મુંબઈ: આઈપીએલ ૨૦૨૬ ના લીગ સ્ટેજનો અંત નજીક આવી રહ્યો છે તેમ-તેમ ક્રિકેટ પ્રેમીઓના શ્વાસ અધ્ધર થઈ રહ્યા છે. હાલમાં પોઈન્ટ ટેબલમાં ૧૬ પોઈન્ટ સાથે સૌથી ટોચ પર ચમકી રહેલી રોયલ ચેલેન્જર્સ બેંગલુરુ (RCB) ના ફેન્સ માટે એવું માની લેવામાં આવ્યું છે કે તેમનું પ્લેઓફનું સ્થાન ૯૯ ટકા પાકું થઈ ગયું છે. પરંતુ, ક્રિકેટ અનિશ્ચિતતાઓનો ખેલ છે અને આઈપીએલના ઈતિહાસમાં ગમે ત્યારે ગમે તે સમીકરણો બદલાઈ શકે છે. બાકી રહેલો માત્ર '૧ ટકા' નો ખતરો પણ આરસીબીને પ્લેઓફની દોડમાંથી બહાર ફેંકી દેવા માટે પૂરતો છે. સ્પોર્ટ્સ વિશ્લેષકોએ એક એવું અજીબોગરીબ નવું સમીકરણ રજૂ કર્યું છે જે આરસીબીના ચાહકોની ઊંઘ ઉડાડી શકે છે.

ચાલુ સીઝનમાં ૫૯ લીગ મેચો રમાઈ ગયા બાદ હાલમાં બેંગલુરુ, ગુજરાત ટાઇટન્સ, સનરાઇઝર્સ હૈદરાબાદ અને પંજાબ કિંગ્સ અનુક્રમે પ્રથમ ચાર સ્થાનો પર કબ્જો જમાવીને બેઠી છે. પરંતુ જો આગામી મેચોમાં પાસા ઉલ્ટા પડ્યા, તો આખું ચિત્ર બદલાઈ જશે.

જો આરસીબી પોતાની બાકીની બંને મેચ હારી જાય તો?

આરસીબીએ અત્યાર સુધી ૧૨ મેચ રમી છે અને તેની છેલ્લી બે મેચ પોઈન્ટ ટેબલમાં ત્રીજા અને ચોથા સ્થાને રહેલી મજબૂત ટીમો સનરાઇઝર્સ હૈદરાબાદ અને પંજાબ કિંગ્સ સામે જ છે. જો બેંગલુરુ આ બંને મેચો ખૂબ જ ખરાબ રીતે હારી જાય છે, તો તે ૧૬ પોઈન્ટ પર જ અટકી જશે અને તેનો નેટ રન રેટ પણ નીચે આવી જશે. બીજી તરફ, બેંગલુરુને હરાવવાનો સીધો ફાયદો હૈદરાબાદ અને પંજાબને મળશે.

હૈદરાબાદ, પંજાબ અને ગુજરાતનું વિજયી અભિયાન

હાલમાં સનરાઇઝર્સ હૈદરાબાદ પાસે ૧૪ પોઈન્ટ છે. જો તેઓ આરસીબી સહિત પોતાની બાકીની બંને મેચ જીતી લે, તો તેઓ ૧૮ પોઈન્ટ સાથે પ્લેઓફમાં પહોંચી જશે. તેવી જ રીતે, પંજાબ કિંગ્સ પાસે ૧૩ પોઈન્ટ છે અને જો તેઓ પણ આરસીબી સામેની મેચ સહિત પોતાની બાકીની બંને મેચ જીતે, તો તેઓ ૧૭ પોઈન્ટ સાથે આરસીબીને પછાડી આગળ નીકળી જશે. આ દરમિયાન, બીજા સ્થાને રહેલી ગુજરાત ટાઇટન્સ (૧૬ પોઈન્ટ) જો કોલકાતા નાઈટ રાઈડર્સ અને ચેન્નાઈ સુપર કિંગ્સ સામેની પોતાની છેલ્લી બંને મેચો જીતી જાય, તો તેઓ ૨૦ પોઈન્ટ સાથે ટેબલમાં સૌથી ટોચ પર કન્ફર્મ થઈ જશે.

રાજસ્થાન રોયલ્સનો વિસ્ફોટક કમબેક મચાવશે તબાહી:

આ ડ્રામામાં અસલી ટ્વિસ્ટ પાંચમા સ્થાને રહેલી રાજસ્થાન રોયલ્સ (RR) લાવશે. રાજસ્થાન પાસે હાલ ૧૧ મેચમાં ૧૨ પોઈન્ટ છે અને તેની ૩ મેચ બાકી છે. જો રાજસ્થાન રોયલ્સ દિલ્હી કેપિટલ્સ, લખનૌ સુપર જાયન્ટ્સ અને મુંબઈ ઇન્ડિયન્સ સામેની પોતાની ત્રણેય મેચો શાનદાર રીતે જીતી જાય, તો તેઓ સીધા ૧૮ પોઈન્ટ પર પહોંચી જશે.

પરિણામ: આ સ્થિતિમાં ગુજરાત (૨૦ પોઈન્ટ), હૈદરાબાદ (૧૮ પોઈન્ટ), રાજસ્થાન (૧૮ પોઈન્ટ) અને પંજાબ (૧૭ પોઈન્ટ) સાથે ટોપ-૪ માં ક્વોલિફાય થઈ જશે, જ્યારે ટેબલ ટોપર હોવા છતાં આરસીબી માત્ર ૧૬ પોઈન્ટ સાથે પાંચમા સ્થાને ધકેલાઈને ટૂર્નામેન્ટમાંથી શરમજનક રીતે બહાર થઈ જશે. જો કે, આ સમીકરણ બનવાની શક્યતા ઘણી ઓછી છે, પણ ક્રિકેટના મેદાન પર કંઈપણ અશક્ય નથી!