સરી ખાતે યોજાયેલા આ સંવાદ કાર્યક્રમમાં સ્ટેચ્યુ ઓફ યુનિટીના મુખ્ય કારોબારી અધિકારી અમિત અરોરા, નાયબ વન સંરક્ષક પ્રસાદ રવિ રાધાકૃષ્ણ, અધિક કલેક્ટર ગોપાલ બામણીયા, જિલ્લા વહીવટી તંત્રના અધિકારીઓ, વન વિભાગના અધિકારીઓ ઉપસ્થિત રહ્યા હતા.