મહેસાણા : મહેસાણા જિલ્લાના ઐતિહાસિક અને ધાર્મિક મહત્વ ધરાવતા બહુચરાજી તાલુકાના શંખલપુર ગામે સિંચાઈના પાણીની ગંભીર સમસ્યા સર્જાતા ખેડૂતો મુશ્કેલીમાં મુકાયા છે. ગામમાંથી પસાર થતી મુખ્ય સિંચાઈ કેનાલ છેલ્લા એક વર્ષથી તૂટેલી અને અત્યંત બિસ્માર હાલતમાં પડી હોવા છતાં જવાબદાર તંત્ર દ્વારા તેનું યોગ્ય સમારકામ કરવામાં આવ્યું નથી. કેનાલમાં પડેલા મોટા ભંગાણ અને તંત્રની ભારે બેદરકારીના કારણે શંખલપુર તેમજ આસપાસના ગ્રામ્ય વિસ્તારોના ખેડૂતોને સમયસર સિંચાઈનું પાણી મળી રહ્યું નથી, જેના કારણે અન્નદાતાઓની મહેનત પર પાણી વસવાની નોબત આવી છે.

હાલમાં રાજ્યભરમાં શિયાળુ પાકની વાવણી અને સિઝન પૂરજોશમાં ચાલી રહી છે, ત્યારે ખેડૂતો માટે સિંચાઈનું પાણી અત્યંત જીવનરક્ષક સાબિત થાય છે. ઘઉં, રાયડો, જીરું અને ચણા જેવા મહત્વના શિયાળુ પાકોને પિયત આપવા માટે પાણીની તાતી જરૂરિયાત હોય છે. પરંતુ કેનાલનું રિપેરિંગ સમયસર ન થવાને કારણે તેમાં પાણી છોડવામાં આવી રહ્યું નથી, જેના લીધે ખેતરોમાં ઉભેલો મોલ અને તૈયાર પાક સુકાઈ રહ્યો છે. મોંઘા ભાવના ખાતર, બિયારણ અને મજૂરી પાછળ જંગી ખર્ચ કર્યા બાદ પાણીના અભાવે પાક નિષ્ફળ જવાની ભીતિથી ખેડૂતોની ચિંતા સાતમા આસમાને પહોંચી ગઈ છે.

સ્થાનિક ખેડૂતો દ્વારા આક્ષેપ કરવામાં આવ્યો છે કે છેલ્લા એક વર્ષથી કેનાલ તૂટેલી હોવાની બાબતે સિંચાઈ વિભાગ અને સંબંધિત ઉચ્ચ અધિકારીઓને અનેકવાર લેખિત તથા મૌખિક રજૂઆતો કરવામાં આવી છે, છતાં તંત્રના પેટનું પાણી હલતું નથી. કોઈ જ નક્કર કામગીરી કરવામાં ન આવતા ખેડૂતો હવે લાચાર બન્યા છે. એક તરફ ખેડૂતો આર્થિક સંકટનો સામનો કરી રહ્યા છે, ત્યારે સરકારી તંત્રની આ ઉદાસીનતા અને નિષ્ક્રિયતા સામે ખેડૂતોમાં ભારે રોષ ભભૂકી ઉઠ્યો છે.

ખેડૂતોએ તંત્રને ચીમકી આપતાં માંગ કરી છે કે કોઈપણ પ્રકારના વિલંબ વગર તાત્કાલિક ધોરણે આ તૂટેલી કેનાલનું સમારકામ હાથ ધરવામાં આવે અને વહેલી તકે સિંચાઈ માટેનું પાણી છોડવામાં આવે. જો આગામી સમયમાં કેનાલ રિપેર કરીને પાણી પૂરું પાડવામાં નહીં આવે, તો શંખલપુરના ખેડૂતો દ્વારા ઉગ્ર આંદોલન કરવાની ફરજ પડશે, જેની સંપૂર્ણ જવાબદારી તંત્રની રહેશે.