જયપુર: રાજસ્થાન રોયલ્સ અને ગુજરાત ટાઇટન્સ વચ્ચે ખેલાયેલા હાઈ-વોલ્ટેજ મુકાબલામાં ગુજરાતના ૨૨૪ રનના વિશાળ લક્ષ્યાંક સામે રાજસ્થાનની ટીમ ૧૫૨ રનમાં સમેટાઈ ગઈ હતી. કેપ્ટન તરીકે પોતાની પ્રથમ મેચ રમી રહેલા યશસ્વી જયસ્વાલે હાર બાદ ટીમના મુખ્ય બોલર જોફ્રા આર્ચરનો બચાવ કરતા જણાવ્યું હતું કે, ક્રિકેટમાં આવા દિવસો આવતા હોય છે જ્યારે તમારી યોજનાઓ કારગત નીવડતી નથી. આર્ચર અમારો મેચ વિનર ખેલાડી છે અને તે આગામી મેચોમાં મજબૂત વાપસી કરશે તેવો મને પૂરો વિશ્વાસ છે.

ગુજરાતની ટીમે સાઈ સુદર્શન અને શુભમન ગિલની શાનદાર બેટિંગના દમ પર પહાડ જેવો સ્કોર ખડક્યો હતો, જેને રોકવામાં રાજસ્થાનના બોલરો નિષ્ફળ રહ્યા હતા. જયસ્વાલે સ્વીકાર્યું હતું કે ગુજરાતના બેટ્સમેનોને રોકવા અત્યંત મુશ્કેલ હતા અને તેમનું સંપૂર્ણ ધ્યાન માત્ર બાઉન્ડ્રી રોકવા પર જ હતું. પાવરપ્લેમાં વૈભવ સૂર્યવંશી અને ધ્રુવ જુરેલની આક્રમક બેટિંગને કારણે એક તબક્કે રાજસ્થાન મેચમાં હોય તેવું લાગતું હતું, પરંતુ રાશિદ ખાનની ધારદાર બોલિંગે મધ્યક્રમની કમર તોડી નાખી હતી.

મેચ બાદ નાન્દ્રે બર્ગર જેવા ફોર્મમાં રહેલા બોલરને પ્લેઈંગ ઈલેવનમાંથી બહાર રાખવા અંગે પૂછાયેલા પ્રશ્નના જવાબમાં જયસ્વાલે ટૂંકો અને સ્પષ્ટ જવાબ આપ્યો હતો કે તેણે આ નિર્ણય વિશે બહુ વિચાર્યું નહોતું. કેપ્ટનના મતે તેનું ધ્યાન માત્ર પાવરપ્લેમાં કયો બોલર સચોટ લાઈન-લેન્થ જાળવી શકે તેના પર જ કેન્દ્રિત હતું. હારમાંથી બોધપાઠ લઈને હવે રાજસ્થાનની ટીમ પોતાની નબળાઈઓ સુધારવા અને આગામી પડકારો માટે સજ્જ થવા પર ધ્યાન આપી રહી છે.

શું તમને લાગે છે કે જોફ્રા આર્ચરના ખરાબ સ્પેલને કારણે રાજસ્થાનના હાથમાંથી જીત છીનવાઈ ગઈ કે પછી મધ્યક્રમની બેટિંગ નિષ્ફળતા મુખ્ય કારણ હતી?