અમદાવાદ:પશ્ચિમ એશિયામાં પ્રવર્તી રહેલી અશાંતિ અને યુદ્ધ જેવી સ્થિતિની અસરોને ખાળવા માટે ગુજરાત સરકાર અને કેન્દ્ર સરકાર સક્રિય બની છે. અમદાવાદના પ્રેસ ઇન્ફોર્મેશન બ્યૂરો (PIB) ખાતે યોજાયેલી મહત્વપૂર્ણ બ્રિફિંગમાં ઉદ્યોગ અને ખાણ વિભાગના અધિક કમિશનર કે.સી. સંપત અને ગુજરાત સ્ટેટ પેટ્રોલિયમ કોર્પોરેશન (GSPC) ના સિનિયર વાઇસ પ્રેસિડન્ટ દિપેન ચૌહાણે રાજ્યમાં ઇંધણની સ્થિતિ અંગે વિગતવાર માહિતી આપી હતી. સરકારે સ્પષ્ટ કર્યું છે કે પેટ્રોલિયમ ઉત્પાદનો અને જીવન જરૂરી ચીજવસ્તુઓની કિંમતો તેમજ ઉપલબ્ધતા પર સતત નજર રાખવામાં આવી રહી છે.

**ઉદ્યોગો માટે વૈકલ્પિક ઇંધણની છૂટછાટ:**
અધિક કમિશનર કે.સી. સંપતે જાહેરાત કરી હતી કે ઔદ્યોગિક અને વાણિજ્યિક એકમો પર ગેસ પુરવઠાનું દબાણ ઘટાડવા માટે આગામી ત્રણ મહિના સુધી ઘન વૈકલ્પિક ઇંધણ (કોલસો, બાયોમાસ, કેરોસીન વગેરે) ના વપરાશ પરના નિયંત્રણો હટાવવામાં આવ્યા છે. ગુજરાત પ્રદૂષણ નિયંત્રણ બોર્ડના ૩૦ માર્ચ ૨૦૨૬ના પરિપત્ર મુજબ આ કામચલાઉ મંજૂરી આપવામાં આવી છે. રાજ્યના ૪,૧૧,૭૩૩ નોંધાયેલા ઉદ્યોગોમાંથી માત્ર ૧,૨૧૨ એકમો આર્થિક અડચણોને કારણે બંધ થયા છે, જ્યારે બાકીના ઉદ્યોગો કાર્યરત છે. ખાસ કરીને શ્રમિકો માટે ૧૫૯ સામુદાયિક રસોડા શરૂ કરાયા છે જેનાથી ૫૦,૦૦૦ કામદારોને લાભ મળી રહ્યો છે.

**ગેસ પુરવઠામાં ગુજરાતની અગ્રેસરતા:**
GSPC ના દિપેન ચૌહાણે જણાવ્યું હતું કે પશ્ચિમ એશિયાના સંકટ છતાં રાજ્યમાં એકપણ CNG સ્ટેશન બંધ થયું નથી. ગુજરાત દેશના કુલ PNG ગ્રાહકોમાં ૨૩ ટકા હિસ્સો ધરાવે છે. રાજ્યમાં દરરોજ ૪૦ લાખ કિલો CNG નો વપરાશ થાય છે જેનાથી ૭.૫૦ લાખ વાહનો ચાલે છે. સરકારે તમામ સીટી ગેસ ડિસ્ટ્રિબ્યુશન (CGD) સંસ્થાઓને નિર્દેશ આપ્યો છે કે હોસ્પિટલો, શાળાઓ, છાત્રાલયો અને ઔદ્યોગિક કેન્ટીન જેવી આવશ્યક સેવાઓને PNG કનેક્શન આપવામાં સર્વોચ્ચ પ્રાથમિકતા આપવામાં આવે.

**PNG નોંધણીમાં ૯૪૮ ટકાનો ઉછાળો:**
સરકારી પ્રોત્સાહન અને જાગૃતિ અભિયાનના કારણે માર્ચથી ૫ એપ્રિલ ૨૦૨૬ દરમિયાન નવી સ્થાનિક PNG નોંધણીઓમાં ૯૪૮ ટકાનો અધધ વધારો જોવા મળ્યો છે. અંદાજે ૪૯,૮૯૮ નવી નોંધણીઓ અને ૨૬,૯૦૯ નવા રૂપાંતરણો સફળતાપૂર્વક પૂર્ણ થયા છે. ઘણી CGD કંપનીઓ ગ્રાહકોને આકર્ષવા માટે નવા કનેક્શન પર ૫૦૦ રૂપિયાનું રિબેટ પણ આપી રહી છે. કનેક્શન આપવાની પ્રક્રિયા સરળ બનાવીને તેની સમયમર્યાદા ઘટાડી માત્ર ૭ દિવસની કરી દેવામાં આવી છે.

**LNG નો પર્યાપ્ત જથ્થો ઉપલબ્ધ:**
ગુજરાતના મુન્દ્રા અને દહેજ ટર્મિનલ પર લિક્વિફાઇડ નેચરલ ગેસ (LNG) નો પૂરતો જથ્થો ઉપલબ્ધ છે. એપ્રિલ અને મે ૨૦૨૬ દરમિયાન વધારાના ચાર કાર્ગો આવવાની શક્યતા છે, જે ભવિષ્યની જરૂરિયાતોને પૂર્ણ કરશે. ઘરેલું વપરાશકારો અને વાહનો માટે ગેસ ફાળવણીને 'પ્રાથમિકતા ક્ષેત્ર શ્રેણી-I' હેઠળ રાખવામાં આવી છે, જેથી સામાન્ય જનજીવન પર આંતરરાષ્ટ્રીય કટોકટીની ન્યૂનતમ અસર થાય. પશ્ચિમ એશિયાની સ્થિતિને જોતા ઉદ્યોગોને કાચા માલ અને સપ્લાય ચેઇનમાં પડતી અડચણો દૂર કરવા માટે જિલ્લા વહીવટી તંત્રને સતત સંકલનમાં રહેવા આદેશ અપાયા છે.