વડોદરા : વડોદરા શહેરના અતિ વ્યસ્ત અને પોશ ગણાતા અલકાપુરી વિસ્તારમાં આવેલી એક ટેલરિંગ શોપમાં ગુરુવારે બપોરે અચાનક ભીષણ આગ ફાટી નીકળતા આસપાસના વેપારીઓ અને રાહદારીઓમાં ભારે ગભરાટ અને અફરાતફરી મચી ગઈ હતી.

પ્રાપ્ત વિગતો અનુસાર, અલકાપુરી સ્થિત 'ન્યૂ અજંતા ટેલર્સ' નામની દુકાન તે સમયે બંધ હતી, ત્યારે અચાનક અંદરથી ગાઢ અને કાળા ધુમાડાના ગોટેગોટા બહાર નીકળવા લાગતા સ્થાનિક લોકોએ તાત્કાલિક વડોદરા ફાયર બ્રિગેડને આ દુર્ઘટનાની જાણ કરી હતી.

કોલ મળતાની સાથે જ ફાયર બ્રિગેડની ટીમ લાસ્કરો અને ફાઈટર વાહનો સાથે ત્વરિત ઘટનાસ્થળે દોડી આવી હતી અને દુકાન બંધ હોવાથી અંદર ભરાયેલા ઝેરી ધુમાડાની ગંભીરતા પારખીને જવાનોએ ઓક્સિજન માસ્ક ધારણ કરીને સાહસભેર અંદર પ્રવેશ કર્યો હતો.

ફાયર જવાનો દ્વારા સતત પાણીનો મારો ચલાવીને ભારે જહેમત બાદ આગ પર સંપૂર્ણ કાબુ મેળવવામાં આવ્યો હતો, જેના કારણે સમયસર આસપાસની અન્ય વ્યાપારિક દુકાનોમાં આગ પ્રસરતી અટકી શકી હતી અને મોટો અનર્થ ટળ્યો હતો.

સદનસીબે દુકાન બંધ હોવાના કારણે અંદર કોઈ જાનહાનિના સમાચાર નથી, પરંતુ આગ અને ગાઢ ધુમાડાના કારણે સિલાઈ માટે રાખેલા લાખોના કપડાં, મશીનરી અને કિંમતી સામાન સંપૂર્ણપણે બળીને ખાખ થઈ જતા દુકાનદારને મોટું આર્થિક નુકસાન વેઠવાનો વારો આવ્યો છે.

પ્રાથમિક તપાસમાં આ આગ શોર્ટ સર્કિટના કારણે લાગી હોવાનું અનુમાન લગાવવામાં આવી રહ્યું છે, ત્યારે સ્થાનિક વહીવટી તંત્ર અને ફાયર વિભાગ દ્વારા આ મામેલ વધુ તપાસ હાથ ધરીને સુરક્ષાના ધોરણોની ચકાસણી કરવામાં આવી રહી છે.