News of Monday, 16th November 2026
બ્રિટિશ શાહી પરિવારના પ્રિન્સ વિલિયમ-કેટ મિડલટન ભારતમાં
મુંબઈમાં અનેક કાર્યક્રમોમાં ભાગ લેશે અને ૧૮ નવેમ્બરે વડાપ્રધાન નરેન્દ્ર મોદી સાથે મુલાકાત કરશે

મુંબઈ,તા.૧૬: વિશ્વભરની નજર અત્યારે ભારત પર ટકવાની છે, કારણ કે બ્રિટિશ શાહી પરિવારના બે મોટા સભ્યો ભારતની મુલાકાતે આવી રહ્યા છે. આ મુલાકાત માત્ર એક ઔપચારિક પ્રવાસ પૂરતી મર્યાદિત નથી, પરંતુ પર્યાવરણ, વેપાર અને બંને દેશો વચ્ચેના ભવિષ્યના સહકારને લઈને પણ ખાસ મહત્વ ધરાવે છે. બ્રિટિશ રાજગાદીના વારસદાર પ્રિન્સ વિલિયમ અને તેમની પત્ની પ્રિન્સેસ કેટ મિડલટન આજથી ૧૬થી ૧૮ નવેમ્બર દરમિયાન ભારતના પ્રવાસે રહેશે. આ દરમિયાન તેઓ મુંબઈમાં યોજાનારા પર્યાવરણીય અર્થશોટ પુરસ્કાર સમારોહમાં ભાગ લેશે. આ ઉપરાંત ૧૮ નવેમ્બરે બંને વડાપ્રધાન નરેન્દ્ર મોદી સાથે મુલાકાત કરશે.
ભારતમાં કાર્યકારી બ્રિટિશ હાઈ કમિશનર બેન મિલરે રવિવારે આ મુલાકાત અંગે માહિતી આપતાં જણાવ્યું હતું કે પ્રિન્સ વિલિયમ મુંબઈમાં સ્ટ્રીટ ક્રિકેટના એક કાર્યક્રમમાં હાજરી આપશે. આ ઉપરાંત તેઓ મુંબઈ મેટ્રો રેલની સવારી પણ કરશે. શાહી દંપતી ૧૮ નવેમ્બરે મુંબઈથી રાજધાની દિલ્હી પહોંચશે, જ્યાં વડાપ્રધાન નરેન્દ્ર મોદી સાથે તેમની મુલાકાત થશે. આ બેઠકમાં બંને દેશો વચ્ચે ભવિષ્યને ધ્યાનમાં રાખીને સહકારના વિવિધ ક્ષેત્રો પર ચર્ચા કરવામાં આવશે.
બેન મિલરે જણાવ્યું હતું કે, વડાપ્રધાન નરેન્દ્ર મોદી બુધવારે તેમના શાહી મહેમાનોને મળશે ત્યારે ભવિષ્યને ધ્યાનમાં રાખીને સહકારના ક્ષેત્રો પર વાતચીત થશે. તેમણે વધુમાં કહ્યું કે આ મુલાકાત ભારતના આબોહવા ક્ષેત્રે નેતૃત્વની ઉજવણી અને વિશ્વ સમક્ષ તેને રજૂ કરવાની એક શ્રેષ્ઠ તક છે. ભારત અત્યારે વિશ્વનું ત્રીજું સૌથી મોટું નવીનીકરણીય ઊર્જા બજાર છે. આ ઉપરાંત ભારત અને બ્રિટન વચ્ચે થયેલા મુક્ત વેપાર કરારથી બંને દેશો વચ્ચેના દ્વિપક્ષીય વેપારમાં ૨૫.૫ અબજ પાઉન્ડનો વધારો થવાની અપેક્ષા છે.
પ્રિન્સ વિલિયમની આ ભારત મુલાકાતમાં અર્થશોટ પુરસ્કાર સમારોહ સૌથી મહત્વપૂર્ણ કાર્યક્રમોમાંનો એક રહેશે. પ્રિન્સ વિલિયમે છ વર્ષ પહેલાં આ વાર્ષિક પર્યાવરણીય પુરસ્કારની શરૂઆત કરી હતી. આ પુરસ્કારનો મુખ્ય હેતુ પર્યાવરણને બચાવવા અને આબોહવા પરિવર્તન સામે લડવા માટે નવીન ઉકેલો શોધનારાઓને પ્રોત્સાહન આપવાનો છે. આ વર્ષે પુરસ્કાર માટે પાંચ ફાઇનલિસ્ટ પસંદ કરવામાં આવ્યા છે. આ પાંચેય ફાઇનલિસ્ટમાંથી દરેકને ૧૦ લાખ પાઉન્ડ એટલે કે આશરે ૧.૩ મિલિયન અમેરિકી ડોલરનું ઇનામ આપવામાં આવશે.
આ વર્ષના ફાઇનલિસ્ટમાં ભારતની એક મોટી કંપનીનું નામ પણ સામેલ છે. ભારતના સૌથી મોટા ઇલેક્ટ્રિક થ્રી-વ્હીલર ઉત્પાદકોમાંની એક મહિન્દ્રા લાસ્ટ માઇલ મોબિલિટીને આ વર્ષે અર્થશોટ પુરસ્કાર માટે પસંદ કરવામાં આવી છે. આ બાબત ભારત માટે પણ ગૌરવની વાત છે, કારણ કે પર્યાવરણને અનુકૂળ પરિવહન ક્ષેત્રે ભારતની કામગીરીને આંતરરાષ્ટ્રીય સ્તરે ઓળખ મળી રહી છે.
આ મુલાકાત દરમિયાન પ્રિન્સ વિલિયમ અને પ્રિન્સેસ કેટના કાર્યક્રમો અલગ-અલગ પણ રહેશે. કેન્સરની સારવાર લઈ રહેલી પ્રિન્સેસ કેટ ભારતની એક હોસ્પિટલની મુલાકાત લેશે. બીજી તરફ પ્રિન્સ વિલિયમ એક પ્રોડક્શન હાઉસની મુલાકાત લેશે, જ્યાં તેઓ બોલિવૂડની જાણીતી હસ્તીઓ સાથે વાતચીત કરશે. આ મુલાકાતને કારણે બોલિવૂડ અને બ્રિટિશ શાહી પરિવાર વચ્ચે પણ ખાસ જોડાણ જોવા મળશે.
અર્થશોટ પુરસ્કાર સમારોહમાં સંગીત અને મનોરંજન જગતની અનેક જાણીતી હસ્તીઅો પણ હાજરી આપશે. કાર્યક્રમની શરૂઆત અર્થશોટ અોર્કેસ્ટ્રા દ્વારા કરવામાં આવશે. ત્યારબાદ જાણીતી ભારતીય ગાયિકા શ્રેયા ઘોષાલ બ્રિટનના લોકપ્રિય અને યુકે ચાર્ટમાં ટોચનું સ્થાન મેળવનારા ગ્રુપ ’ટેક ધેટ’ સાથે પરફોર્મ કરશે. આ ઉપરાંત ક્રિકેટના મહાન ખેલાડી સચિન તેંડુલકર, અભિનેત્રી આલિયા ભટ્ટ અને ફિલ્મ નિર્માતા કરણ જાહર સહિત સંગીત, ફિલ્મ અને રમતગમત જગતની અનેક જાણીતી હસ્તીઅો આ સમારોહમાં હાજરી આપશે.
(9:56 AM IST)









છેલ્લા 8 દિવસમાં સૌથી લોકપ્રિય 
