વડોદરા,તા.૮: વડોદરા રેલવે સ્‍ટેશને મંગળવારે સાંજે આવી પહોંચેલી ટ્રેનમાં તપાસ કરતા પ્રૌઢ પાસેથી ૨૦ કિલો ૨૦૦ ગ્રામ ચાંદી અને રોકડ રકમ મળી કુલ રૂપિયા ૫૦ લાખ ઉપરાંતની કિમતનો મુદ્દામાલ રેલવે પોલીસે કબ્‍જે કરી તપાસ હાથ ધરી છે.

રેલવે સ્‍ટેશન પર આવી પહોંચેલી સાંતરાગાછી-પોરબંદર એકસપ્રેસ ટ્રેનમાં એક વ્‍યકિત કિમતી ચીજવસ્‍તુઓ લઈને શંકાસ્‍પદ હાલતમાં મુસાફરી કરી રહ્યો છે. આ બાતમીના પગલે પોલીસે ટ્રેન શહેરના પ્‍લેટફોર્મ નંબર ૪ પર આવી પહોંચતા તપાસ કરી હતી. આ દરમિયાન એક પ્રૌઢ પાસેથી બે બેગમળી આવી હતી. જેની તપાસ કરતા તેમાથી ચાંદીના ૭૨ સિકકા અને ચાંદીના દાગીના મળી કુલ ૨૦ કિલો ૨૦૦ ગ્રામ ચાંદી મળી આવી હતી. જેની કિમત ૪૬ લાખ ૮૩ હજારની છે. જયારે પ્રૌઢ પાસેથી ૩ લાખ ૪૦ હજાર મળી આવ્‍યા હતા. આમ કુલ રૂપિયા ૫૦ લાખની મતા મળી આવતા કબ્‍જે કરી હતી. પ્રૌઢે તેનું નામ બિપીન વરિયા (ઉ. વ.૫૮) હોવાનું જણાવ્‍યું હતુ. તે રાજકોટનો રહેવાસી હોવાની કબૂલાત કરી હતી.

બિપીન વરિયાએ છતીસગઢના રાયપુરના છપા ગામના જવેલર્સ પાસેથી આ ચાંદીનો મુદ્દામાલ ખરીધ્‍યો હતો. જયારે આ જથ્‍થો તેમને રાજકોટના બે વેપારીને આપવાનો હોવાની કેફિયત રજૂ કરી હતી. પોલીસે બિપીન પાસેથી બિલ સહિતની વિગતો માગતા એક કાચું બિલ મળી આવ્‍યું હતું. જયારે પાકા બિલ મળી આવ્‍યા ન હતા. વડોદરા રેલવે પોલીસે અટકાયત કર્યા બાદ આ મુદ્દામાલ છોડાવવા પણ રાજકોટના વેપારી આવ્‍યા ન હતા. રેલવે પોલીસે આ અંગે વધુ તપાસ હાથ ધરી છે.

GST અને ઇન્‍કમટેક્ષ વિભાગને રેલવે પોલીસ પત્ર લખ્‍યો

વડોદરા રેલવે પોલીસ મથકના પીઆઇ મહિડાએ જણાવ્‍યું હતુંકે ચાંદીના જથ્‍થા અંગે જીએસટી અને આરોપી પાસેથી મળી આવેલી રોકડ રકમ અંગે ઇન્‍કમટેક્ષ વિભાગને જાણ કરી હતી.