મહેસાણા જિલ્લામાં બહુચરાજી APMCના નવા હોદ્દેદારોની પસંદગી માટે યોજાયેલી ચૂંટણીમાં ચેરમેન તરીકે વિજય પટેલની બીજીવાર વરણી કરવામાં આવી છે. જ્યારે વાઈસ ચેરમેન તરીકે સમુબેન દેસાઈની પસંદગી કરવામાં આવી છે. આમ, બંને હોદ્દા માટેની ચૂંટણી પ્રક્રિયા પૂર્ણ થતાં APMCમાં નવી ટીમની રચના થઈ છે. જોકે, ચેરમેન પદ માટે ભાજપે અગાઉથી જ વિજય પટેલને સત્તાવાર મેન્ડેટ આપ્યું હોવાથી તેમની પસંદગી લગભગ નિશ્ચિત હતી, પરંતુ વાઈસ ચેરમેનના નામને લઈને છેલ્લી ઘડી સુધી રાજકીય ખેંચતાણ જોવા મળી હતી.

બહુચરાજી APMCમાં ચેરમેન અને વાઈસ ચેરમેન પદ માટે યોજાયેલી ચૂંટણી પહેલાં રાજકીય ગતિવિધિઓ તેજ બની હતી. ભાજપ દ્વારા ચેરમેન પદ માટે વિજય પટેલને સત્તાવાર મેન્ડેટ આપવામાં આવ્યું હતું. જેના પગલે વિજય પટેલની પસંદગીનો માર્ગ મોકળો થયો હતો.

અગાઉ પણ ચેરમેન તરીકે જવાબદારી નિભાવી ચૂકેલા વિજય પટેલ પર ફરી એકવાર પક્ષ દ્વારા વિશ્વાસ મૂકવામાં આવ્યો છે. આ સાથે તેઓ બીજીવાર બહુચરાજી APMCના ચેરમેન બન્યા છે.

ચેરમેન પદની પસંદગી સ્પષ્ટ થયા બાદ વાઈસ ચેરમેનના નામને લઈને મામલો જટીલ બન્યો હતો. આ પદ માટે કોની પસંદગી કરવી તે મુદ્દે આંતરિક ચર્ચાઓ અને ખેંચતાણ શરૂ થઈ હતી.

ખાસ વાત એ છે કે બહુચરાજી APMCની તમામ બેઠકો પર ભાજપના સભ્યો વિજયી થયા હોવા છતાં વાઈસ ચેરમેનના નામને લઈને સહમતી સધાતી નહોતી. જેના કારણે સ્થાનિક રાજકારણમાં પણ આ મુદ્દો ચર્ચાનો વિષય બન્યો હતો.

વાઈસ ચેરમેન પદની પસંદગીને લઈને ઊભી થયેલી ગૂંચવણ વચ્ચે સ્થાનિક ધારાસભ્યએ મધ્યસ્થી કરી હતી. ધારાસભ્યના હસ્તક્ષેપ બાદ આખરે વાઈસ ચેરમેનના નામ પર સહમતી સધાઈ હતી અને સમુબેન દેસાઈની પસંદગી કરવામાં આવી હતી.

આમ, લાંબી ચર્ચા અને રાજકીય ગતિવિધિઓ બાદ બહુચરાજી APMCના બંને મહત્વપૂર્ણ હોદ્દાઓ માટે પસંદગી પ્રક્રિયા પૂર્ણ થઈ છે.

બહુચરાજી APMCમાં નવી ટીમની રચના સાથે હવે વિજય પટેલ અને સમુબેન દેસાઈ સામે ખેડૂતોના હિતમાં કામ કરવાની મહત્વપૂર્ણ જવાબદારી રહેશે. બજાર સમિતિના વહીવટને વધુ સુદ્રઢ બનાવવા, ખેડૂતોને તેમની જણસના યોગ્ય ભાવ મળે અને વેપાર-વણજની સુવિધાઓમાં વધારો થાય તે દિશામાં નવી ટીમ કેવું કામ કરે છે તેના પર સૌની નજર રહેશે.