પુણે, તા.૧૩: રાષ્ટ્રવાદી કોંગ્રેસ પાર્ટી (એનસીપી) ના બંને જૂતોના વિલીનીકરણ અને ધારાસભ્યોના પક્ષપલટા અંગે ચાલી રહેલી અટકળો વચ્ચે મહારાષ્ટ્રના રાજકારણમાં ભારે ગરમાવો જોવા મળી રહ્યો છે, જેમાં તાજેતરમાં પાર્થ પવાર દ્વારા પુણે ખાતે એક ખાસ બેઠક બોલાવવામાં આવી છે.

પ્રાપ્ત વિગતો અનુસાર, શુક્રવારના રોજ પુણે સ્થિત 'જિજાઈ' બંગલે પાર્થ પવારની ઉપસ્થિતિમાં એનસીપીના કેટલાક પસંદગીના ધારાસભ્યો અને મહત્વના પદાધિકારીઓની એક ગુપ્ત અને અત્યંત મહત્વપૂર્ણ બેઠક શરૂ થઈ છે, જેમાં ભોરના ધારાસભ્ય શંકર માંડેકર પણ પહોંચ્યા હતા.

આ અચાનક બોલાવાયેલી બેઠક પાછળનું મુખ્ય કારણ શિવસેના નેતા સંજય રાઉત દ્વારા કરવામાં આવેલો એ દાવો છે કે સુનેત્રા પવાર જૂથના ૨૦ થી ૨૨ ધારાસભ્યો પક્ષ છોડવાના મૂડમાં છે અને તેઓ શરદ પવારના સંપર્કમાં છે, જેને લઈને પાર્ટીમાં ભારે અસ્વસ્થતા ફેલાઈ છે.

આ અસ્વસ્થતાના પગલે અગાઉ સુનેત્રા પવારની ઓફિસમાંથી તમામ ધારાસભ્યોને ફોન કરીને વિલીનીકરણ અંગે તેમનું વલણ જાણવાના પ્રયાસો થયા હતા, અને હવે પાર્થ પવાર ખુદ મેદાનમાં ઉતરીને સાત જેટલા ધારાસભ્યો સાથે બેઠક યોજી રહ્યા છે.

બીજી તરફ આ રાષ્ટ્રીય રાજકીય ઘટનાક્રમ વચ્ચે શરદ પવાર જૂથ અને અજિતદાદા જૂથના દિગ્ગજ નેતાઓ સુપ્રિયા સુળે, પ્રફુલ પટેલ અને સુનીલ તટકરે દિલ્હીમાં સંસદીય સમિતિની બેઠકો માટે હાજર છે, જ્યાં આગામી સમયમાં રાજકીય સમીકરણો બદલાવાની ચર્ચાઓ વેગ પકડી રહી છે.

આગામી સમયમાં આ બેઠકો અને નેતાઓની હિલચાલ બાદ એનસીપીના વિલીનીકરણ અંગે કોઈ મોટો નિર્ણય લેવાય છે કે કેમ તે અંગે રાજકીય વર્તુળોની નજર આ સમગ્ર ઘટનાક્રમ પર કેન્દ્રિત થઈ છે.