નવી દિલ્હી. ચેમ્પિયન્સ ટ્રોફી 2025ના સંગઠનને લઈને ઈન્ટરનેશનલ ક્રિકેટ કાઉન્સિલના બોર્ડ સભ્યોની એક મહત્વપૂર્ણ બેઠક યોજાઈ હતી. આ વર્ચ્યુઅલ મીટિંગ કોઈપણ નિર્ણય વિના મુલતવી રાખવામાં આવી છે.

     આ બેઠક લગભગ 20 મિનિટ સુધી ચાલી હતી. બોર્ડના સભ્યોએ ટૂંક સમયમાં ફરીથી મળવાનું નક્કી કર્યું. ICCના વર્તમાન અધ્યક્ષ ગ્રેગ બાર્કલે 1 ડિસેમ્બરે રાજીનામું આપશે. આ પછી BCCI સેક્રેટરી જય શાહ તેમનું સ્થાન લેશે.

   ANIના અહેવાલ મુજબ તમામ સભ્યો બેઠકમાં કોઈ નિર્ણય પર પહોંચ્યા ન હતા. પાકિસ્તાન ક્રિકેટ બોર્ડ (PCB) એ હાઇબ્રિડ મોડલને સ્વીકાર્યું નથી. અહેવાલો અનુસાર, મીટિંગમાં 12 સંપૂર્ણ સભ્યો અને સહયોગી દેશોના ત્રણ નિર્દેશકોએ ભાગ લીધો હતો. આવી સ્થિતિમાં આ બેઠક શનિવારે થઈ શકે છે. જો શનિવારે નહીં, તો આગામી થોડા દિવસોમાં ફરીથી બેઠક યોજવામાં આવી શકે છે.

    ચેમ્પિયન્સ ટ્રોફી 19 ફેબ્રુઆરી 2025થી શરૂ થશે. ટુર્નામેન્ટમાં 8 ટીમો વચ્ચે સ્પર્ધા થશે. ટુર્નામેન્ટનું શિડ્યુલ હજુ જાહેર કરવામાં આવ્યું નથી. આ ટુર્નામેન્ટનું આયોજન પાકિસ્તાનમાં થવાનું છે. ભારત સરકારે સુરક્ષાના કારણોસર પોતાની ટીમ પાકિસ્તાન મોકલવાનો સ્પષ્ટ ઈન્કાર કરી દીધો છે.

    ભારતીય ક્રિકેટ કંટ્રોલ બોર્ડે આઈસીસીને મેઈલ મોકલીને સ્પષ્ટ કર્યું હતું કે ભારત સરકારે ટીમ ઈન્ડિયાને પાકિસ્તાન જવાની પરવાનગી આપી નથી. ICCએ આ અંગે પાકિસ્તાન ક્રિકેટ બોર્ડને પણ જાણ કરી હતી

   BCCI ટૂર્નામેન્ટનું આયોજન હાઇબ્રિડ મોડલમાં કરવા માંગે છે. બીજી તરફ પાકિસ્તાન ક્રિકેટ બોર્ડની માંગ છે કે ભારતીય ટીમે તેની મેચો પાકિસ્તાનમાં જ રમવી જોઈએ. બંને દેશોની જીદને કારણે ટૂર્નામેન્ટનું શેડ્યૂલ જાહેર કરવામાં વિલંબ થઈ રહ્યો છે

    તાજેતરમાં જ પાકિસ્તાનના ભૂતપૂર્વ ક્રિકેટર શાહિદ આફ્રિદીએ X પર એક પોસ્ટમાં લખ્યું હતું કે, "રાજકારણ અને રમત-ગમતને મિશ્રિત કરીને, BCCIએ આંતરરાષ્ટ્રીય ક્રિકેટને મુશ્કેલીમાં મૂક્યું છે. હું હાઇબ્રિડ મોડલ નહીં અપનાવવાના PCBના નિર્ણય સાથે સંપૂર્ણ રીતે ઊભો છું. તે પણ જ્યારે પાકિસ્તાને પાંચ વખત ભારતની મુલાકાત લીધી હતી. સુરક્ષા કારણોની પરવા કર્યા વિના હવે સમય આવી ગયો છે કે ICC અને તેના બોર્ડ ઓફ ડિરેક્ટર્સ યોગ્ય નિર્ણય લે અને નિષ્પક્ષ રહે.