હરારે : ઝિમ્બાબ્વે ક્રિકેટ ટીમે ટેસ્ટ ક્રિકેટના ઇતિહાસમાં એક સુવર્ણ પ્રકરણ ઉમેરીને પ્રવાસી બાંગ્લાદેશ ટીમને કારમો પરાજય આપ્યો છે. હરારે સ્પોર્ટ્સ ક્લબ ખાતે રમાયેલી એકમાત્ર ટેસ્ટ મેચમાં ઝિમ્બાબ્વેના બોલરોના ત્રિપુટી આક્રમણ – બ્લેસિંગ મુઝારાબાની, રિચાર્ડ નગારવા અને ન્યુમેન ન્યામહુરીની ઘાતક બોલિંગના જોરે બાંગ્લાદેશને એક ઇનિંગ્સ અને ૮૫ રનથી પરાજય આપ્યો છે. ટેસ્ટ ક્રિકેટના ઇતિહાસમાં રનના માર્જિનથી ઝિમ્બાબ્વેની આ અત્યાર સુધીની સૌથી મોટી અને ઐતિહાસિક જીત સાબિત થઈ છે. મંગળવારે મેચના ત્રીજા દિવસે જ બીજા સત્રમાં બાંગ્લાદેશનો બીજો દાવ માત્ર ૧૮૫ રનમાં સમેટાઈ ગયો હતો.

પિચ બેટિંગ માટે સારી હોવાનો બાંગ્લાદેશનો દાવો ખોટો પડ્યો

મેચના બીજા દિવસે બાંગ્લાદેશ તરફથી ૭ વિકેટ ઝડપનારા સ્પિનર તૈજુલ ઇસ્લામે દાવો કર્યો હતો કે ત્રીજા દિવસે પિચ બેટિંગ માટે અનુકૂળ બનશે. બાંગ્લાદેશે ત્રીજા દિવસની શરૂઆત ૧ વિકેટે ૪૦ રનથી કરી હતી અને તેઓ ઝિમ્બાબ્વેના સ્કોરથી હજુ ૨૩૦ રન પાછળ હતા. પરંતુ ઝિમ્બાબ્વેના બોલિંગ આક્રમણ સામે બાંગ્લાદેશની રણનીતિ સંપૂર્ણપણે નિષ્ફળ રહી હતી. પિચ પર એવો અસાધારણ બાઉન્સ હતો કે બોલ સીધો બેટર્સના ગ્લોવ્ઝ પર વાગતો હતો, જેનો ફાયદો ઉઠાવીને હોમ ટીમે નિયમિત અંતરે વિકેટો ઝડપવાનું શરૂ કર્યું હતું.

મુઝારાબાનીના પંચાથી લંચ પહેલાં જ કમર તૂટી ગઈ

ઝિમ્બાબ્વેના સ્ટાર ફાસ્ટ બોલર બ્લેસિંગ મુઝારાબાનીએ આ મેચમાં સપાટો બોલાવ્યો હતો. તેણે શરૂઆતમાં જ મહમૂદુલ હસન જોય અને મોમિનુલ હકને સસ્તામાં પેવેલિયન ભેગા કર્યા હતા. નજમુલ હુસૈન શાંતો અને અનુભવી મુશફિકુર રહીમે (૩૪ રન) થોડો વળતો પ્રહાર કરવાનો પ્રયાસ કર્યો હતો, પરંતુ ન્યામહુરીએ શાંતોને બોલ્ડ કરીને આ જોડી તોડી નાખી હતી. લંચ બ્રેક સુધીમાં બાંગ્લાદેશે ૧૧૭ રનમાં જ પોતાના ૫ મુખ્ય બેટર્સ ગુમાવી દીધા હતા. બીજા સત્રની શરૂઆતમાં જ મુઝારાબાનીએ તૌહિદ હૃદયોયને આઉટ કરીને મેચમાં પોતાની ૪ વિકેટ પૂર્ણ કરી હતી.

લોઅર ઓર્ડરનો સંઘર્ષ પણ એળે ગયો

નવીનતમ ડેબ્યુ કરનાર અમીત હસન અને તૈજુલ ઇસ્લામે આક્રમણ રોકીને આઠમી વિકેટ માટે ૩૪ રનની ભાગીદારી કરી હતી, પરંતુ બ્રેડ ઇવાન્સે તૈજુલને શોર્ટ બોલ પર આઉટ કરીને આ પ્રતિકારનો પણ અંત આણ્યો હતો. કેપ્ટન રિચાર્ડ નગારવાએ એક જ ઓવરમાં અમીત હસન અને ખાલેદ અહેમદને આઉટ કરીને બાંગ્લાદેશને બેકફૂટ પર ધકેલી દીધું હતું. અંતે, ન્યુમેન ન્યામહુરીએ હસન મહમૂદને શોર્ટ બોલ પર કેચ કરાવીને બાંગ્લાદેશના બીજા દાવનો ૧૮૫ રને ધ એન્ડ આણ્યો હતો.

પ્રથમ ઇનિંગ્સથી જ ઝિમ્બાબ્વેનો દબદબો

આ ઐતિહાસિક જીતનો પાયો મેચના પહેલા જ દિવસે નંખાઈ ગયો હતો, જ્યારે બાંગ્લાદેશની ટીમ પ્રથમ ઇનિંગ્સમાં માત્ર ૧૪૦ રનમાં ઓલઆઉટ થઈ ગઈ હતી, જેમાં ન્યામહુરીએ ૬૧ રન આપીને ૪ વિકેટ ઝડપી હતી. તેના જવાબમાં ઝિમ્બાબ્વેએ ઇનોસન્ટ કૈયાની શાનદાર ૧૪૦ રનની સદી તેમજ બ્રાયન બેનેટ, ક્રેગ એર્વિન (૬૦ રન) અને વેસ્લી માધેવેરેની શાનદાર અડધી સદીઓની મદદથી ૪૧૦ રનનો મોટો સ્કોર ખડક્યો હતો, જે બાંગ્લાદેશ પર દબાણ લાવવા માટે પૂરતો સાબિત થયો હતો.

સંક્ષિપ્ત સ્કોરબોર્ડ:

·         બાંગ્લાદેશ (પ્રથમ ઇનિંગ્સ): ૧૪૦ ઓલઆઉટ (મોમિનુલ હક ૬૦; ન્યુમેન ન્યામહુરી ૪/૬૧)

·         ઝિમ્બાબ્વે (પ્રથમ ઇનિંગ્સ): ૪૧૦ ઓલઆઉટ (ઇનોસન્ટ કૈયા ૧૪૦, ક્રેગ એર્વિન ૬૦; તૈજુલ ઇસ્લામ ૭/૧૩৮)

·         બાંગ્લાદેશ (બીજી ઇનિંગ્સ): ૧૮૫ ઓલઆઉટ (મુશફિકુર રહીમ ૩૪; બ્લેસિંગ મુઝારાબાની ૪/૬૫, રિચાર્ડ નગારવા ૩/૩૨)

·         પરિણામ: ઝિમ્બાબ્વે એક ઇનિંગ્સ અને ૮૫ રનથી વિજેતા.