News of Saturday, 21st November 2026
અજિત ડોભાલ અને સામંત ગોયલને અમેરિકન કોર્ટના સમન્સ પર ભારતનો આકરો પ્રહાર: "પાયાવિહોણા મુકદ્દમા" ગણાવી ફગાવ્યા
.ખાલિસ્તાન સમર્થક સંગઠન 'શીખ્સ ફોર જસ્ટિસ' અને આતંકવાદી ગુરપતવંત સિંહ પન્નુ દ્વારા દાખલ કરાયેલા સિવિલ દાવામાં ન્યૂ યોર્કની કોર્ટે દિલ્હીની જિલ્લા અદાલતો મારફતે સમન્સ બજાવવાનો આદેશ આપતા વિદેશ મંત્રાલયે સ્પષ્ટ શબ્દોમાં આ કાર્યવાહીને નકારી કાઢી.

નવી દિલ્હી : વિદેશ મંત્રાલયે રાષ્ટ્રીય સુરક્ષા સલાહકાર અજિત ડોભાલ અને રિસર્ચ એન્ડ એનાલિસિસ વિંગ ના ભૂતપૂર્વ વડા સામંત ગોયલ વિરુદ્ધ અમેરિકન કોર્ટ દ્વારા જારી કરવામાં આવેલા સમન્સને આકરા શબ્દોમાં નકારી કાઢ્યા છે. ખાલિસ્તાન સમર્થક પ્રતિબંધિત સંગઠન 'શીખ્સ ફોર જસ્ટિસ' (SFJ) અને આતંકવાદી ગુરપતવંત સિંહ પન્નુ દ્વારા દાખલ કરાયેલા સિવિલ દાવાના સંદર્ભમાં આ સમન્સ જારી કરાયા હતા. દિલ્હીની અદાલતો મારફતે સમન્સ બજાવવાના અમેરિકન કોર્ટના આદેશ અંગે પૂછાયેલા પ્રશ્નનો જવાબ આપતા વિદેશ મંત્રાલયના પ્રવક્તા રણધીર જયસ્વાલે સ્પષ્ટપણે જણાવ્યું હતું કે, "અમે આવા પાયાવિહોણા મુકદ્દમાઓને સંપૂર્ણપણે નકારી કાઢીએ છીએ."
ન્યૂ યોર્કના દક્ષિણ જિલ્લાની યુએસ ડિસ્ટ્રિક્ટ કોર્ટના જજ કેથરિન પોલ્ક ફેલા દ્વારા જારી કરાયેલા આ આદેશમાં ડોભાલ અને ગોયલને ન્યાયિક દસ્તાવેજો બજાવવા માટે વૈકલ્પિક પદ્ધતિ અપનાવવાનું કહેવામાં આવ્યું છે. અગાઉ હેગ કન્વેન્શન હેઠળ ભારતની સેન્ટ્રલ ઓથોરિટી મારફતે સમન્સ બજાવવાનો પ્રયાસ નિષ્ફળ રહ્યા બાદ, હવે યુએસ કોર્ટે દિલ્હીની ત્રણ જિલ્લા અદાલતો—પટિયાલા હાઉસ, દ્વારકા અને તીસ હજારી—દ્વારા આંતરરાષ્ટ્રીય ટપાલ અથવા કુરિયર મારફતે દસ્તાવેજો મોકલવાનો નિર્દેશ આપ્યો છે. કોર્ટે હેગ કન્વેન્શન અને ભારતીય સિવિલ પ્રોસિજર કોડની કલમ ૧૯ નો હવાલો આપીને આ પ્રક્રિયામાં ભારતીય અદાલતોની સહાયની વિનંતી કરી છે.
જોકે, રાજદ્વારી સૂત્રોના જણાવ્યા અનુસાર, આ પ્રકારના સમન્સ ભારત માટે કોઈ પણ રીતે બંધનકર્તા નથી અને અમેરિકન ન્યાય પ્રણાલીમાં તેને માત્ર એક નિયમિત પ્રક્રિયાગત પગલા તરીકે જોવામાં આવે છે. અગાઉ પણ યુએસ સ્ટેટ ડિપાર્ટમેન્ટે સ્પષ્ટતા કરી હતી કે આવી ન્યાયિક નોટિસોનો અમેરિકન સરકારના સત્તાવાર વલણ સાથે કોઈ સંબંધ હોતો નથી. ઉલ્લેખનીય છે કે 'શીખ્સ ફોર જસ્ટિસ' દ્વારા ભારતીય નેતાઓ વિરુદ્ધ આવા મુકદ્દમા કરવાની આ પહેલી ઘટના નથી; આ પૂર્વે વર્ષ ૨૦૧૩માં પણ આ જ સંગઠને ૧૯૮૪ના રમખાણોના મામલે તત્કાલીન વડાપ્રધાન ડૉ. મનમોહન સિંહ વિરુદ્ધ અમેરિકામાં સિવિલ સમન્સ જારી કરાવવાનો પ્રયાસ કર્યો હતો.
(10:31 AM IST)









છેલ્લા 8 દિવસમાં સૌથી લોકપ્રિય 
