કરાચી, તા. ૦૮: શ્રીલંકાના યજમાનપદે રમાઈ રહેલા મહિલા એશિયા કપ ૨૦૨૬ દરમિયાન પાકિસ્તાની મહિલા ક્રિકેટ ટીમની ૨૧ વર્ષીય વિસ્ફોટક બેટ્સમેન શવાલ ઝુલ્ફીકાર (Shawaal Zulfiqar) અત્યારે ભારે ચર્ચાના કેન્દ્રમાં આવી ગઈ છે. ભારત સામેની શરમજનક હાર બાદ સોશિયલ મીડિયા પર નેટીઝન્સે શવાલ ઝુલ્ફીકારના ફિટનેસ સ્ટાન્ડર્ડ, બોડી શેપ અને મેદાન પરની રનિંગ સ્પીડ પર અનેક સવાલો ઉઠાવ્યા હતા. જોકે, ટ્રોલર્સની આ નકારાત્મક ચર્ચાઓને બાજુ પર મૂકીને આ યુવા ખેલાડીએ મેદાન પર પોતાના પ્રદર્શનથી તમામને મૌન કરી દીધા છે.

ઉલ્લેખનીય છે કે, ટુર્નામેન્ટની શરૂઆતમાં ભારત સામે પાકિસ્તાનની ટીમ માત્ર ૫૫ રનમાં ઓલઆઉટ થઈ ગઈ હતી, જે મહિલા T20I માં તેમનો સૌથી ઓછો સ્કોર હતો. આ મેચમાં શવાલે ૧૪ રન બનાવ્યા હતા અને ભારત સામેની આ કારમી હાર બાદ પાકિસ્તાની ફેન્સ અને નેટીઝન્સે શવાલની ફિટનેસ પર તીખી ટીકાઓ કરવાનું શરૂ કર્યું હતું. પરંતુ ૭ સપ્ટેમ્બરના રોજ રમાયેલી હોંગકોંગ સામેની નિર્ણાયક મેચમાં શવાલે સણસણતો જવાબ આપ્યો હતો.

હોંગકોંગ સામેની મેચમાં શવાલ ઝુલ્ફીકારે ભારે દબાણ વચ્ચે શાંતિ અને આક્રમકતાનું સંતુલન જાળવીને માત્ર ૩૫ બોલમાં ૪૭ રનની શાનદાર ઇનિંગ રમી હતી. તેની આ મહત્વપૂર્ણ બેટિંગના દમ પર પાકિસ્તાને ૧૪૩/૮ નો મજબૂત સ્કોર બનાવ્યો હતો અને ત્યારબાદ હોંગકોંગને ૭૨ રનથી હરાવીને સેમિફાઇનલમાં પોતાનું સ્થાન પાક્કું કરી લીધું હતું. સોશિયલ મીડિયા પર ચાલતી લુક અને ફિટનેસ અંગેની વાહિયાત ચર્ચાઓને પાછળ છોડીને શવાલ ઝુલ્ફીકાર અત્યારે પાકિસ્તાન ટીમ માટે સૌથી મહત્વપૂર્ણ 'મેચ વિનર' ખેલાડી તરીકે ઉભરી આવી છે.