મુંબઈ: છઠ પૂજાના પર્વ નિમિત્તે મુંબઈના જુહુ ચોપાટી પર રવિવારે ઉત્તર ભારતીય શ્રદ્ધાળુઓની ભારે ભીડ જોવા મળી હતી. અસ્તાચળે જતા સૂર્યને અર્ઘ્ય આપવા માટે સાંજ પહેલાંથી જ મોટી સંખ્યામાં મહિલાઓ સહિત શ્રદ્ધાળુઓ બીચ પર એકત્રિત થયા હતા. ભીડને ધ્યાનમાં રાખીને જુહુ ચોપાટી પર સામાન્ય પ્રવાસીઓના પ્રવેશ પર રોક લગાવવામાં આવી હતી અને માત્ર છઠ પૂજા માટે આવેલા ભક્તોને જ પ્રવેશ આપવામાં આવતો હતો. કોઈ અનિચ્છનીય ઘટના ન બને તે માટે પોલીસનો ચુસ્ત બંદોબસ્ત પણ ગોઠવવામાં આવ્યો હતો.

અત્રે ઉલ્લેખનીય છે કે છેલ્લા કેટલાક દિવસોથી રાજ્યમાં છઠ પૂજાના આયોજનને લઈને વિવાદ ચાલી રહ્યો હતો. મુંબઈના રેલવે અને મેટ્રો સ્ટેશનો પર છઠ પૂજાનાં ગીતો વગાડવામાં આવતાં મહારાષ્ટ્ર નવનિર્માણ સેનાએ વિરોધ નોંધાવ્યો હતો. આ પૃષ્ઠભૂમિમાં જુહુ ચોપાટી પર સુરક્ષા વ્યવસ્થા વધારવામાં આવી હતી. બીજી તરફ, બદલાપુરમાં ઉલ્હાસ નદીના કિનારે યોજાયેલી છઠ પૂજાને લઈને પણ પોલીસ દ્વારા ખાસ બંદોબસ્ત ગોઠવવામાં આવ્યો હતો. વિરોધની શક્યતાને ધ્યાનમાં રાખીને કેટલાક મનસૈનિકોને નોટિસ પણ આપવામાં આવી હતી.

મુંબઈની સાથે નાશિકમાં પણ છઠ પૂજાનો ઉત્સાહ જોવા મળ્યો હતો. ગોદાવરી નદીના કિનારે આવેલા રામકુંડ પર અસ્તાચળે જતા સૂર્યને અર્ઘ્ય આપવા માટે ઉત્તર ભારતીય મહિલાઓ અને અન્ય શ્રદ્ધાળુઓ મોટી સંખ્યામાં પહોંચ્યા હતા. રામકુંડ પર ભક્તોની ભીડ એટલી મોટી હતી કે જાણે કુંભમેળા જેવો માહોલ સર્જાયો હતો. શ્રદ્ધાળુઓએ છઠી મૈયાની પૂજા કરી અને પરિવારની સુખ-સમૃદ્ધિ તથા કલ્યાણ માટે પ્રાર્થના કરી હતી.

છઠ પૂજા ચાર દિવસનો પર્વ છે. તેમાં વ્રતધારીઓ અસ્તાચળે જતા સૂર્યને સાંજે અર્ઘ્ય અર્પણ કરે છે અને બીજા દિવસે સવારે ઉગતા સૂર્યને અર્ઘ્ય આપીને વ્રત પૂર્ણ કરે છે. આ વર્ષે 15 નવેમ્બરે સાંજના અર્ઘ્ય બાદ 16 નવેમ્બરે સવારે ઉષા અર્ઘ્ય સાથે પર્વનું સમાપન થશે.