News of Sunday, 13th April 2025
સાબરકાંઠાના વડાલીમાં એક પરિવારના પાંચ સભ્યોનો સામૂહિક આપઘાતનો પ્રયાસ :દંપતીનું મોત :ત્રણ બાળકોની હાલત ગંભીર
વ્યાજખોરોના ત્રાસથી પરિવારે આપઘાત કર્યો હોવાની ચર્ચા : સમાજના યુવાનો મોટી સંખ્યામાં પોલીસ મથકે પહોંચ્યા

સાબરકાંઠામાંથી એક ચોંકાવનારી ઘટના સામે આવી રહી છે, જેમાં એક પરિવારે સામુહિક રીતે આપઘાતનો પ્રયત્ન કરતા સમગ્ર પંથકમાં ચકચારી મચી જવા પામી છે. સાબરકાંઠા જિલ્લાના વડાલીમાં સગર પરિવારનો સામૂહિક આપઘાત મામલો સામે આવ્યો છે. પરિવારમાં પતિ પત્ની સહિત ત્રણ બાળકોએ ઝેરી દવા ગટગટાવીને આતમહત્યાનો પ્રયાસ કરવામાં આવ્યો હતો.
સમગ્ર પરિવાર વડાલી બાદ ઈડરમાં ખાનગી હોસ્પિટલમાં સારવાર હેઠળ હતો. તેમાં ખાનગી હોસ્પિટલમાં સારવાર દરમિયાન ગત રાત્રીએ પતિનું મોત થયું હતું જ્યારે સારવાર દરમિયાન આજે પત્નીનું મોત થયું હતું. પરિવારના સામૂહિક આપઘાતમાં દંપતીનું મોત નિપજ્યું છે જ્યારે ત્રણ બાળકો ગંભીર હાલતમાં સારવાર હેઠળ છે.
બંને મૃતકોના મૃતદેહને પોસ્ટમોટર્મ અર્થે હિંમતનગર સિવિલ હોસ્પિટલમાં ખસેડવામાં આવ્યા છે. મળતી માહિતી પ્રમાણે, 44 વર્ષીય મોહનભાઈ જુંડાળા તથા 33 વર્ષીય કોકીલાબેન જુંડાળાનું અવસાન થયું હતું. સામૂહિક આપઘાતમાં બેના મોત થવાથી વડાલી પંથકમાં ચકચાર મચી જવા પામી છે. જો કે, ત્રણેય બાળકો હજુ પણ ખાનગી હોસ્પિટલમાં સારવાર હેઠળ છે. આ સમગ્ર બાબતે પોલીસ દ્વારા અલગ અલગ દિશામાં તપાસ હાથ ધરવામાં આવી છે.
સાબરકાંઠાના વડાલીમાં સામૂહિક આપઘાત બાબતે સમાજ આક્રમક મૂળમાં જોવા મળ્યો છે. પ્રાથમિક માહિતી અનુસાર, વ્યાજખોરોના ત્રાસથી પરિવારે આપઘાત કર્યો હોવાનું સામે આવી રહ્યું છે. જેને લઈને પરિવારને ન્યાય અપાવવા સગર સમાજ મેદાને પડ્યો છે. સમાજના યુવાનો મોટી સંખ્યામાં પોલીસ મથકે પહોંચ્યા હતા. ત્યારે જવાબદાર આરોપીઓ સામે ઝડપી કાર્યવાહી કરવા સમાજે માગ કરી છે. ત્યારે પરિવારે સામૂહિક આપઘાતનો પ્રયાસ કરતા પોલીસ તંત્ર પણ દોડતું થયું હતું.
(7:05 PM IST)









છેલ્લા 8 દિવસમાં સૌથી લોકપ્રિય 
