નવી દિલ્‍હી, તા.૨૯: વિદેશમાં પ્રોપર્ટી ખરીદવા માટે દુબઈ ભારતીયોનું ફેવરિટ ડેસ્‍ટિનેશન બની ગયું છે. પરંતુ દુબઈ દ્વારા પણ ઘણી કરચોરી થઈ રહી છે. આવકવેરાની તપાસમાં આ વાત સામે આવી છે. ઈકોનોમિક ટાઈમ્‍સ અનુસાર ઈક્રમ ટેક્‍સને દુબઈમાં ભારતીયોની અઘોષિત સ્‍થાવર મિલકતો વિશે જાણકારી મળી છે. ૫૦૦થી વધુ મિલકતો છે જેના પર કાર્યવાહી થઈ શકે છે. એટલે કે, આ એવી મિલકતો છે જેના વિશે કાં તો આવકવેરા વિભાગને કોઈ માહિતી આપવામાં આવી ન હતી અથવા જો આપવામાં આવી હતી, તો તે ગેરમાર્ગે દોરનારી હતી.

આવકવેરાના આ દરોડામાં માત્ર દિલ્‍હીમાંથી જ ૭૦૦ કરોડ રૂપિયાથી વધુના બિનહિસાબી વ્‍યવહારોના પુરાવા મળ્‍યા છે. આવકવેરા અધિકારીના જણાવ્‍યા અનુસાર, વિભાગની દિલ્‍હી તપાસ શાખાએ એક ડઝનથી વધુ શોધખોળ હાથ ધરી છે. જેમાં દુબઈમાં ૪૩ અઘોષિત સ્‍થાવર મિલકતો અંગે પુરાવા મળ્‍યા છે.

અધિકારીએ કહ્‍યું કે માત્ર દિલ્‍હીમાં જ શંકાસ્‍પદ કરચોરીનો આંકડો ૭૦૦ કરોડ રૂપિયાથી વધુ છે. તપાસ સમગ્ર ભારતમાં હોવાથી આ રકમ વધુ વધશે. અધિકારીના જણાવ્‍યા અનુસાર આ રકમ કેટલાક હજાર કરોડ રૂપિયા સુધીની હોઈ શકે છે.

તાજેતરમાં જ જર્મનીએ મધ્‍ય પૂર્વમાં ભારતીયોની માલિકીની મિલકતો વિશે ભારત સાથે માહિતી શેર કરી છે. માહિતીમાં એક હજારથી વધુ ભારતીયોની માલિકીની મિલકતોની વિગતો સામેલ છે. જર્મન સત્તાવાળાઓના હાથમાં આવી માહિતી કેવી રીતે આવી તે હજુ સ્‍પષ્ટ નથી.અધિકારીએ કહ્‍યું કે દિલ્‍હીમાં દરોડા દરમિયાન કરદાતાઓએ ૧૨૫ કરોડ રૂપિયાથી વધુનું અઘોષિત રોકડ રોકાણ કર્યું હોવાનું સ્‍વીકાર્યું છે. લોકોએ જણાવ્‍યું કે દરોડા દરમિયાન વિભાગને નકલી રોકડ ચૂકવણી, રસીદો અને નકલી ખરીદીની રસીદો મળી આવી હતી. ઓક્‍ટોબરના અંતથી સરકાર દ્વારા શેર કરવામાં આવેલી આ માહિતીના આધારે ઘણી નોટિસ જારી કરવામાં આવી છે.