મહિસાગર જિલ્લામાં મોડી રાત્રે ગાજવીજ અને પવન સાથે વરસાદનું ધમાકેદાર આગમન થતાં ખેડૂતો અને સ્થાનિક લોકોમાં ખુશીની લહેર ફરી વળી છે. મેઘરાજાની તોફાની બેટિંગના કારણે લુણાવાડાના શામળાજી હાઇવે તેમજ અસ્થાના હાટડીયા બજાર જેવા નીચાણવાળા વિસ્તારો અને મુખ્ય માર્ગો પર વરસાદી પાણી ભરાઈ ગયા હતા. અસહ્ય બફારા બાદ પડેલા આ વરસાદથી હવામાનમાં ઠંડક પ્રસરી જતાં યુવાધન વરસાદની મજા માણવા અને ભીંજાવા માટે રસ્તા પર ઉતરી આવ્યું હતું.