<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 16th November 2026

થાઈલેન્‍ડના ફુકેટમાં ઈમારતમાં આગ ફાટી નીકળતા ૧૧ના મોતઃ ૧૬ને ઇજા

ઘટનામાં કોઈ વિદેશી પ્રવાસી સામેલ ન હોવાની પોલીસની સ્‍પષ્ટતાઃ ૨ કલાક બાદ આગ પર કાબૂ મેળવ્‍યો

બેંગકોક, તા.૧૬: થાઈલેન્‍ડના વિશ્વપ્રસિદ્ધ દક્ષિણી રિસોર્ટ ટાપુ ફુકેટ પર વહેલી સવારે એક કોમર્શિયલ ઈમારતમાં અચાનક ભીષણ આગ ફાટી નીકળતા અફરાતફરી મચી ગઈ હતી, જેમાં ઓછામાં ઓછા ૧૧ લોકોના દર્દનાક મોત નીપજ્‍યા છે અને અન્‍ય ૧૬ લોકો ગંભીર રીતે દાઝી ગયા છે. સ્‍થાનિક પોલીસના જણાવ્‍યા અનુસાર, ફુકેટના પヘમિ કિનારે આવેલા સૌથી લોકપ્રિય પ્રવાસન સ્‍થળ પટોંગ નજીકના એક શહેરમાં સ્‍થિત વાહન ભાડાનો વ્‍યવસાય ધરાવતી ઈમારતમાં સ્‍થાનિક સમય મુજબ સવારે ૩:૧૭ વાગ્‍યે આગ ભભૂકી ઉઠી હતી. જ્‍યારે મોટાભાગના લોકો ગાઢ નિદ્રામાં હતા ત્‍યારે લાગેલી આ આગે જોતજોતામાં વિકરાળ સ્‍વરૂપ ધારણ કરી લીધું હતું અને આસપાસની અન્‍ય ઈમારતોને પણ પોતાની ઝપેટમાં લઈ લીધી હતી.

દુર્ઘટનાની જાણ થતાં જ ફાયર બ્રિગેડનો કાફલો તાત્‍કાલિક ઘટનાસ્‍થળે દોડી ગયો હતો અને મોટા પાયે બચાવ તેમજ અગ્નિશામક કામગીરી હાથ ધરવામાં આવી હતી. આગની જ્‍વાળાઓ એટલી પ્રચંડ હતી કે અગ્નિશામક દળના જવાનોને સતત બે કલાક સુધી ભારે જહેમત ઉઠાવવી પડી હતી, જેના અંતે આગ પર સંપૂર્ણ કાબૂ મેળવવામાં સફળતા મળી હતી. આ દુર્ઘટનામાં ઈજાગ્રસ્‍ત થયેલા તમામ ૧૬ લોકોને તાત્‍કાલિક સારવાર અર્થે નજીકની હોસ્‍પિટલમાં ખસેડવામાં આવ્‍યા છે, જ્‍યાં કેટલાકની હાલત નાજુક હોવાનું જાણવા મળી રહ્યું છે.

ફુકેટ એક આંતરરાષ્‍ટ્રીય પ્રવાસન કેન્‍દ્ર હોવાથી શરૂઆતમાં પ્રવાસીઓની સુરક્ષાને લઈને ભારે ચિંતા વ્‍યક્‍ત કરવામાં આવી હતી, પરંતુ પોલીસે સ્‍પષ્ટતા કરી છે કે આ કરૂણ ઘટનામાં મળત્‍યુ પામેલા કે ઘાયલ થયેલા લોકોમાં કોઈ પણ પ્રવાસી સામેલ નથી. પોલીસના સત્તાવાર નિવેદન મુજબ, ઘાયલ થયેલા ૧૬ લોકોમાંથી ૧૫ થાઈલેન્‍ડના સ્‍થાનિક નાગરિકો છે, જ્‍યારે એક વ્‍યક્‍તિ મ્‍યાનમારનો વતની છે.

(3:59 PM IST)