લખનૌ | તા.૧૧: બોલિવૂડમાં ઘણીવાર એવું બને છે કે કોઈ ફિલ્મ શાંતિથી રિલીઝ થાય છે પરંતુ તેનો પડઘો આખા દેશમાં સંભળાય છે. હાર્દિક ગજ્જર દ્વારા નિર્દેશિત ફિલ્મ 'કૃષ્ણાવતારમ ભાગ ૧: ધ હાર્ટ' (હૃદયમ્) સાથે કંઈક આવું જ બન્યું છે. કોઈ મોટા સુપરસ્ટાર કે મસમોટા પ્રમોશન વગર રિલીઝ થયેલી આ ફિલ્મે માત્ર દર્શકોના દિલ જ નથી જીત્યા, પરંતુ ઉત્તર પ્રદેશના મુખ્યમંત્રી યોગી આદિત્યનાથને પણ મંત્રમુગ્ધ કરી દીધા છે. રવિવારે આ ફિલ્મ નિહાળ્યા બાદ સીએમ યોગીએ તેને ઉત્તર પ્રદેશમાં કરમુક્ત (Tax-Free) જાહેર કરી દીધી છે.
સીએમ યોગી આદિત્યનાથે લખનૌમાં ફિલ્મના કલાકારો અને નિર્માતા ટીમ સાથે એક સ્પેશિયલ સ્ક્રીનિંગમાં ભાગ લીધો હતો. ફિલ્મ જોયા બાદ તેમણે તેના વિષયવસ્તુ અને ભારતીય સંસ્કૃતિના સચોટ ચિત્રણની મુક્ત કંઠે પ્રશંસા કરી હતી. આ સમાચાર સોશિયલ મીડિયા પર શેર કરતા ફિલ્મના નિર્માતા સાજન રાજ કુરૂપે જણાવ્યું હતું કે, "અમે માનનીય મુખ્યમંત્રીના આભારી છીએ કે તેમણે શ્રીકૃષ્ણના વારસા અને આપણી સંસ્કૃતિને જીવંત રાખતી આ ફિલ્મને સમર્થન આપ્યું છે."

લોકમુખે થતી ચર્ચાએ બદલ્યું ફિલ્મનું નસીબ
શરૂઆતમાં આ ફિલ્મની ચર્ચા ઘણી ઓછી હતી. સિદ્ધાર્થ ગુપ્તા, સુષ્મિતા ભટ્ટ, સંસ્કૃતિ જયના અને નિવાસિની કૃષ્ણન જેવા પ્રતિભાશાળી કલાકારો હોવા છતાં, કોઈ 'ગ્લેમર' ન હોવાથી ટ્રેડ એનાલિસ્ટ્સ તેને હળવાશથી લેતા હતા. પરંતુ ફિલ્મ રિલીઝ થતા જ પાસા પલટાઈ ગયા:
•    નબળી શરૂઆત છતાં શાનદાર કમબેક: ગુરુવારે માત્ર રૂ. ૪૨ લાખના સાધારણ કલેક્શન સાથે શરૂઆત કરનાર આ ફિલ્મે વીકેન્ડમાં જબરદસ્ત ઉછાળો માર્યો છે.
•    કલેક્શનનો આંકડો: માત્ર થોડા જ દિવસોમાં ફિલ્મે ભારતમાં રૂ. ૭.૩૨ કરોડની કમાણી કરી લીધી છે.
•    અન્ય ફિલ્મોને પાછળ છોડી: આશ્ચર્યજનક રીતે, આ ફિલ્મે બોક્સ ઓફિસ પર મલ્ટિ-સ્ટારર ફિલ્મ 'દાદી કી શાદી' કરતા પણ વધુ કમાણી કરીને સૌને ચોંકાવી દીધા છે.
 
કેમ ખાસ છે 'કૃષ્ણાવતારમ'?
ફિલ્મની સફળતાનું મુખ્ય કારણ તેની રજૂઆત છે. લોકો આ ફિલ્મને માત્ર મનોરંજન માટે નહીં, પણ શ્રીકૃષ્ણની વાર્તાને નવી પેઢી સમક્ષ આધુનિક રીતે રજૂ કરવા બદલ પસંદ કરી રહ્યા છે. 'વર્ડ ઓફ માઉથ' એટલે કે એક મુસાફર બીજાને કહે તે રીતે આ ફિલ્મ હવે હાઉસફુલ જઈ રહી છે.
હવે જ્યારે ઉત્તર પ્રદેશ જેવા મોટા રાજ્યમાં ફિલ્મ ટેક્સ ફ્રી થઈ ગઈ છે, ત્યારે ટિકિટના ભાવ ઘટતા સામાન્ય લોકો અને શ્રદ્ધાળુઓ વધુ સંખ્યામાં સિનેમાઘરો તરફ વળશે તેવી પૂરેપૂરી સંભાવના છે. આગામી દિવસોમાં આ ફિલ્મ બોક્સ ઓફિસ પર નવા રેકોર્ડ્સ સર્જે તો નવાઈ નહીં!