નવી દિલ્હી:  માઈક્રોસોફ્ટની આઉટલુક, ટીમ્સ, શેરપોઈન્ટ અને માઈક્રોસોફ્ટ 365 જેવી અત્યંત મહત્વની સેવાઓ સતત 16 કલાકથી વધુ સમય સુધી ખોરવાયેલી રહેતાં સમગ્ર વિશ્વનું કોર્પોરેટ અને સરકારી કામકાજ ઠપ થઈ ગયું છે, જેના કારણે અબજો ડોલરનું નુકસાન થવાનો અંદાજ છે. આ ટેકનિકલ સંકટ વચ્ચે હવે ટેક જગત અને સોશિયલ મીડિયા પર માઈક્રોસોફ્ટના CEO સત્યા નડેલાની વ્યૂહરચના સામે ગંભીર સવાલો ઉઠી રહ્યા છે. રેડિટ અને X પર અનેક ડેવલપર્સ અને ટેક નિષ્ણાતોએ એવો સનસનાટીભર્યો આરોપ લગાવ્યો છે કે આર્ટિફિશિયલ ઇન્ટેલિજન્સ અને કોપાયલોટ  ની આંધળી દોડમાં કંપનીએ પોતાની મૂળ 'લેગસી સિસ્ટમ્સ' સાચવતા અનુભવી અને વરિષ્ઠ એન્જિનિયરોની અવગણના કરી છે. એક વાયરલ પોસ્ટમાં તો એવો પણ દાવો કરવામાં આવ્યો છે કે આઉટેજ દરમિયાન માઈક્રોસોફ્ટનું પોતાનું આંતરિક ઇન્સિડેન્ટ મેનેજમેન્ટ ટૂલ  પણ લોડ થઈ શક્યું ન હતું, અને જૂની સિસ્ટમ્સના જાણકાર એન્જિનિયરોની ગેરહાજરીને કારણે સમસ્યા ઉકેલવામાં આટલો લાંબો સમય લાગ્યો છે.

બીજી તરફ, માઈક્રોસોફ્ટે આ દાવાઓની પુષ્ટિ કરવાને બદલે સત્તાવાર નિવેદનમાં સ્પષ્ટ કર્યું છે કે આ ઘટના પાછળ કોઈ સાયબર હુમલો કે દૂષિત પ્રવૃત્તિ નથી. કંપનીના જણાવ્યા મુજબ, કેટલાક સર્વર્સ ઓટોમેટિક હેલ્થ ચેકમાં નિષ્ફળ જતાં તેમનો ટ્રાફિક અન્ય સર્વર્સ તરફ ડાયવર્ટ કરવામાં આવ્યો હતો, જેના કારણે સુરક્ષિત કનેક્શન બનાવતી મુખ્ય પ્રક્રિયા પર અતિશય ભારણ આવી ગયું અને સર્વર્સે યુઝર્સની વિનંતીઓ સ્વીકારવાનું બંધ કરી દીધું. 13 નવેમ્બર સુધીમાં કંપનીએ સર્વર્સ રીસ્ટાર્ટ કરીને અને ટ્રાફિક રી-રૂટ કરીને મોટાભાગની સેવાઓ પુનઃસ્થાપિત કરવાનો દાવો કર્યો છે, છતાં હજુ પણ ઘણા યુઝર્સને સમયાંતરે મુશ્કેલીઓનો સામનો કરવો પડી રહ્યો છે.

જોકે, આ આઉટેજે માઈક્રોસોફ્ટની વર્તમાન કાર્યબળ નીતિ અને AI કેન્દ્રિત બજેટ પર મોટી ચર્ચા છેડી દીધી છે. સત્યા નડેલાના નેતૃત્વમાં કંપનીએ OpenAI અને વિશાળ ડેટા સેન્ટર્સ પાછળ અબજો ડોલરનું રોકાણ કર્યું છે, પરંતુ તેની સામે કર્મચારીઓની સંખ્યામાં મોટો કાપ મૂક્યો છે. ઉલ્લેખનીય છે કે 2025માં મે અને જુલાઈ દરમિયાન કંપનીએ આશરે 15,000 કર્મચારીઓને છૂટા કર્યા હતા, ત્યારબાદ જુલાઈ 2026માં વધુ 4,800 નોકરીઓ ઘટાડી અને ઓક્ટોબર 2026માં તો કુલ કાર્યબળના એક ક્વાર્ટરથી વધુ એટલે કે લગભગ 60,000 કર્મચારીઓ માટે સ્વૈચ્છિક નિવૃત્તિ  યોજના જાહેર કરી હતી. નિષ્ણાતો માની રહ્યા છે કે ભવિષ્યની AI ટેકનોલોજી પાછળ દોડતી વખતે જો પાયાની સિસ્ટમ્સની મજબૂતાઈ અને અનુભવી માનવબળને જાળવી રાખવામાં નહીં આવે, તો ભવિષ્યમાં આવા ડિજિટલ બ્લેકઆઉટ વધુ ગંભીર સ્વરૂપ ધારણ કરી શકે છે.