વાશિંગ્ટન (ન્યૂઝફર્સ્ટ): અમેરિકામાં એરપોર્ટના સાધનો અને કોમ્યુનિકેશન્સ સિસ્ટમમાં સર્જાયેલી ગંભીર ખામીના કારણે સમગ્ર દેશની હવાઈ મુસાફરી ખોરવાઈ ગઈ હતી. સાધનોમાં અચાનક વિક્ષેપ સર્જાતા યુએસ ઓથોરિટી દ્વારા સુરક્ષાના ભાગરૂપે રાષ્ટ્રવ્યાપી ફ્લાઈટ્સ પર ગ્રાઉન્ડ સ્ટોપ જાહેર કરવામાં આવ્યો હતો, જેના કારણે અસંખ્ય વિમાનો જમીન પર રોકાઈ ગયા હતા અને હજારો મુસાફરો દેશભરના એરપોર્ટ્સ પર અટવાઈ પડ્યા હતા. જોકે, સતત ચાર કલાકથી વધુ સમય સુધી ચાલેલા આ શટડાઉન બાદ આખરે પ્રતિબંધ ઉઠાવી લેવામાં આવ્યો છે અને એરલાઇન્સને ફરીથી ફ્લાઈટ્સ ઓપરેટ કરવાની મંજૂરી આપવામાં આવી છે.

૪,૦૪૨ વિમાનો હવામાં હતા ત્યારે અચાનક લેવાયો હતો નિર્ણય:
પ્રાપ્ત વિગતો અનુસાર, જ્યારે આ ટેકનિકલ ખામી સર્જાઈ અને ૨૦:૫૪ યુટીસી (UTC) ના રોજ યુએસ એરપોર્ટ્સ પર જતી તમામ ફ્લાઈટ્સ અટકાવવાનો આદેશ આપવામાં આવ્યો, તે સમયે અંદાજે ૪,૦૪૨ જેટલી ફ્લાઈટ્સ હવામાં હતી અને પોતાના ગંતવ્ય સ્થાન તરફ આગળ વધી રહી હતી. આ અચાનક થયેલા શટડાઉનને કારણે અમેરિકન એરપોર્ટનું સમગ્ર હવાઈ ટ્રાફિક વ્યવસ્થાપન વેરવિખેર થઈ ગયું હતું. આ વ્યાપક અસરને કારણે એર ઇન્ડિયા દ્વારા પણ એક ટ્રાવેલ એડવાઇઝરી જારી કરવામાં આવી હતી, જેમાં જણાવવામાં આવ્યું હતું કે અમેરિકન એરપોર્ટ્સ પર સંચાર સેવાઓ ઠપ થવાને કારણે ભારતથી અમેરિકા આવતી અને જતી એર ઇન્ડિયાની ફ્લાઈટ્સ પણ ભારે અડચણોનો સામનો કરી રહી છે.

૧૫,૦૫૯ ફ્લાઈટ્સ પ્રભાવિત, શિકાગો અને એટલાન્ટામાં સૌથી મોટું નુકસાન:
અમેરિકામાં સર્જાયેલા આ આઉટેજના કારણે સમગ્ર દેશમાં હવાઈ સેવાઓને વ્યાપક ફટકો પડ્યો છે. કુલ મળીને ૧૫,૦૫૯ ફ્લાઈટ્સ આ મુશ્કેલીની ઝપેટમાં આવી હતી, જેમાંથી ૬,૦૩૬ જેટલી ફ્લાઈટ્સ સંપૂર્ણપણે રદ કરવી પડી હતી જ્યારે ૯,૦૨૩ ફ્લાઈટ્સ ભારે વિલંબથી ચાલી હતી. કેન્સલેશનની આ યાદીમાં શિકાગો ઓ'હેર (ORD) એરપોર્ટ પર સૌથી વધુ ૭૨૩ ફ્લાઈટ્સ રદ થઈ હતી, જ્યારે એટલાન્ટા (ATL) માં ૬૯૫, ડલ્લાસ/ફોર્ટ વર્થ (DFW) માં ૪૯૧, ન્યુ યોર્ક લા ગાર્ડિયા (LGA) માં ૪૩૮, ડેન્વર (DEN) માં ૪૨૩, લોસ એન્જલસ (LAX) માં ૩૩૫, સાન ફ્રાન્સિસ્કો (SFO) માં ૩૦૪, ન્યુ યોર્ક જેએફકે (JFK) માં ૩૦૧, બોસ્ટન લોગન (BOS) માં ૨૮૦ અને નેવાર્ક લિબર્ટી (EWR) માં ૨૫૫ ફ્લાઈટ્સ રદ કરવામાં આવી હતી. આ ઉપરાંત વોશિંગ્ટન ડુલેસ (IAD) માં ૨૪૦ અને સિએટલ-ટાકોમા (SEA) માં ૨૩૬ ફ્લાઈટ્સ રદ થઈ હતી. હાલ પ્રતિબંધ હટી ગયા બાદ એરલાઇન્સ કંપનીઓ દ્વારા ફ્લાઈટ્સનું સંચાલન પટરા લાવવા અને મુસાફરોને રાહત આપવા માટે યુદ્ધના ધોરણે પુનઃપ્રાપ્તિના પ્રયાસો હાથ ધરવામાં આવ્યા છે.