લંડન : વર્લ્ડ ચેમ્પિયન્સ ઓફ લીજેન્ડ્સ ૨૦૨૬ની પ્રથમ ધમાકેદાર મેચમાં ઇન્ડિયા ચેમ્પિયન્સે ઓસ્ટ્રેલિયા ચેમ્પિયન્સ સામે ૪૬ રને શાનદાર જીત મેળવીને ટૂર્નામેન્ટમાં વિજયી પ્રારંભ કર્યો છે. ૪૪ વર્ષની ઉંમરે પણ પોતાના જૂના અંદાજમાં રમતા યુવરાજ સિંહે વિસ્ફોટક ઇનિંગ રમીને ઓસ્ટ્રેલિયન બોલરોને બરાબરના દંડ્યા હતા. યુવરાજની આ તોફાની અર્ધસદીની મદદથી ભારતે પ્રથમ બેટિંગ કરતા ૨૦ ઓવરમાં ૭ વિકેટે ૧૯૬ રનનો વિશાળ સ્કોર ખડક્યો હતો, જેના જવાબમાં લક્ષ્યનો પીછો કરવા ઉતરેલી ઓસ્ટ્રેલિયાની આખી ટીમ ૧૫૦ રનમાં ઓલઆઉટ થઈ ગઈ હતી.

મેચની વિગતો મુજબ, યુવરાજ સિંહે પોતાની જૂની લય બતાવતા માત્ર ૩૧ બોલમાં ફિફ્ટી પૂરી કરી હતી અને કુલ ૪૪ બોલમાં ૧૬૧ના સ્ટ્રાઇક રેટથી ૭૧ રન બનાવ્યા હતા. પોતાની આ યાદગાર ઇનિંગ્સ દરમિયાન તેણે ૬ ગગનચુંબી સિક્સર અને ૫ ચોગ્ગા ફટકાર્યા હતા. ભારત તરફથી ઇનિંગ્સની શરૂઆત કરતા નમન ઓઝાએ ૩૧ રનનું યોગદાન આપ્યું હતું, જ્યારે અંબાતી રાયડુ (૪) અને સ્ટુઅર્ટ બિન્ની (૧૩) જલ્દી આઉટ થઈ ગયા હતા.

૧૯૭ રનના પહાડ જેવા લક્ષ્યનો પીછો કરવા ઉતરેલી ઓસ્ટ્રેલિયા ચેમ્પિયન્સની શરૂઆતથી જ બેટિંગ લાઇન-અપ ખોરવાઈ ગઈ હતી. ટીમ તરફથી ડાર્સી શોર્ટે ૨૮ બોલમાં આક્રમક ૬૫ રન અને જો બર્ન્સે ૪૫ રન બનાવ્યા હતા. જોનાથન વેલ્સના ૧૧ રન સિવાય ટીમના બાકીના ૮ બેટ્સમેનો સિંગલ ડિજિટ (એક આંકડાના સ્કોર) પર આઉટ થઈ જતા સમગ્ર ટીમ ૧૬.૨ ઓવરમાં ૧૫૦ રને સમટી ગઈ હતી.

ભારત તરફથી ધારદાર બોલિંગનું પ્રદર્શન કરતા ધવલ કુલકર્ણીએ ઓસ્ટ્રેલિયન બેટ્સમેનોને ભારે મુશ્કેલીમાં મૂકી દીધા હતા. ધવલે સૌથી વધુ ૪ વિકેટ ઝડપીને વિરોધી ટીમની કમર ભાંગી નાખી હતી, જ્યારે તેને યોગ્ય સાથ આપતા મોહિત શર્માએ પણ ૩ મહત્વપૂર્ણ વિકેટો પોતાના નામે કરી હતી.

ઉલ્લેખનીય છે કે નિવૃત્ત થયેલા દિગ્ગજ ખેલાડીઓ માટે આયોજિત આ લીગમાં ભારતીય ટીમે અગાઉની સીઝનમાં પણ પ્રભાવશાળી પ્રદર્શન કર્યું હતું. કેપ્ટન યુવરાજ સિંહનો આ ફોર્મ જાળવી રાખવાનો અંદાજ આગામી મેચો માટે ભારતીય ફેન્સ માટે ખૂબ જ ઉત્સાહજનક સાબિત થયો છે.

ઓસ્ટ્રેલિયા સામેની આ મોટી જીત સાથે ઇન્ડિયા ચેમ્પિયન્સે પોઈન્ટ્સ ટેબલમાં મહત્વપૂર્ણ અંક મેળવી લીધા છે. હવે ભારતીય ટીમ આગામી મેચમાં પણ પોતાની આ જીતની લય બરકરાર રાખવાના ઈરાદા સાથે મેદાનમાં ઉતરશે.