<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 22nd November 2026

કેનેડાના સરેમાં વોલમાર્ટ બહાર ભારતીય મૂળના યુગલની ગોળી મારીને હત્યા : સંગઠિત ગુનાખોરીની શંકા

​પ્રિન્સેસ ડ્રાઇવ નજીક બળેલી હાલતમાં કાર મળી આવી, તપાસ એજન્સીઓ દ્વારા સીસીટીવી અને ડેશકેમ ફૂટેજની માંગ

 કેનેડા તા.૨૨ : કેનેડાના બ્રિટિશ કોલંબિયા પ્રાંતના સરે શહેરમાં એક વોલમાર્ટ સ્ટોરના પાર્કિંગ લોટમાં ભારતીય મૂળના યુવક અને યુવતીની ગોળી મારીને કરપીણ હત્યા કરવામાં આવી છે. ઇન્ટિગ્રેટેડ હોમિસાઇડ ઇન્વેસ્ટિગેશન ટીમ (IHIT) દ્વારા આ ઘટનાને લક્ષ્યાંકિત હુમલો (ટાર્ગેટેડ એટેક) ગણાવીને સંગઠિત ગુનાખોરી (ઓર્ગેનાઇઝ્ડ ક્રાઇમ) સાથે જોડાયેલી હોવાની આશંકા વ્યક્ત કરવામાં આવી છે.

 

​બનાવની વિગતો

 

આ ગોળીબારની ઘટના ૧૫ નવેમ્બરની રાત્રે સરેના ૮૮ એવન્યુ અને ૧૨૪ સ્ટ્રીટ નજીક આવેલા વોલમાર્ટ સ્ટોરના પાર્કિંગ વિસ્તારમાં બની હતી. સ્થાનિક સમય મુજબ રાત્રે લગભગ ૧૦:૩૮ વાગ્યે એક યુવક અને યુવતીને ગોળી વાગી હોવાની માહિતી મળતા સરે પોલીસ સર્વિસના અધિકારીઓ અને પેરામેડિક્સ ઘટનાસ્થળે દોડી ગયા હતા. પ્રાથમિક તબક્કે બંનેને બચાવવાના પ્રયાસો કરવામાં આવ્યા હતા અને ત્યારબાદ તાત્કાલિક હોસ્પિટલ ખસેડાયા હતા, પરંતુ સારવાર દરમિયાન બંનેનું મૃત્યુ નીપજ્યું હતું.

 

​મૃતકોની ઓળખ અને પૃષ્ઠભૂમિ

 

તપાસ એજન્સીઓએ મૃતકોની ઓળખ ૨૩ વર્ષીય ગગનપ્રીત (ગેરી) રેહલ અને ૨૪ વર્ષીય સુખજીત કૌર તરીકે કરી છે. પોલીસના જણાવ્યા અનુસાર, બંને નજીકના ડેલ્ટા ટાઉનશીપમાં રહેતા હતા. ગગનપ્રીત રેહલ અગાઉ શસ્ત્રો સંબંધિત ગુનાઓમાં પોલીસ ચોપડે નોંધાયેલો હતો, જ્યારે સુખજીત કૌરના કેનેડામાં ખૂબ મર્યાદિત સંપર્કો હોવાનું તપાસમાં સામે આવ્યું છે.

 

​બળેલી કાર અને તપાસની દિશા

 

ગોળીબાર થયાના લગભગ ૧૩ મિનિટ બાદ, એટલે કે રાત્રે ૧૦:૫૧ વાગ્યે પ્રિન્સેસ ડ્રાઇવના ૯૭૦૦-બ્લોક વિસ્તારમાં એક વાહનમાં આગ લાગી હોવાની ઘટના સામે આવી હતી. IHITના પ્રવક્તા સાર્જન્ટ ફ્રેડા ફોંગના જણાવ્યા મુજબ, આ બળેલી ચાર દરવાજાવાળી સેડાન કાર હત્યાકાંડ સાથે સંકળાયેલી હોવાનું અને હુમલાખોરો દ્વારા તેનો ઉપયોગ કરાયો હોવાનું માનવામાં આવે છે. ઘટનાસ્થળ નજીક પાર્કિંગમાં કાચ તૂટેલી હાલતમાં એક લાલ ફોર્ડ મુસ્તાંગ કાર પણ જોવા મળી હતી.

 

​IHITએ જણાવ્યું છે કે આ ઘટનાએ બે પરિવારોને અકાળે પોતાના સ્વજનો ગુમાવવાનો દુઃખદ આઘાત આપ્યો છે. પોલીસ દ્વારા ૧૫ નવેમ્બરે રાત્રે ૧૦ થી ૧૧ વાગ્યા દરમિયાન આ વિસ્તારમાં હાજર રહેલા લોકો, તેમજ પાર્કિંગ લોટ કે બળેલી કાર અંગે સીસીટીવી અથવા ડેશકેમ ફૂટેજ ધરાવતા નાગરિકોને આગળ આવી તપાસમાં સહકાર આપવા અપીલ કરવામાં આવી છે.

(1:41 PM IST)