૨૧ વર્ષનું લગ્ન જીવન, ૨૨ વર્ષ ચાલી છૂટાછેડાની લડાઈ !
એક વ્યક્તિને તેના લગ્ન જીવન કરતાં પણ વધારે સમય છૂટાછેડા માટેની લડાઈ લડવી પડીઃ આ વ્યક્તિ છેલ્લા ૨૫ વર્ષથી પોતાની પત્નિથી અલગ રહે છે અને તેને પત્નિથી છૂટા થવા માટે ૨૨ વર્ષ સુધી કોર્ટના ધક્કા ખાવા પડયા : કપલનો દીકરો પણ આજે ૪૦ વર્ષનો થઈ ગયો છે અને તેને પણ પોતાનો પરિવાર છે
અમદાવાદ, તા.૧૭: ગુજરાત હાઈકોર્ટે એક વ્યક્તિના છૂટાછેડા મંજૂર કર્યા છે. આ એક સામાન્ય ઘટના લાગે છે કેમ કે ભારતમાં વર્ષ હજારો છૂટાછેડા થતાં હોય છે. પરંતુ હાઈકોર્ટમાં છૂટાછેડાનો જે કેસ આવ્યો હતો તેમાં વ્યક્તિને તેના લગ્ન જીવન કરતાં પણ વધારે સમય છૂટાછેડા માટેની લડાઈ લડવી પડી. હાઈકોર્ટે છૂટાછેડા મંજૂર કરતાં વ્યક્તિના ૪૩ વર્ષના લગ્ન જીવન પર પણ પૂર્ણવિરામ મૂકાઈ ગયું. આ વ્યક્તિ છેલ્લા ૨૫ વર્ષથી પોતાની પત્નીથી અલગ રહે છે અને તેને પત્નીથી છૂટા થવા માટે ૨૨ વર્ષ સુધી કોર્ટના ધક્કા ખાવા પડયા.ગુજરાત હાઈકોર્ટની જસ્ટિસ બિરેન વૈષ્ણવ અને જસ્ટિસ ડીએમ દેસાઈએ આ કેસની સુનાવણી કરી હતી. તેમણે પોતાના આદેશમાં કહયું હતું કે, જ્યારે બંને પક્ષો પોતાના જીવનનો મોટો ભાગ કાયદાકીય લડાઈમાં પસાર કરે છે ત્યારે તે ઘણી દુઃખદ વાત છે. કપલના લગ્ન જીવન દરમિયાન જન્મેલો દીકરો પણ હાલમાં ૪૦ વર્ષની આસપાસનો થઈ ગયો છે, એટલું જ નહીં બંને પક્ષોના વકીલો દ્વારા કરવામાં આવેલા સબમિશનમાં જાણવા મળ્યું છે કે તે દીકરાને પણ પોતાનો પરિવાર છે. કોર્ટનું સ્પષ્ટ માનવું છે કે કપલના લગ્નજીવનમાં પરસ્પર કડવાશ સિવાય ખરેખર કંઈ જ નહતું.
આ કેસ અમદાવાદના એક કપલનો છે જેમના લગ્ન ૧૯૮૨માં થયા હતા. થોડા સમય સુધી તેમનું લગ્ન જીવન એકદમ સુખમય રીતે પસાર થયું હતું પરંતુ બાદમાં તેમની વચ્ચે તકરાર શરૂ થઈ ગઈ હતી. પતિની ફરિયાદ હતી કે તેની પત્ની તેની પાસેથી વધારે રૂપિયાની માંગણી કરે છે. એટલું જ નહીં રૂપિયા ન આપવા પર તે માસિક ત્રાસ પણ આપતી હતી. આ ઉપરાંત પત્નીએ પતિ વિરુદ્ધ ફરિયાદો પણ નોંધાવી હતી. પત્નીએ પતિ સામે IPCની કલમ ૪૯૮A હેઠળ ક્રિમિનલ કેસ પણ દાખલ કર્યો હતો, પરંતુ બાદમાં સમાધાન થયું હતું. હાઈકોર્ટના આદેશમાં જણાવાયું છે કે પતિ અને પત્ની વચ્ચે ૧૯૮૬ અને ૧૯૮૭માં પતિ વિરુદ્ધની ફરિયાદોના સંદર્ભમાં સમાધાન થયું હતું.
પત્નીએ કરેલા કેસોમાં તો સમાધાન થયું હતું પરંતુ બંને વચ્ચેના અણબનાવો ચાલું રહ્યા હતા અને તેમની વચ્ચેના વિવાદો કયારેય ઉકેલાઈ શકયા ન હતા. તેમની વચ્ચે મનમેળ ન થવાના કારણે અંતે પત્ની ૧૯૯૮માં પોતાની સાસરીનું ઘરછોડી દીધું હતું. પતિએ બાદમાં પોતાના લગ્ન જીવનના અધિકારો પરત મેળવવા માટે કાર્યવાહી શરૂ કરી હતી. જોકે, તેમાં પણ તેને સફળતા મળી ન હતી. અંતે તેણે ૨૦૦૩માં ક્રુરતાના આધાર પર છૂટાછેડા માટેનો દાવો દાખલ કર્યો હતો.
જોકે, પતિ માટે છૂટછેડાની લડાઈ પણ આસાન રહી નથી. ૨૦૦૮માં ફેમિલી કોર્ટે તેના છૂટાછેડાની અરજીને ફગાવી દીધી હતી. પતિએ ફેમિલી કોર્ટના ચુકાદાને હાઈકોર્ટમાં પડકાર્યો હતો. પતિએ હાઈકોર્ટમાં અપીલ કરીને દલીલ કરી હતી કે ફેમિલી કોર્ટે તેણે આપેલા પુરાવાઓને યોગ્ય રીતે ધ્યાનમાં લીધા નથી. આ ઉપરાંત તેણે તે પણ દાવો કર્યો હતો કે ૨૦૦૦ના દાયકામાં તેની પત્ની અને તેના પરિવારના સભ્યોએ ફેમિલી કોર્ટના ગેટની બહાર તેને માર માર્યો હતો અને તે અંગે તેણે ક્રિમિનલ કેસ પણ કર્યો હતો. તેના વકીલે હાઈકોર્ટમાં દલીલ કરી હતી કે પતિ અને પત્ની બંને બે દાયકાથી વધારે સમયથી અલગ રહે છે અને તેમની વચ્ચે સમાધાનની કોઈ શકયતા નથી. તેથી તેમના છૂટછેડા માન્ય કરવા જોઈએ. હાઈકોર્ટે પણ તેમની વાતને ધ્યાનમાં રાખી હતી અને કપલના છૂટાછેડા માન્ય કર્યા હતા.(
(10:02 AM IST)
છેલ્લા 8 દિવસમાં સૌથી લોકપ્રિય 
