વડોદરા શહેર ફરી એકવાર એક શરમજનક ઘટનાને કારણે ચર્ચામાં આવ્યું છે. શહેરના ગોરવા વિસ્તારમાં આવેલા એક ટ્યુશન ક્લાસમાં 10 વર્ષની માસૂમ સગીરા સાથે શારીરિક અડપલાંની ઘટના સામે આવતાં સમગ્ર વિસ્તારમાં ભારે ચકચાર મચી ગઈ છે. આ કિસ્સો ટ્યુશન સંચાલકો તેમજ બાળકોની સુરક્ષાને લઈને વાલીઓ માટે પણ એક લાલબત્તી સમાન ચેતવણીરૂપ કિસ્સો સાબિત થયો છે.

વડોદરાના ગોરવા વિસ્તારમાં ચાલતા એક ખાનગી ટ્યુશન ક્લાસમાં 10 વર્ષની સગીરા સાથે અડપલાં થવાની ઘટનાથી વાલીઓમાં રોષ ફેલાયો છે. બાળકી રોજની જેમ પોતાના અભ્યાસ માટે ટ્યુશન ક્લાસમાં ગઈ હતી, પરંતુ ત્યાં તેની સાથે જે બન્યું તેણે શિક્ષણ જગતને પણ કલંકિત કર્યું છે. આ ઘટના બાદ આસપાસના વિસ્તારમાં બાળકોની સુરક્ષા અંગે ગંભીર સવાલો ઊભા થઈ રહ્યા છે.

મળતી માહિતી મુજબ, ટ્યુશન ક્લાસ ચલાવતી શિક્ષિકા કોઈ કામ અર્થે થોડા સમય માટે બહાર ગઈ હતી. તે દરમિયાન તેનો 17 વર્ષનો ભાઈ ત્યાં હાજર હતો. શિક્ષિકા બહાર જતાં જ તેના ભાઈએ તકનો લાભ ઉઠાવી રૂમનો દરવાજો અંદરથી બંધ કરી દીધો હતો અને 10 વર્ષની માસૂમ વિદ્યાર્થિની સાથે છેડતી કરવાનું શરૂ કર્યું હતું.

આરોપી સગીરે પોતાના કાળા કરતૂતને અંજામ આપવા માટે ટ્યુશનમાં હાજર અન્ય 4 બાળકોને ઉપરના માળે મોકલી દીધા હતા. ત્યારબાદ નીચે એકલી પડેલી માસૂમ બાળકી સાથે શારીરિક અડપલાં કર્યાં હતાં. બાળકીએ ઘરે જઈને આખી ઘટના પોતાના પરિજનોને જણાવતાં સમગ્ર મામલો સામે આવ્યો હતો અને વાલીઓ તાત્કાલિક પોલીસ સ્ટેશન પહોંચ્યા હતા.

ઘટનાની ગંભીરતાને ધ્યાનમાં રાખીને ગોરવા પોલીસે તાત્કાલિક 17 વર્ષના આરોપી સગીર સામે POCSO એક્ટ હેઠળ ગુનો નોંધી આગળની કાનૂની તપાસ હાથ ધરી છે. પોલીસે પીડિત માસૂમ બાળકી અને આરોપી સગીર બંનેનું મેડિકલ ચેકઅપ કરાવવાની કામગીરી હાથ ધરી છે. આ ઘટનાએ વાલીઓને પોતાના બાળકોની સુરક્ષા બાબતે વધુ જાગૃત થવા મજબૂર કર્યા છે.