<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 17th November 2026

૯૦ના દાયકાની જાણીતી અભિનેત્રી ફરહીન ખાને શાહરૂખ ખાનની સુપરહિટ ફિલ્મ 'બાઝીગર' ઠુકરાવી દીધી હતી

માધુરી દીક્ષિત જેવો ચહેરો ધરાવતી અને ભવિષ્યની મોટી સ્ટાર ગણાતી અભિનેત્રીએ પૂર્વ ક્રિકેટર મનોજ પ્રભાકર સાથેના લગ્ન માટે પોતાની ચળકતી ફિલ્મી કારકિર્દીનો ત્યાગ કર્યો હતો.

મુંબઈ, તા.૧૭: બોલિવૂડના સુવર્ણ કાળ સમાન ૯૦ના દાયકામાં પોતાની સુંદરતા અને અભિનયથી દર્શકોના દિલ જીતી લેનાર અભિનેત્રી ફરહીન ખાન પોતાના જીવનના એક નિર્ણાયક ફેસલા અને શાહરૂખ ખાનની ફિલ્મ ઠુકરાવવાના કારણે લાંબા સમય સુધી ચર્ચાના કેન્દ્રમાં રહી હતી.

માધુરી દીક્ષિત સાથે ચહેરાની અદ્ભુત સામ્યતા હોવાને કારણે 'છોટી માધુરી' તરીકે લોકપ્રિય બનેલી ફરહીને વર્ષ ૧૯૯૨માં રોનિત રોય સાથે આવેલી ફિલ્મ 'જાન તેરે નામ'થી ડેબ્યૂ કરી રાતોરાત મોટી ખ્યાતિ મેળવી હતી.

તેના કરિયરની શરૂઆતમાં જ તેને વર્ષ ૧૯૯૩માં શાહરૂખ ખાનની સુપરહિટ ફિલ્મ 'બાઝીગર'માં સીમા ચોપરાનું મહત્વપૂર્ણ પાત્ર ઓફર થયું હતું, પરંતુ દક્ષિણ ભારતીય ફિલ્મમાં કામ કરવાની વ્યસ્તતાને કારણે તેણે આ સુવર્ણ તક જતી કરી હતી અને બાદમાં આ ભૂમિકા શિલ્પા શેટ્ટીએ ભજવી હતી.

ફરહીને પોતાની ટૂંકી કરિયરમાં અક્ષય કુમાર સાથે 'સૈનિક' અને 'દિલ કી બાજી' જેવી ફિલ્મો આપી હતી, પરંતુ વર્ષ ૧૯૯૪માં પૂર્વ ભારતીય ક્રિકેટર મનોજ પ્રભાકર સાથે મુલાકાત થયા બાદ તેના અંગત જીવનમાં મોટો વળાંક આવ્યો હતો.

મનોજ પ્રભાકર મુશ્કેલ સમયમાંથી પસાર થઈ રહ્યા હોવાથી અને તેમને સાથની જરૂર હોવાથી ફરહીને ફિલ્મી દુનિયાની ગ્લેમરસ દુનિયાને અલવિદા કહીને તેમની સાથે લગ્ન કરી લીધા હતા અને અભિનય જગતથી કાયમ માટે અંતર બનાવી લીધું હતું.

હાલમાં દિલ્હી ખાતે સ્થાયી થયેલી આ અભિનેત્રીએ કરિયરની ટોચ પર હોવા છતાં પ્રેમ અને સંબંધોને પ્રાથમિકતા આપીને ફિલ્મી પડદાથી દૂર રહેવાનું પસંદ કર્યું હતું, જે બોલિવૂડના ઇતિહાસમાં એક અનોખો અને યાદગાર કિસ્સો બની ગયો છે.

(4:36 PM IST)