મુંબઈ: તા.૯ બોલીવુડના અસલી 'ખિલાડી' અક્ષય કુમાર હંમેશા પોતાની ફિલ્મોમાં ખતરનાક સ્ટંટ જાતે કરવા માટે જાણીતા છે, પરંતુ આ વખતે આ સાહસ ભારે પડ્યું છે. તેમની આગામી મોસ્ટ અવેટેડ હોરર-કોમેડી ફિલ્મ ‘ભૂત બંગલા’ ના સેટ પરથી એક ચોંકાવનારો વીડિયો સામે આવ્યો છે, જેમાં હાઈ-ઇન્ટેન્સિટી એક્શન સિક્વન્સ કરતી વખતે અક્ષય કુમાર ઈજાગ્રસ્ત થતા જોવા મળે છે. ગુરુવારે મેકર્સે આ પડદા પાછળના (BTS) દ્રશ્યો સોશિયલ મીડિયા પર શેર કર્યા છે.

કેવી રીતે બની આ ઘટના?

વાયરલ વીડિયોમાં જોઈ શકાય છે કે અક્ષય કુમાર હવામાં ઉછળીને નાટકીય ‘મિડ-એર જમ્પ કિક’ લગાવી રહ્યા છે. જોકે, લેન્ડિંગ વખતે તેમનું સંતુલન બગડ્યું હતું અને તેઓ ખરાબ રીતે જમીન પર પટકાયા હતા. અક્ષયે હંમેશા એ વાત પર ભાર મૂક્યો છે કે તેઓ એક્શન દ્રશ્યોમાં VFX કે AI ના ઉપયોગ કરવાને બદલે વાસ્તવિકતાને વધુ મહત્વ આપે છે, અને આ જ જુસ્સામાં તેમને ઈજા પહોંચી છે. છતાં, તેમના આ સમર્પણને જોઈને ચાહકો તેમના વખાણ કરી રહ્યા છે.

રિલીઝ ડેટમાં મોટો વળાંક

ફિલ્મની રિલીઝને લઈને પણ એક મહત્વના સમાચાર સામે આવ્યા છે. પહેલા આ ફિલ્મ ૧૦ એપ્રિલે રિલીઝ થવાની હતી, પરંતુ હવે તેને પાછી ઠેલવામાં આવી છે. સહ-નિર્માતા એકતા કપૂરે જાહેરાત કરી છે કે ‘ભૂત બંગલા’ હવે ૧૬ એપ્રિલે સિનેમાઘરોમાં આવશે. આ ફેરફાર પાછળનું કારણ રણવીર સિંહની ફિલ્મ ‘ધૂરંધર ૨’ ની અસાધારણ સફળતા છે. પ્રદર્શકો અને વિતરકો માને છે કે બંને ફિલ્મોને પૂરતી જગ્યા અને પ્રેક્ષકો મળી રહે તે માટે આ નિર્ણય લેવામાં આવ્યો છે.

પ્રિયદર્શન અને અક્ષયની જોડીનો ફરી ધડાકો

આ ફિલ્મનું દિગ્દર્શન દિગ્ગજ ડાયરેક્ટર પ્રિયદર્શન કરી રહ્યા છે, જેઓ અક્ષય કુમાર સાથે ‘હેરા ફેરી’ અને ‘ભૂલ ભુલૈયા’ જેવી સુપરહિટ ફિલ્મો આપી ચૂક્યા છે. આ ફિલ્મમાં અક્ષયની સાથે પરેશ રાવલ, અસરાની, રાજપાલ યાદવ, તબ્બુ અને વામિકા ગબ્બી જેવી મજબૂત સ્ટારકાસ્ટ જોવા મળશે.

૧૬ એપ્રિલે રાત્રે ૯ વાગ્યે આ ફિલ્મનો પહેલો શો શરૂ થશે. હવે જોવાનું એ રહેશે કે પ્રિયદર્શન અને અક્ષયની આ ક્લાસિક જોડી પ્રેક્ષકોને ફરી એકવાર હસાવવામાં અને ડરાવવામાં કેટલી સફળ રહે છે.