હૈદરાબાદ : તેલુગુ ફિલ્મ ઈન્ડસ્ટ્રીના સુપરસ્ટાર જુનિયર NTR અને બોલિવૂડ અભિનેત્રી જ્હાન્વી કપૂરનો એક આર્ટિફિશિયલ ઈન્ટેલિજન્સ (AI) દ્વારા બનાવવામાં આવેલો વાંધાજનક વીડિયો સોશિયલ મીડિયા પર વાયરલ થતાં મનોરંજન જગતમાં ભારે ખળભળાટ મચી ગયો છે. આ વિવાદ સામે આવતાં જ એક્ટરે સોશિયલ મીડિયા પર આકરો પ્રહાર કરી આવી હરકત કરનારાઓ સામે કાયદેસરના પગલાં લેવાની સ્પષ્ટ ઘોષણા કરી છે.

પોતાના ટ્વિટર એકાઉન્ટ પર આક્રોશ વ્યક્ત કરતાં જુનિયર NTR એ લખ્યું હતું કે, "મહિલાઓનું અપમાન કરનારી આ પ્રકારની ગંદી અને શરમજનક માનસિકતા ધરાવતા લોકોને હું ક્યારેય માફ નહીં કરું. જે દેશમાં મહિલાઓને દેવી સમાન પૂજવામાં આવે છે અને 'માતૃદેવો ભવ:' આપણી સંસ્કૃતિનો હિસ્સો છે, ત્યાં એઆઈનો આવો દુરૂપયોગ અત્યંત બીમાર માનસિકતા દર્શાવે છે."

આ મામલે અભિનેતાએ ફેન્સ અને નાગરિકોને પણ નમ્ર અપીલ કરી છે કે આ પ્રકારની નકલી અને વિકૃત સામગ્રીને સોશિયલી શૅર કે પ્રમોટ કરવી નહીં. તેમણે ઉમેર્યું હતું કે આજે જો આ કલાકારો સાથે થઈ રહ્યું છે, તો કાલે કોઈ સામાન્ય પરિવારોની મહિલાઓ સાથે પણ થઈ શકે છે, તેથી આવા કન્ટેન્ટને સખત રીતે નકારવું જોઈએ.

ઉલ્લેખનીય છે કે વર્ષ ૨૦૨૪માં રિલીઝ થયેલી બ્લોકબસ્ટર ફિલ્મ 'દેવરા પાર્ટ-૧'માં જુનિયર NTR અને જ્હાન્વી કપૂરે સાથે કામ કર્યું હતું. આ ફિલ્મના લોકપ્રિય ગીત 'ચુટ્ટુમલ્લે'ના સંદર્ભમાં કેટલાક અસામાજિક તત્વોએ AI ટેકનોલોજીનો મિસયુઝ કરીને આ વિવાદાસ્પદ મોર્ફ્ડ વીડિયો તૈયાર કર્યો હતો.

આ ઘટના બાદ સેલેબ્સ દ્વારા સરકાર સમક્ષ AIના ગેરકાયદેસર ઉપયોગ અને ડીપફેક કન્ટેન્ટ વિરુદ્ધ યુદ્ધના ધોરણે સખત કાયદો બનાવવાની માંગણી પણ બુલંદ બની છે, જેથી ભવિષ્યમાં કોઈની પણ પ્રાઈવસી અને સન્માન સાથે ખીલવાડ અટકાવી શકાય.

હાલમાં આ ફેક વીડિયો બનાવનારા અને તેને સોશિયલ મીડિયા પર વાયરલ કરનારા સાયબર ક્રિમિનલ્સને શોધી કાઢવા માટે કાનૂની ટીમ દ્વારા પ્રક્રિયા હાથ ધરવામાં આવી છે, અને આગામી દિવસોમાં દોષિતો સામે કડકમાં કડક કાર્યવાહી કરવામાં આવશે.