એકતાનગર : નર્મદા જિલ્લામાં આવેલું વિશ્વપ્રસિદ્ધ પ્રવાસન ધામ એકતાનગર (કેવડિયા) ખાતે દિવાળીના તહેવારો અને વેકેશનના પ્રારંભિક માત્ર ત્રણ દિવસના ટૂંકા ગાળામાં જ દોઢ લાખથી વધુ પ્રવાસીઓએ ઉમટી પડીને એક નવો રેકોર્ડ સર્જ્યો છે.

પ્રાપ્ત વિગતો અનુસાર, વિશ્વની સૌથી ઊંચી સરદાર વલ્લભભાઈ પટેલની પ્રતિમા અને તેની આસપાસના ૨૩ થી વધુ આકર્ષક પ્રવાસન પ્રકલ્પોને નિહાળવા માટે ગુજરાત તેમજ દેશભરમાંથી મોટી સંખ્યામાં સહેલાણીઓ એકતાનગર પહોંચી રહ્યા છે, જેના કારણે અહીંની તમામ હોટલો અને ટેન્ટસિટી હાઉસફુલ થઈ ગયા છે.

અત્યાર સુધીના છેલ્લા આઠ વર્ષમાં ૩ કરોડથી વધુ પ્રવાસીઓ આ ઐતિહાસિક સ્થળની મુલાકાત લઈ ચૂક્યા છે, અને ચાલુ વેકેશન દરમિયાન દૈનિક ૫૦ થી ૬૦ હજાર પ્રવાસીઓ આવવાની શક્યતાને ધ્યાનમાં રાખીને વહીવટી તંત્ર દ્વારા વિશેષ વ્યવસ્થાઓ ગોઠવવામાં આવી છે.

પ્રવાસીઓની સુવિધા માટે ગુજરાત એસ.ટી. નિગમ દ્વારા વધારાની વિશેષ બસો દોડાવવામાં આવી રહી છે, તેમજ રાત્રિના સમયે સહેલાણીઓ માટે ખાસ રંગારંગ સાંસ્કૃતિક કાર્યક્રમોનું આયોજન પણ કરવામાં આવ્યું છે જેથી તેમની યાત્રા વધુ યાદગાર બની રહે.

ચાલુ વર્ષે વડાપ્રધાન નરેન્દ્ર મોદી દ્વારા ખુલ્લા મૂકવામાં આવેલા ૬૦૦ મુસાફરોની ક્ષમતા ધરાવતી નવી 'એકતા ક્રૂઝ' અને 'રેન ફોરેસ્ટ' જેવા અદધુત આધુનિક પ્રકલ્પો પણ પ્રવાસીઓમાં ભારે આકર્ષણનું કેન્દ્ર સાબિત થઈ રહ્યા છે.

આગામી દિવસોમાં પણ પ્રવાસીઓનો આ પ્રવાહ સતત જળવાઈ રહેવાની સંભાવના છે, ત્યારે પ્રવાસન વિભાગ અને સ્થાનિક તંત્ર દ્વારા સુરક્ષા, પરિવહન અને સ્વચ્છતાના મામલે પૂરતી તૈયારીઓ રાખવામાં આવી છે.